அவுரங்காபாத் ரசகுல்லா!
இதழ்கள் வசனம் பேசும் முன்பே கண்கள் முந்திக்கொண்டு ஆயிரம் வார்த்தைகளையும், உணர்வுகளையும் கொட்டுகின்றன. அவ்வளவு தத்ரூபமான நடிப்பு, கருப்பு வெள்ளையிலும் வசீகரிக்கும் அழகு. ‘காந்தா’ படத்தில் ‘குமாரி’ கதாபாத்திரத்தில் மனதைத் தொட்டிருக்கிறார் பாக்யஸ்ரீ போர்ஸ். இந்த காந்தக் கண்ணழகி தமிழில் பேசினாலே புரிந்து பதில் சொல்கிறார்.
ஆறு மாதங்கள் தமிழ் பயிற்சி... பயன் கொடுத்ததா?
 கொஞ்சம் கஷ்டம்தான். ஆனால், இப்போ நல்லா தமிழ் புரியுது. நீங்க கேள்வி கூட தமிழிலேயே கேட்கலாம். இந்தக் கதைக்கு அதன் மொழி முழுமையாக தெரியலைன்னா கூட ஓகே, ஆனால், புரிஞ்சு நடிக்கணும். அப்போதான் குமாரி கதாபாத்திரத்துக்கு நான் செய்கிற நியாயமா இருக்கும். கதைப்படி குமாரி நிறைய உணர்வுகளை வசனமே இல்லாமல் திரையில் வெளிப்படுத்தணும். அப்போ மொழி தெரிஞ்சாதான் அந்த உணர்வு உண்மையா வெளிப்படும். அதனால் பயிற்சி எடுத்துக்கிட்டேன். நிச்சயம் அடுத்த படத்தில் என்னுடைய சொந்தக் குரலில் டப்பிங் பேசி நடிக்கற அளவுக்கு முன்னேறிடுவேன்.
நம்பர் ஒன் கேம்களில் நம்பிக்கை இருக்கிறதா?
கதைதான் நமக்கு எந்த இடம் என்கிறதை தீர்மானிக்குது. அதனால் நாம எந்த இடத்துக்கும் கண்மூடித்தனமா ஆசைப்படக் கூடாது. கதைதான் ஹீரோ, ஹீரோயின்... அதுதான் நம்பர் ஒன்னும் கூட.ஆக, நல்ல கதைல தொடர்ந்து நாம நடிச்சா... நல்ல கதைகள்ல நாம இருந்தா... நல்ல நல்லகதைகள் நம்மைத் தேடி வந்தா... மே பி அது நம்பர் ஒன் ஹீரோயின் என்ற இடத்துக்கு கொண்டு போகும். இதை நான் உறுதியா நம்பறேன்.
அந்த ஒரு பளார்... உண்மையாகவே அடித்தீர்களா?
ஆமா, அது உண்மையான அறைதான். அந்தக் காட்சிப்படி நான் துல்கரை ஓங்கி ஓர் அறை வைக்கணும். அந்த சீன் அடிப்படையே அதுதான். ஆனா, அந்தக் காட்சில நான் அவரை அறையப் போவதே அவருக்குத் தெரியாது! இப்படி இருந்தாதான் உண்மையாகவே அந்த உணர்வு துல்கர் கிட்ட வெளிப்படும்னு இயக்குநர் நினைச்சார். அதனால என்கிட்ட உண்மையாகவே அறையச் சொல்லி சொன்னார்.
ஆரம்பத்தில் சீன் சொல்லும் போது ரொம்பத் தயங்கினேன். ஆனால், வேறு வழி இல்லை என்கிறதை துல்கரே எனக்குப் புரிய வைத்தார். திரையில் அவருக்கு, தான் உண்மையாக நடிக்கணும் என்கிற விருப்பம் இருந்துச்சு.
அதை பல காட்சிகள் எடுக்கும்போது சொல்லியிருக்கார்.ஸோ, இந்தக் காட்சிக்கான தன்மை அவருக்குப் புரிஞ்சதும், ‘தயங்காம... யோசிக்காம என்னை அறைங்க’னு சொன்னார். ஒண்ணு ரெண்டு டேக் கூட போனது. நிஜமாகவே கஷ்டமா இருந்தது. ஆனா, துல்கர் அதை சந்தோஷமாதான் எடுத்துக்கிட்டார். உண்மையாகவே அவர் ‘நடிப்புச் சக்கரவர்த்தி’தான்.
துல்கர் சல்மான், ராணா, சமுத்திரக்கனி... இந்தக் கூட்டணிக்குள் நடிப்பது சவாலா இருந்ததா?
