சிறுகதை - தென்னையப் பெத்தா எளநீரு

‘‘டாடி, ரெடியா?’’ என்று கேட்டபடி மகன் இவனுடைய அறைக்குள்ளே பிரவேசித்தபோது, ‘‘எதுக்குடா ரெடியாண்ற?’’ என்று இவன் புருவங்களை உயர்த்தினான்.
‘‘டாடி, நீங்க நெஜம்மாவே மறந்துட்டீங்களா, இல்ல சும்மா டிராமா போடறீங்களான்னு தெரியல...’’ என்று அதிருப்தியடைந்தான் அருமை மகன். “இன்னிக்கி ஒங்களோட முதியோர் இல்லத்துக்குப் போக வேண்டிய நாள்னு போன வாரமே சொன்னேன்ல?”

“என்னோட முதியோர் இல்லமா! முதியோர் இல்லம் எதுவும் நா நடத்தலியேடா!”“இந்த எடக்குப் பேச்சையெல்லாம் விடுங்க டாடி. சீக்கிரம் ரெடியாகுங்க. பத்து ட்டூ பதினொண்ணு நல்ல நேரம்...”“பெத்த அப்பன முதியோர் இல்லத்ல சேக்கறதுக்கு நல்ல நேரம் என்ன கெட்ட நேரம் என்னடா!”“சரி டாடி... இப்டியெல்லாம் பஞ்ச் டயலாக் எடுத்து வுடாதீங்க. அப்புறம் நா எமோஷனலாயிருவேன். ஸூட் கேஸ பேக் பண்ணீங்களா, இன்னும் இல்லையா?”

“பேக் பண்றேன் மகனே... ஒங்க அம்மா இருந்திருந்தா இப்டியெல்லாம் நடக்குமாடா!”
“மம்மி இருக்கும்போதே நாங்க இத ப்ளான் பண்ணிட்டோம் டாடி. இந்த மேட்டர ஒங்கட்ட அப்ப நாங்க சொல்லல. ஒங்க மருமக அப்ப என்ன சொன்னா தெரியுமா? கேட்டா நீங்க எமோஷனலாயிருவீங்க...”“சொல்லேன், நா என்ன ஆகறேன்னு பாத்துருவோம்...”“ஒங்க மருமக என்ன சொன்னான்னா, ஒங்க மம்மியையும் டாடியையும் ஒரே ஓல்ட் ஏஜ் ஹோம்ல சேப்போங்க... தனித்தனி ஹோம்ல சேத்து, வயசான தம்பதியப் பிரிச்சி வக்கிற பாவச் செயல நாம செய்யக்கூடாதுங்கன்னா...”

“ஆஹா, மேட் ஃபார் ஈச் அதர் ஜோடிடா நீங்க!”
“ஆனா, அதுக்குள்ள மம்மி அவசரப்பட்டுப் போய்ட்டாங்க...”
“அவ குடுத்து வச்சவ, போய்ட்டா. பரவாயில்லடா, இதுக்கெல்லாம் வருத்தப்படாத. கண்ணத் தொடச்சிக்க...”

“சரி டாடி, இப்டியே நாம வெட்டி அரட்ட அடிச்சிட்டிருந்தா நல்ல நேரம் போயிரும்...”“கொழந்தைங்கட்ட சொல்லலியேடா, அதுங்கட்ட சொல்லிட்டுக் கௌம்பறேனேடா...”“இன்னிக்கி ஸண்டே, அதுங்க ரெண்டும் அதுங்க மம்மியோட மார்னிங் ஷோ சினிமாக்குப் போயிருக்குங்க டாடி. சினிமா முடிஞ்சி, வெளிய லஞ்ச் சாப்ட்டுட்டுத்தான் எல்லாரும் வருவாங்க. முதியோர் இல்லத்ல ஒங்கள அட்மிட் பண்ணிட்டு, நா போய் என்னோட ஃபேமிலியோட லஞ்ச்ல ஜாய்ன் பண்ணணும்...”

“அப்ப, நா ஒன்னோட ஃபேமிலி இல்லியா மகனே?”