‘இந்த ஊர் என்ன விலைனு கேளு... இந்தத் தெரு என்ன விலைனு கேளு...’ என ஒரு திரைப்படத்தில் கவுண்டமணி, செந்திலிடம் கேட்பார். ஏனெனில், அவருக்கு லாட்டரி டிக்கெட்டில் 15 லட்சம் ரூபாய் பணம் விழுந்திருக்கும். 

இதனால், சந்தோஷத்தில் அவரின் சவரப்பெட்டியைப் பிடுங்கி ஆற்றிலேயே வீசிவிடுவார் செந்தில். பின்னர், வீட்டிற்கு வந்து அந்த லாட்டரி டிக்கெட் எங்கே என மனைவியிடம் கேட்பார் கவுண்டமணி.அவரும் எங்கோ மறந்து வைத்துவிட்டதாகக் கூறி வீடு முழுவதும் தேடுவார். பிறகு, நினைவு வந்தவராக அதனை சவரப்பெட்டிக்குள் வைத்திருப்பதாகச் சொல்வார்.

இதனைக் கேட்டு ஆடிப்போய்விடுவார் கவுண்டமணி. இப்பதானே இவன் அதை ஆற்றில் தூக்கி எறிஞ்சான் என்பார். ஏறக்குறைய அப்படியொரு கதைதான் இதுவும். ஆனால், சவரப்பெட்டியை ஆற்றில் வீசியெறிந்த செந்தில் போல இந்தக் கதையில் இருப்பது சம்பந்தப்பட்ட நபரின் முன்னாள் மனைவி. 

அதுமட்டுமல்ல. இங்கே சவரப்பெட்டிக்குப் பதில் ஹார்டு டிஸ்க். லாட்டரி டிக்கெட்டிற்கு பதில், அதற்குள் இருக்கும் பிட்காயின்கள். அவ்வளவுதான் வித்தியாசம். சரி; கதைக்குள் வருவோம். இங்கிலாந்து அருகிலுள்ள வேல்ஸ் நாட்டின் நியூபோர்ட் நகரத்தைச் சேர்ந்தவர் ஜேம்ஸ் ஹோவெல்ஸ். ஐடி எஞ்சினியரான இவர் கடந்த 2008ம் ஆண்டு டிசம்பர் மாதம் பிட்காயின் எனும் கிரிப்டோகரன்சியை வாங்கினார். அன்று பிட்காயின் பற்றி உலகத்தில் யாருக்கும்

பிட்காயின் என்பது கிரிப்டோகரன்சி அல்லது வெர்ச்சுவல் எனும் மெய்நிகர் நாணயம் அல்லது டிஜிட்டல் நாணயம் ஆகும். இது முற்றிலும் நாம் கையில் பயன்படுத்தும் நாணயங்கள் அல்லது ரூபாய் தாள்கள் போல் அல்லாமல் மெய்நிகர் நாணயமாக இருக்கும். கண்ணில் பார்க்கமுடியாத டிஜிட்டல் கரன்சி.

இந்த பிட்காயின் கரன்சியை அப்போதே உலக அளவில் வைத்திருந்த ஐந்து பேரில் ஜேம்ஸ் ஹோவெல்ஸும் ஒருவர். இவர் 2009ம் ஆண்டு தன் லேப்டாப்பில் இந்தக் காயின்களை ஒரு செயல்முறை மூலம் சேகரித்திருந்தார். அப்படியாக அவர் ஒருகட்டத்தில் 8 ஆயிரம் பிட்காயின்களை வைத்திருந்தார். ஆனால், அப்போது அதற்கு பெரிய அளவில் மதிப்பு இல்லை.

முதல்முறையாக இந்த பிட்காயின் கரன்சி 2010ம் ஆண்டுதான் நிஜ உலகிற்குள்ளேயே பரிவர்த்தனை ஆனது. அதாவது ஃப்ளோரிடாவைச் சேர்ந்த ஒருவர் அப்போது 10 ஆயிரம் பிட்காயின்களுக்கு இரண்டு பீட்சாக்களை வாங்கினார் என்றால் பார்த்துக் கொள்ளுங்கள்.  

