டிஎம்எஸ்சுக்காக வாழும் ரசிகர்!

பின்னணிப் பாடகர் டி.எம்.சவுந்தரராஜன் என்கிற டி.எம்.எஸ்சுக்கு அறிமுகம் தேவையில்லை. கணீர் குரல் என்றாலே அது இந்த மூன்றெழுத்துக்கள்தான். இன்று அவர் நம்முடன் இல்லை. ஆனாலும் அவர் பாடிய பாடல்கள் நம்முடன்தான் கலந்திருக்கின்றன. கிட்டத்தட்ட 60 ஆண்டுகளுக்கும் மேலாக பாடலில் கோலோச்சியவர்.

அப்படிப்பட்டவரின் பாடல்களை பொக்கிஷமாகச் சேகரித்து பாதுகாத்து வருகிறார் சென்னை வண்ணாரப்பேட்டையைச் சேர்ந்த பரசுராம். தனியார் நிறுவனத்தில் பணிபுரிந்த இவர் இப்போது பல்வேறு ஆன்மிகப் பத்திரிகைகளில் கட்டுரைகள் எழுதி வருகிறார்.

‘‘சொந்த ஊர் திருச்சி. பத்தாவது வரை படிச்சேன். அப்புறம் வேலைக்காக 1971ல சென்னைக்கு வந்தேன். தனியார் டீ நிறுவனத்துல 25 வருஷங்கள் வேலை பார்த்தேன்.சின்ன வயசுல இருந்தே புத்தகங்கள் படிக்கப் பிடிக்கும். அதுதான் இப்ப இலக்கிய, ஆன்மிகக் கட்டுரைகளை நான் எழுதக் காரணம்னு நினைக்கறேன்...’’ என்ற பரசுராம் டிஎம்எஸ் குறித்து பேசத் தொடங்கும்போதே தழுதழுக்கிறார்.

‘‘அவர் பாடல்களைக் கேட்டுத்தான் வளர்ந்தேன். சொல்லப்போனா என்னை வளர்த்ததே டிஎம்எஸ் ஐயாதான். வீட்ல கிராமஃபோன்ல அப்பா அவர் பாடல்களை ஒலிக்க விடுவார். அந்தக் கணீர் குரல் என்னை சுண்டி இழுக்கும். சினிமால நடிக்கிறவங்களேதான் சம்பந்தப்பட்ட பாடல்களையும் பாடறாங்கனு நினைச்சுட்டு இருந்தேன். பின்னணிப் பாடகர்னு ஒருத்தர் உண்டுனு அப்ப தெரியாது.

ஒருமுறை ‘தெய்வத்தாய்’ படத்தை என் அண்ணாவும் நானும் பார்த்தோம். அதுல எம்ஜிஆர் ‘மூன்றெழுத்தில் என் மூச்சிருக்கும்...’னு பாடி நடிச்சிருப்பார். மறுநாள் அந்தப் பாட்டை ரேடியோவுல ஒலிபரப்பினாங்க. அப்ப வால்வ் ரேடியோ வைச்சிருக்கறது பெரிய விஷயம். பக்கத்து வீட்டுல அந்த ரேடியோ இருந்தது. அவங்கதான் ‘இது டிஎம்எஸ் பாடினது’னு சொன்னாங்க.

முதல்ல எனக்கு ஒண்ணும் புரியல. எம்ஜிஆர்தானே பாடினார்... நாமே சினிமாவுல பார்த்தோமேனு குழம்பினேன். அப்புறம்தான் அந்த வீட்டு அக்கா எனக்கு பின்னணிப் பாடகர்களைப் பத்தி புரிய வைச்சாங்க...’’ என மலரும் நிகழ்வுகளில் மூழ்கிய பரசுராம், இதன்பிறகு தீவிர டிஎம்எஸ் ரசிகராகி இருக்கிறார்.

‘‘என்ன ஓர் ஆளுமை... எம்ஜிஆர், சிவாஜி, ஜெய்சங்கர்னு பலருக்கும் அவர் பாடியிருக்கார். ஆனா, எல்லாமே ஒரே மாதிரி இருக்காது. ஒவ்வொருத்தருக்கு ஒவ்வொரு குரலா இருக்கும். அந்தத் தோரணைக்கும் வார்த்தை உச்சரிப்புக்கும் நான் மயங்கலைனா மனுஷனே இல்ல!