ரவியை போட்டுத் தள்ள திட்டம் தீட்டிய ஜெகன்மோகன் ரெட்டி?!

போஸ்ட் மார்ட்டம்-13

என்ன பயன்?

24 ஆயிரம் ஓட்டுகளில் பரிதலா ரவி தனது பெனுகொண்டா தொகுதியில் வெற்றி பெற்ற பிறகும் மாநில அளவில் தெலுங்கு தேசம் கட்சி பெரும்பான்மை பெறவில்லை. மாறாக காங்கிரஸ் கட்சியே ஆட்சியைப் பிடித்தது.இதனைத்தொடர்ந்துதான் பரிதலா ரவியின் கிராஃப் சரியத் தொடங்கியது.

காங்கிரஸ் அமைச்சரவை பொறுப்பேற்ற மூன்றாவது நாளில் இருந்து அனந்தப்பூர் மாவட்டத்தில் பழிக்குப் பழியான கொலைச் சம்பவங்கள் தொடர ஆரம்பித்தன. இந்த முறை மாட்டிக் கொண்டவர்கள் தெலுங்கு தேசம் தொண்டர்கள்தான்.இந்தப் பிரச்னைகளுக்கிடையில் ரவிக்கு கொடுத்திருந்த பலமான பாதுகாப்பை விலக்கிக்கொண்ட மாநில அரசு, இரண்டே இரண்டு மெய்க்காவலர்களையும், இரண்டு துப்பாக்கி ஏந்திய மெய்க்காவலர்களையும் மட்டுமே அளித்தது.

இப்படி வந்த புதிய பாதுகாவலர்களும் 40 வயதைத் தாண்டியவர்களாக இருந்தார்கள்!இது தன்னை கல்லறைக்கு அனுப்ப அரசு செய்யும் சதி என்று நினைத்து ரவி கதறத் தொடங்கினார். மாநில அரசிடம் தனது நிலையை எடுத்துச் சொல்லி தனக்குக் கூடுதல் பாதுகாப்பு கோரினார். ஆனால், தரப்படவில்லை. ஆந்திர உயர்நீதிமன்றத்தில் இது குறித்து மனு செய்தார். மனுவை விசாரித்த நீதிமன்றம் ஐந்து காவலர்களையும், ஐந்து துப்பாக்கி ஏந்திய காவலர்களையும் ரவிக்கு வழங்கும்படி பரிந்துரைத்தது.

வேறு வழியில்லாமல் அரசு இதனை வழங்கியது.ஆனாலும் ரவி தன்னைக் கொல்ல சூரி சிறையில் இருந்தபடியே முயற்சிகளைச் செய்து வருகிறார் என்பதை உணர்ந்து அதற்கு ஏற்ப தன்னை மாற்றிக் கொண்டார். எப்போதும் 40 வாகனங்கள் சூழ சென்று வந்தவர் இப்பொழுது இரு வாகன வரிசைக்கு மாறினார். இதனால் தன்னை அடையாளம் காண முடியாது என்று நினைத்தார்.

எதிர் கோஷ்டியினரின் திட்டம் வேறு மாதிரியாக இருந்தது. ரவி பயப்படுகிறார் என்பதை அறிந்தவர்கள், அந்த அச்சத்தை அதிகரிக்கும் வகையில் ரவியை விட்டுவிட்டு அவரது சுற்றத்தை அழித்தொழிக்கத் தொடங்கினர். ரவிக்கு மிகச் சிறந்த ஆலோசகராகத் திகழ்ந்த பாட்சா 2004ம் ஆண்டு தர்மாவரம் அருகே சூரியின் ஆதரவாளர்களால் சுட்டுக் கொல்லப்பட்டார். போலவே ரவியின் ஆதரவாளர்களில் ஒருவரான ஆதிநாராயணன், சோமந்தபள்ளி அருகே சுடப்பட்டார்.

