பெண்களை இழிவுபடுத்தும் நாசா!

ஆண் - பெண் என்கிற  பாலின பாகுபாடு நாசாவையும் விட்டு வைக்கவில்லை. ‘‘விண்வெளி ஆடைகள், குளிர்சாதனப் பெட்டி, மொபைல், செயற்கை நுண்ணறிவு, கார் உள்ளிட்ட விண்வெளி வீரர்களுக்குத் தேவையான அனைத்து உபகரணங்களும் ஆண் விண்வெளி வீரர்களுக்கு உகந்த மாதிரி மட்டுமே நாசாவில் வடிவமைக்கப்பட்டுள்ளன...’’ என்ற விண்வெளி வீராங்கனைகளின் குற்றச்சாட்டு பெரும் பரபரப்பைக் கிளப்பியுள்ளது.

1961ம் வருடம் முதன் முறையாக ஓர் ஆண் விண்வெளி வீரரைத்தான் விண்வெளிக்கு அனுப்பியது நாசா. அதற்குப் பிறகு இருபது வருடங்கள் கழித்து 1983ல் முதன் முறையாக சல்லி ரைட் என்ற விண்வெளி வீராங்கனையை விண்வெளிக்கு அனுப்பியது.அன்று முதல் இன்று வரை நாசாவில் இருந்து 40 பெண்கள் மட்டுமே விண்வெளிக்குச் சென்று வந்திருக்கின்றனர். ஆனால், விண்வெளிக்குச் சென்று வந்த ஆண்களின் எண்ணிக்கையோ முந்நூறைத் தாண்டும்.

இந்த விவரங்களையெல்லாம் தூசு தட்டிப் பார்ப்பதற்காகவே ஒரு சம்பவம் சமீபத்தில் அரங்கேறியது.பெண் விண்வெளி வீராங்கனைகளை விண்வெளிக்கு அழைத்துச் சென்று, சர்வதேச விண்வெளி நிலையத்திற்கு வெளியே அவர்களை நடக்க விட வேண்டும். பிறகு அவர்களை வைத்தே மின்கலன்களைப் பொருத்த வேண்டும் என்று ஒரு திட்டத்தை இரண்டு மாதங்களுக்கு முன்பு தீட்டியது நாசா.