ஆம்பூர் அன்னை தெரசா...

மருத்துவர் ஆலிஸ் ஜி பிராயரின் மறைவு ஆம்பூர் சுற்றுவட்டார மக்களைப் பெரும் சோகத்தில் ஆழ்த்தியுள்ளது. ‘ஆம்பூரின் அன்னை தெரசா’ எனப் போற்றப்படும் அவர் சுமார் 57 ஆண்டுகள் அந்தப் பகுதி மக்களுக்காக தன்னுடைய வாழ்க்கையை அர்ப்பணித்து மருத்துவ சேவை செய்து வந்தவர்.ஏழை, எளிய மக்களுக்கு ஒளிவிளக்காய் இருந்தவர். கடந்த செப்டம்பர் 30ம் தேதி உடல்நலக் குறைவால் வேலூர் சிஎம்சி மருத்துவமனையில் அனுமதிக்கப்பட்டு வயது மூப்பின் காரணமாகக் காலமானார்.

அமெரிக்காவிலிருந்து மிஷனரி பணிக்கென தனியொரு பெண்ணாக தன்னுடைய முப்பது வயதில் தமிழகம் வந்தவர் ஆலிஸ் ஜி பிராயர். ஆம்பூர் மக்கள் அவரைச் செல்லமாக ‘மிஸ்ஸியம்மா’ என்றே அழைத்து வந்தனர். இப்போது அவரின் பிரிவு அவர்களுக்கு மிகுந்த மனவேதனையைத் தந்துள்ளது. இந்நிலையில் ஆலிஸ் குறித்து கடந்த பத்து ஆண்டுகளாக ஆவணப்படம் எடுத்துவரும் ஆவணப்பட இயக்குநர் சாரோனிடம் பேசினோம்.

‘‘முதல்ல இந்த ஆவணப்படத்தைப் பத்தி சொல்லிடுறேன். இந்த ஆவணப்படத்தின்பெயர், ‘ஐந்து தேவதைகள்’. இது ஆலிஸைப் பத்தின ஆவணப்படம் மட்டும் இல்ல. இந்திய பெண் கல்வி மற்றும் பெண் மருத்துவத்திற்காக தங்கள் வாழ்க்கையையே தியாகம் செய்த ஐந்து பெண்களைப் பத்தினது.நான் பண்ண ஆரம்பிக்கிறப்ப அந்த ஐந்து தேவதைகள்ல நான்கு பேர் இறந்திட்டாங்க. ஒருவர் மட்டுமே உயிருடன் இருந்தார். அவர்தான் மருத்துவர் ஆலிஸ் ஜி பிராயர்.