தகரகுண்டா பிரபாகர், ஜலகண்டி சீனிவாச ரெட்டி, தாமோதர் ரெட்டி, பாஸ்கர் ரெட்டி... என சுடப்பட்டவர்களின் எண்ணிக்கை அதிகரித்தது. தனது வீட்டின் அருகே வாக்கிங் சென்ற ஆர்.கே. என்னும் ரவியின் ஆலோசகரும் வெட்டிச் சாய்க்கப்பட்டார்.சோமந்தபள்ளியில் நடந்த இடைத்தேர்தலில் பிரசாரத்துக்கு ரவி வந்தால் அவரைப் படுகொலை செய்வது என திட்டமிட்ட சூரி தரப்பு அனைத்து ஏற்பாடுகளையும் செய்தது. இதனை ஸ்மெல் செய்த ரவி, தனது பிரசாரத்தை ரத்து செய்தார்.

சூரி தரப்பு என்றில்லை.. அரசுத் தரப்பும் ரவியின் சிறகுகளை முறிக்கும் வேலையில் இறங்கியது. ரவியின் கொடுக்கல், வாங்கல்களை கவனித்துக் கொண்டிருந்த பவுரலா கிருஷ்ணனையும் இவரது தம்பியையும் ‘ஸ்டேஷனுக்கு வாங்க... கொஞ்சம் விசாரிக்கணும்...’ என்று அனந்தப்பூர் டிஎஸ்பி நரசிம்ம ரெட்டி போன் செய்து அழைத்தார்.

மரியாதைக்கு போய் வருவோம் என்று நினைத்து கிளம்பிய அவர்களை வழியிலேயே சூரி தரப்பு மடக்கி சொர்க்கத்துக்கு அனுப்பியது.பெயருக்கு கைதியாக இருந்தாலும் காங்கிரஸ் கட்சியின் அதி தீவிரத் தொண்டர், தலைவர் என்கிற முறையில் சூரிக்கு சிறையில் ராஜமரியாதை கிடைத்தது. சிறையில் அவரால் சுதந்திரமாக செல்போனில் பேச முடிந்தது. இதனால்தான் தனது ஆதரவாளர்களுக்கு பல கொலைகளுக்கு இன்ஸ்ட்ரக்‌ஷனும், ஸ்கெட்ச்சும் போட்டு அவரால் கொடுக்க முடிந்தது.

ஜெகன்மோகன் ரெட்டி கர்நாடகாவில் சுரங்கத் தொழிலில் ஈடுபட்டபோது அங்கும் ரவி அவருக்கு தொல்லைகள் கொடுத்தார்.
எனவே, ரவியை ஒழித்துக் கட்டினால்தான் நிம்மதியாகத் தொழிலை நடத்த முடியும் என்று நினைத்த ஜெகன்மோகன் ரெட்டி, சிறையில் பலமுறை சூரியைச் சந்தித்துப் பேசியிருக்கிறார். எல்லாமே ரவியை போட்டுத்தள்ளும் திட்டத்துக்காகத்தான் என்கிறார்கள்.

இதற்கு செர்லாபள்ளி ஜெயில் கண்காணிப்பாளர் மிலிகாந்தும் துணை போயிருக்கிறார் என்று ரவியின் கொலைக்குப் பின்பு தெலுங்கு தேசம் கட்சிக்காரர்கள் புகார் பட்டியல் வாசித்தனர்!தன்னை கொலை செய்ய ஜெகன்மோகன் ரெட்டி முயற்சிக்கிறார் என்று ரவி பகிரங்கமாகப் புகார் செய்ய... இதனை மறுத்து ஜெகன்மோகன் ரெட்டி புலிவெந்துலா கோர்ட்டில் ரவியின் மீது மான நஷ்ட வழக்குத் தொடர்ந்தார்.

சம்மனைப் பெற்றுக் கொண்ட ரவி, கோர்ட்டுக்கு செல்லும் வழியில் தன்னைக் கொல்ல சதி நடப்பதாக புகார் செய்தார். போலீஸ் பலத்த பாதுகாப்பு தரும் என்று சொல்லியும் தன் ஆதரவாளர்களும் உடன் செல்ல அனுமதி வேண்டும் என்று கோரினார் ரவி. அது நிராகரிக்கப்பட்டது என்றாலும் இரு வாகனங்களில் பலத்த போலீஸ் பாதுகாப்புடன் கோர்ட்டுக்கு வந்து சென்றார் ரவி.இந்த நேரத்தில்தான் ரவி தனக்குத்தானே யோசிக்கத் தொடங்கினார்.