இதென்ன கேள்வி... நிச்சயம் சவாலான நடிப்புதான். ஆனா, நீங்களே சொன்னது போல் கூட்டணி இது. இங்கே ‘நீ பெருசா நான் பெருசா’ என்கிற போட்டியாக இல்லாம, ஒருவர் கேரக்டர் இன்னொருவர் கேரக்டரை மிகைப்படுத்திக் காட்டணும். அப்படிதான் படத்தின் மொத்தக் கதாபாத்திரங்களும் ‘குமாரி’ கதாபாத்திரத்தை ஹைலைட் செய்கிற மாதிரி நடிச்சாங்க.
நானும் அதற்கு ஈடு கொடுத்தேன். முதல் படமே இப்படி அமைஞ்சதை மிகப்பெரிய ஆசீர்வாதமாக பார்க்கறேன். இந்தப் படம் கைக்கு வரும்போது நான் வெறும் பாக்ய போர்ஸ். என்னை நம்பி இவ்வளவு பெரிய கதாபாத்திரம் கொடுத்த டீமுக்கும் இயக்குநர் செல்வமணி செல்வராஜுக்கும் நன்றி.
நடிப்பு இல்லை என்றால் என்னவாக இருந்திருப்பீங்க?
நான் அவுரங்காபாத், மகாராஷ்டிராவில் ஒரு சின்ன டவுனில் பிறந்த பொண்ணு. எந்த எதிர்காலத் திட்டமும் சீரியசாக இல்ல. மேலும் ஒரு ஏழு வருஷங்கள் நான் அப்பா வேலை காரணமா நைஜீரியாவில் இருந்தேன்.
ஸ்கூல் வாழ்க்கை பாதி அங்கேதான். தொடர்ந்து மும்பையில் பிஸினஸ் மேனேஜ்மெண்ட் படிப்பு முடிச்சேன். படிப்பு முடிச்சிட்டு ஒரு தனியார் கம்பெனியில் வேலை. இதுதான் அதிகபட்ச திட்டம்.ஆனால், திடீர்ன்னு மாடலிங் என் வாழ்க்கையிலே குறுக்கிட்டது. அதைத் தொடர்ந்து ‘காந்தா’ படம். அந்தப் படம் ஒரு நாலு வருஷக் காத்திருப்பு.
இடையிலேயே ‘யாரியான் 2’, ‘சந்து சாம்பியன்’ படங்களில் குட்டி ரோல்கள். ரவி தேஜா சார் கூட ‘Mr. பச்சன்’ படம்தான் எனக்கு கமர்ஷியலாக முதல் படமாக வெளியானது.
தொடர்ந்து விஜய் தேவரகொண்டா கூட ‘கிங்டம்’. இதை எல்லாம் தாண்டி வெளியானது ‘காந்தா’. உண்மையில் நான் அறிமுகமானது தமிழில்தான், ‘காந்தா’தான் நான் கதாநாயகியாக ஒப்புக்கொண்ட முதல் படம்.
சினிமாவில் என்னவாக இருக்க வேண்டும் என ஆசை?
இந்தக் காலத்திலும், அதாவது எதையும் கொஞ்சம் அதிகமாகக் கொடுத்தாலும் ஓவர்டோஸ் எனச் சொல்லிவிடும் காலம். ஆனால், இப்பவும் ஸ்ரீதேவி மேடம் ஸ்பெஷல். அவங்க மாதிரி ஒரு நல்ல நடிகையாக, எந்த கதாபாத்திரத்தையும் எதார்த்தமாக நடிக்கணும்ன்னு நினைக்கிறேன்.
குறிப்பாக இந்த ‘காந்தா’ படக் கதைக்காக நான் அதிகம் நடிகை மதுபாலா (1942 - 1964 கால இந்தி நடிகை) மேடம் வீடியோக்கள் பார்த்தேன். அவங்க குமாரி கேரக்டர் மாதிரி எதிர்பாராமல் இறந்தவங்கதான். இந்தக் கதைக்கு என்னுடைய இன்ஸ்பிரேஷன் மதுபாலா மேடம். கூடவே சாவித்திரி மேடம் லுக் , அவங்க நடிப்பையும் கூட நிறைய பாடமாக எடுத்துக்கிட்டேன்.
நெக்ஸ்ட்?
தெலுங்கில் ராம் பொத்தினேனி ஹீரோவாக நடிக்கற ‘ஆந்திரா கிங் தாலுகா’. அந்தப் படமும் ஒரு பீரியட் படம்தான். தொடர்ந்து அகில் அக்கினேனி ஜோடியாக ‘லெனின்’ படம். இந்தியில் அக்ஷய் குமாருடன் ‘கில்லாடி ஆஃப் ஹெல்’ படத்திலும் நடிச்சிருக்கேன்.
ஷாலினி நியூட்டன்
|