இன்று பொருட்கள் வாங்கவும், சில சேவைகளைப் பெறவும் பிட்காயின்களை பயன்படுத்த

முடியும். இருந்தும் பல கடைகள் பிட்காயினை ஏற்றுக்கொள்வதில்லை. பல நாடுகளும் இந்தக் கரன்சிக்குத் தடை விதித்துள்ளன. 

ஆயினும் கடந்த பதினைந்து ஆண்டுகளில் இந்த பிட்காயின் கரன்சியின் மதிப்பு அதிக அளவில் உயர்ந்தது. கடந்த டிசம்பரில் ஒரு பிட்காயினின் மதிப்பு ஒரு லட்சம் அமெரிக்க டாலரைக் கடந்தது. அதாவது இன்றைய இந்திய மதிப்பிற்கு ஒரு பிட்காயின் என்பது 87 லட்சம் ரூபாய் ஆகும்.

இப்படி பார்க்கிறபோது இன்றைய மதிப்புப்படி அன்று இரண்டு பீட்சாக்களை ஒரு பில்லியன் அமெரிக்க டாலர்களுக்கு வாங்கியுள்ளனர். அதாவது இன்றைய மதிப்புப்படி சுமார் 8,700 கோடி ரூபாய்க்கு அன்று இரண்டு பீட்சாக்கள் வாங்கப்பட்டுள்ளன. 

இதுஒருபுறம் இருக்க, 2013ம் ஆண்டு ஹோவெல்ஸ் தன்னுடைய வீட்டைச் சுத்தப்படுத்தும்போது பிட்காயின் சேகரித்து வைத்திருந்த ஹார்டு டிஸ்க்கை மறந்துபோய், எந்த டேட்டாவும் இல்லையென நினைத்து குப்பைப் பையில் போட்டுவிட்டார். அவரின் முன்னாள் மனைவியோ அதனை குப்பைக் கிடங்கிற்கு அனுப்பிவிட்டார்.

இந்நிலையில் பிட்காயினின் மதிப்பு கூடுவதை அறிந்த ஜேம்ஸ் அந்த ஹார்டு டிஸ்க்கை தேடியுள்ளார். அப்போதுதான் அதனை குப்பைப் பையில் போட்டது ஞாபகத்திற்கு வந்துள்ளது. உடனே பதறிப்போய் தேடியுள்ளார். 

அது நியூபோர்ட் நகரத்தின் டாக்ஸ்வே குப்பைக் கிடங்கிற்குச் சென்றது தெரிந்தது.இந்நிலையில் 2013ம் ஆண்டில் ஜேம்ஸ், நியூபோர்ட் நகர சபையிடம் முறையிட்டார். அப்போதிலிருந்து அவர் பலமுறை நகரசபையிடம் அந்த ஹார்டு டிஸ்க்கை மீட்டெடுப்பதற்கான சாத்தியக்கூறுகள் பற்றி கேட்டு வந்தார். அந்தக் குப்பைக் கிடங்கை தோண்டிப் பார்ப்பதற்கு அனுமதி அளிக்கும்படியும் வேண்டினார்.

இந்நிலையில் 2021ம் ஆண்டின்போது, தோண்ட அனுமதி அளித்தால் 70 மில்லியன் டாலர் நகரசபைக்கு தருவதாகக் கூறினார் ஜேம்ஸ். இது இந்திய மதிப்பில் சுமார் 500 கோடி ரூபாய். ஆனால், அப்போதும் நகர சபை மறுத்தது. 

இதற்கிடையே தோண்டுவதற்கு அனுமதி அளிக்கும்படி கோர்ட் படியேறினார். கோர்ட்டும் சமீபத்தில் அவரின் வழக்கை டிஸ்மிஸ் செய்தது. இந்நிலையில்தான் அந்தக் குப்பைக் கிடங்கையே விலைக்கு வாங்கப் பரிசீலித்து வருவதாக எக்ஸ் தளத்தில் ஜேம்ஸ் பதிவிட்டார். இது அங்கு பரபரப்பை ஏற்படுத்தியுள்ளது.