இந்தியன் வங்கியின் நிறுவனர் கிருஷ்ணசாமியின் கொள்ளுப் பேரன், ஏவிஎம் குடும்பத்தின் மருமகன், பிரபல சினிமா பைனான்சியரின் மகன், பன்னாட்டு நிறுவனத்தின் உயர் அதிகாரி... என பன்முகம் கொண்டவர் ஆர்யன் ஷாம். சினிமா மீதுள்ள பேஷனால் நடிக்க வந்துள்ளார்.

இவர் ஹீரோவாக அறிமுகமாகும் படம் ‘அந்த நாள்’.போஸ்டர் திகில் கிளப்புதே?

ஆமா. நாங்க எங்க படத்தை அறிமுகம் செய்து வைக்கும்போது ‘இதய பலவீனம் உள்ளவர்களும், கர்ப்பிணிப் பெண்களும் படம் பார்க்க வருவதை தவிர்க்கவும்’னுதான் சொன்னோம்; சொல்றோம்.

அதுக்கு காரணம் ‘நரபலி’தான் எங்க படத்தின் கதைக்கரு.இயக்குநர் மிஷ்கின் டைரக்‌ஷன்லதான் அறிமுகமாக இருந்தேன். ஆனா, அது நடக்கல. அந்த வலியிலிருந்து வெளியே வரணும்னு அதைவிட பெரிய படம் பண்ண நினைச்சோம். அப்படி ஆரம்பிச்ச படம்தான் ‘அந்த நாள்’.

பிளாக் மேஜிக் எனும் பில்லிசூனியம் பற்றிய கதை இது. நரபலி என்ற கான்செப்ட் சினிமா இண்டஸ்ட்ரிக்கு புதுசா இருக்கும். ஆடியன்ஸும் சைக்கோ கில்லர் மாதிரியான படங்களைப் பார்த்திருப்பாங்க. ஆனா, இந்த ஜானர்ல படம் வந்திருக்காது.

அப்படியே வந்திருந்தாலும் விரல்விட்டு எண்ணக்கூடிய படங்களே வந்திருக்கும்.இது கற்பனை கன்டன்ட் கிடையாது. மனித சமுதாயத்தில் முன்பு நரபலி கொடுக்கப்பட்டுள்ளது. அதைப்பற்றி ஆராய்ச்சி செய்தபிறகுதான் இந்தக்கதையைக் கையில் எடுத்தோம். கொரியன் படங்கள், ஜப்பானிய படங்களில்கூட இந்த மாதிரியான படம் வந்ததில்ல. கண்டிப்பா புது ஜானர் படம்னு சொல்லலாம்.

இந்தமாதிரி கதையை கையில் எடுக்க காரணம் இயக்குநர் விவீ சொன்ன லைன்தான். அது பிடிச்சிருந்தது. அதோடு என் மனசுக்குள்ள உதிச்ச சில விஷயங்களைச் சொன்னேன். இப்படியாக நானும் இயக்குநரும் சேர்ந்து இந்த ஸ்கிரிப்ட்டை உருவாக்கினோம்.கதை உருவாக்கத்துக்கே ஒரு வருஷம் எடுத்துக்கிட்டோம்.

15ம் நூற்றாண்டிலிருந்து இதற்கான மேற்கோளை எடுத்திருக்கோம். அந்த டைம்ல இந்தியாவில் மட்டுமல்ல, ஆப்பிரிக்க, ஐரோப்பிய நாடுகளில்கூட ‘நரபலி’ நடந்திருக்கு. இது நாங்க செய்த ஆய்வுல தெரிய வந்தது. ‘நரபலி’ விஷயத்தில் அந்தந்த நாடுகளின் சடங்குகளுக்கு ஏற்ப பண்ணியிருப்பார்கள்.

அந்த நிலையில், எங்கள் படம் ஏவி.எம் பேனர்ல வெளிவருவது சரியானதாக இருக்காது என்று தோன்றியது. ஏவிஎம் நிறுவனம் இதுவரை ஃபேமிலி படங்கள், கமர்ஷியல் படங்களை மட்டுமே தயாரித்துள்ளார்கள். இந்த மாதிரி படத்தை தயாரித்ததில்லை.கதைக்கரு ‘நரபலி’ என்கிற காரணத்தால எங்களுக்கு சென்சார் கிடைக்கல.

பிறகு ரிவைசிங் கமிட்டி போனோம். போர்டு மெம்பரான நடிகை கெளதமி மேடம் படம் பார்த்துட்டு, ‘சொல்ல வந்த விஷயத்தை சரியா சொல்லியிருக்கீங்க’ என்று பாராட்டினார். ஃபைனலா ‘ஏ’ சர்டிபிக்கேட் கிடைச்சது.இதுவும் ஏவிஎம் பேனர்ல வராததற்கு ஒரு காரணம்னு சொல்லலாம். ஏன்னா, அவங்க தயாரிச்ச எல்லா படங்களும் ‘யு’ சர்டிபிக்கேட் படங்கள்.