கோவை மற்றும் மதுரை மெட்ரோ ரயில் திட்டத்துக்கான வரைவை, தமிழக அரசு 2023ல் ஒன்றிய அரசிடம் அனுமதிக்காக வழங்கியது. வெகு விரைவில் அதற்கான அனுமதி கிடைத்துவிடும் என இந்த இருமாவட்ட மக்களும் ஆவலுடன் எதிர்பார்த்துக் கொண்டிருந்தார்கள். 

ஆனால், இந்த இரு திட்டத்துக்கும் அனுமதி இல்லை என ஒன்றிய அரசு கடந்தவாரம் கைகழுவியது. காரணம், மெட்ரோ ரயில் திட்டத்துக்கான அரசின் கொள்கைப்படி இந்த இரு நகரங்களிலும் போதுமான மக்கள்தொகை இல்லை என்பது.

மெட்ரோ ரயில் பாலிசி என்பது 2017ல் ஒன்றிய அரசால் இயற்றப்பட்டது. அந்த பாலிசிபடி ஒரு நகரத்தில் மெட்ரோ ரயில் வரவேண்டுமென்றால் அந்த நகரத்தில் குறைந்தது 20 லட்சம் பேராவது இருக்கவேண்டும். 

ஆனால், கோவையில் 15 லட்சத்து 84 ஆயிரம் பேரும், மதுரையில் 15 லட்சம் பேரும் 2011ம் ஆண்டு மக்கள்தொகை கணக்கெடுப்பின்படி இருப்பதால் இந்த திட்டத்துக்கு அனுமதி இல்லை என ஒன்றிய அரசின் நகர அபிவிருத்தி அமைச்சகம் அனுமதி மறுத்திருக்கிறது. 

‘‘ஒன்றிய அரசு தமிழகத்துக்கு எத்தனையோ வஞ்சகம் செய்திருக்கிறது. அந்தவகையில் இது மற்றுமொரு வஞ்சகம் என்றுதான் சொல்லத்தோன்றுகிறது. கோவை, மதுரை மெட்ரோ ரயில் திட்டங்களை 2011ம் ஆண்டு சென்சஸ்படி நிராகரித்திருப்பது தர்க்கத்துக்கு முரணானது.

ஜெய்ப்பூருக்கு மெட்ரோ இருக்கிறது. ஜெய்ப்பூர் என்பது மதுரையைவிட ஒரு சிறிய நகரம். பாட்னாவுக்கு அனுமதி கொடுத்திருக்கிறார்கள். பாட்னா, பீகாரில் இருக்கிறது. பீகார் தயவில் மத்தியில் ஆட்சி இருப்பதால் அம்மாநிலத்துக்கு சட்டத்துக்குப் புறம்பாக எல்லாமும் செய்கிறார்கள். 

இதுபோலத்தான் மத்தியப்பிரதேசத்தின் போபாலுக்கும் மெட்ரோ அனுமதி கிடைத்திருக்கிறது. உத்திரப்பிரதேச ஆக்ராவுக்கு ஏற்கனவே அனுமதி வழங்கப்பட்டு மெட்ரோ ஓடுகிறது. 

சட்டப்படி பார்த்தால்... அதாவது மதுரை, கோவைக்கு மெட்ரோ இல்லை என்று சொல்வதற்காக பாஜக தலைமையிலான ஒன்றிய அரசு கூறியுள்ள காரணங்கள் அனைத்தும் இதுவரை மெட்ரோவுக்கு அனுமதிக்கப்பட்ட நகரங்களுக்கு பொருந்தும்.

ஆனாலும் இந்த நகரங்களுக்கு அனுமதியும் நிதியும் கிடைத்திருக்கிறது...’’ எனச் சொல்லும் இளங்கோவன், கோவை மற்றும் மதுரைக்கு ஏன் மெட்ரோ அவசியம் எனவும் கூறினார்.‘‘இந்தியாவின் எல்லா நகரங்களிலுமே 2030ம் ஆண்டுக்குள் சுமார் 40 சதவீத மக்கள்தொகை பெருக்கம் இருக்கும். கோவையில்கூட இன்று மக்கள்தொகை சுமார் 30 லட்சத்துக்கும் மேலிருக்கும் என்கிறார்கள். 

‘‘தமிழ்நாடு மற்ற ரயில்களுக்கான 9 புதிய பாதைகளை அமைக்க ஒன்றிய அரசிடம் நிதி கேட்டிருந்தது. இதற்கு ஒவ்வொரு பாதைக்கும் வெறும் 1000 ரூபாயை ஒன்றிய அரசு ஒதுக்கியிருக்கிறது. பாஜக ஆளும் மாநிலங்கள் என்றால் 10 ஆயிரம் கோடி 15 ஆயிரம் கோடி என ஒதுக்குகிறார்கள்.

இது மட்டுமல்லாமல் பல மெட்ரோ ரயில் திட்டங்களை கான்ட்ராக்டில் விட்டிருக்கிறார்கள். கான்ட்ராக்ட் என்றால் ஊழியர்கள் யூனியன் அமைக்க முடியாது. சம்பளம் பற்றி கேட்க முடியாது. கொடுப்பதை வாங்கிக் கொள்ள வேண்டும். கொடுப்பதை நிறுத்தினாலும் ஏற்க வேண்டும். கொடுப்பதைக் குறைத்தாலும் பெற்றுக் கொள்ளவேண்டும்.

போராட முடியாது; போராடக் கூடாது. இவையெல்லாம் இளைஞர்களின் வேலை வாய்ப்பில் மண்ணைப் போடும் செயல். கான்ட்ராக்ட் எனும்போது இட ஒதுக்கீடு எல்லாம் இருக்காது. மொத்தத்தில் ஒன்றிய அரசிடம் நிதி கேட்டால் கிடையாது. மாநில அரசு கடன் வாங்குவதிலும் கட்டுப்பாடு. 

இத்தோடு திட்டங்களுக்கும் கேட் போடுகிறார்கள் என்றால் அது வஞ்சகமல்லாமல் வேறு என்ன? நிச்சயம் இது தமிழகத்தை பழிவாங்கும் செயல். திட்டமிட்டே தமிழ்நாட்டை ஒன்றிய பாஜக அரசு நசுக்கப் பார்க்கிறது என எதிர்க்கட்சிகள் குறிப்பிடுவதற்கு இந்த மறுப்பும் வலுவான காரணம் சேர்க்கிறது...’’ அழுத்தமாகச் சொல்கிறார் இளங்கோவன்.

ரூ.10,740 கோடி திட்டம். 39 கிலோ மீட் டர் தூரமுடையது. 32 ஸ்டேஷன்கள். 2 லைன்கள். உக்கடம் பஸ் ஸ்டேண்ட், கோவை ஜங்ஷன், ராம் நகர், காந்திபுரம் பஸ் ஸ்டேண்ட், சரவணம்பட்டி, கோவை மெடிக்கல் காலேஜ் மற்றும் கோவை ஏர்போர்ட் போன்ற முக்கிய இடங்களை இந்த மெட்ரோ அமல்படுத்தப்பட்டால் இணைக்கும்.