தங்கம் விலை உயர்வு ஏன்?

ஒட்டன்சத்திரம் காய்கறி மார்க்கெட்டாக இருந்தாலும் சரி... கோயம்பேடு மார்க்கெட்டாக இருந்தாலும் சரி... எப்படி காய்கறியின் விலை ஒன்றாக இருக்கிறது..?உலகமயமாக்கல், தாராளமயமாக்கல் என இதற்கு விடை அளிக்கலாம். அதாவது சம்பந்தமே இல்லாதவர்களின் சம்மதத்துடன் எல்லா இடங்களிலும் ஒரே விலை நிர்ணயிக்கப்படுகின்றன.இதே சூத்திரம்தான் வரலாறு காணாத அளவுக்கு இன்று தங்கம் விலை உயரவும் காரணம். சர்வதேச சந்தையில் தங்கத்தின் விலையை லண்டனில் உள்ள ஒரு குழு தினமும் நிர்ணயம் செய்கிறது.

தங்கத்தின் உற்பத்திக்கும், தேவைக்கும் இடையிலான இடைவெளி; பல்வேறு நாட்டு அரசாங்கங்களின் தங்க கொள்முதல் கொள்கைகள்; கச்சா எண்ணெய் விலை; அமெரிக்க ரிசர்வ் வங்கியின் வட்டி மாற்ற கொள்கைகள்; பொருளாதார வல்லமை படைத்த நாடுகளுக்கிடையே ஏற்படும் வர்த்தகப் போர்; உலக பொருளாதாரத்தில் முக்கிய அங்கம் வகிக்கும் நாடுகளில் ஏற்பட்டுள்ள குழப்பமான அரசியல்; போர்க்கால சூழ்நிலை... என தங்கத்தின் விலை உயர்வதற்கு காரணிகளாக சொல்லப்படுகின்றன.

சுருக்கமாக சொல்வதென்றால் அமாவாசைக்கும் அப்துல் காதருக்கும் தொடர்பிருக்கிறது! சர்வதேச அளவில் 2 லட்சம் டன் அளவுக்கு தங்கத்தின் புழக்கம் இருந்தாலும், 2018ம் ஆண்டு புள்ளிவிவரப்படி, சுமார் 8,000 டன் தங்க கையிருப்புடன் அமெரிக்க அரசு முதலிடத்தை வகிக்கிறது. சுமார் 600 டன் கையிருப்புடன் இந்திய அரசு 10வது இடத்தில் உள்ளது. ஆனால், இந்திய மக்களிடம் மட்டும் சுமார் 25 ஆயிரம் டன் தங்கம் உள்ளதாக உலக தங்க கவுன்சில் சொல்கிறது. இந்தியாவைப் பொறுத்தவரை கடந்த 100 ஆண்டுகளில் கிட்டத்தட்ட 1,300 மடங்கு அளவுக்கு தங்கத்தின் விலை உயர்ந்துள்ளது.

அதாவது 1920ல் ஒரு சவரன் தங்கத்தின் விலை ரூ.21தான். 1960ல் இது ரூ.80 ஆக உயர்ந்தது. இதையே கிட்டத்தட்ட 40 ஆண்டுகளில் வெறும் 60 ரூபாய் அளவுக்கே சவரனின் விலை உயர்ந்தது என்றும் சொல்லலாம்.ஆனால், அடுத்த 20 ஆண்டுகளில், அதாவது 1987 வாக்கில், ஒரு சவரன் 2,016 ரூபாய்க்கும்; 2008ல் 10,000 ரூபாய்க்கும் விற்றது. இந்நிலையில் 2008ல் ஏற்பட்ட உலகளவிலான பொருளாதாரத் தேக்க நிலை, சர்வதேச நாடுகளுக்கு ஒரு பாடத்தை கற்பித்தது. அதாவது, அனைத்து நாட்டு மத்திய வங்கிகளும், புழக்கத்தில் இருக்கும் தங்கள் நாட்டின் நாணயத்தைத் தவிர, தங்கத்தை ஒரு ‘ரிசர்வ்’ நாணயமாகக் கருதி அதனை அதிகளவு கொள்முதல் செய்து கஜானாவில் இருப்பு வைக்க முடிவு செய்தன.