‘‘பனை மரம் கள்ளுக்கான மரம் மட்டுமில்ல; நிலத்தடி நீர் அதிகரிப்பிலும், மண் அரிப்பைத் தடுப்பதிலும், மழைநீர் சேகரிப்பிலும் முக்கிய பங்கு பனை மரத்திற்கு இருக்கு...’’ பனை விதைகளை விதைத்தபடியே உற்சாகமாகப் பேசுகிறார், ‘கிரீன் நீடா’ மு.ராஜவேலு. 

ஆண்டுக்கு ஒரு கோடி பனை விதைகள் நடுவது என்கிற திட்டத்தை கடந்த மூன்று ஆண்டுகளாக முன்னெடுத்து வரும் ஆச்சரிய அரசுப் பணியாளர் இவர். இந்தப் பணியை இவரின், ‘கிரீன் நீடா’ அமைப்பின் மூலமாக தன்னார்வலர்கள் மற்றும் பள்ளி, கல்லூரி மாணவர்களைக் கொண்டு அத்தனை சிரத்தையுடன் செய்து வருகிறார். 

‘‘சொந்த ஊர் நீடாமங்கலம். சென்னையில் தமிழ்நாடு நுகர்பொருள் வாணிபக் கழகத்தில் வேலை பார்க்கறேன். ஏழு ஆண்டுகளுக்கு முன்னாடி குறுங்காடுகள் வளர்க்கும் திட்டத்துடன் எங்க பணி ஆரம்பிச்சது. எங்களின் முதல் நோக்கம் மரம் வளர்ப்போம் என்பதுதான். 

இதுக்கிடையில் நம்மாழ்வார் அய்யாவின் ஒரு புத்தகத்தைப் படிச்சேன்.அதில் அவர், ‘ஒரு கிணத்தைச் சுத்தி பத்து பனை மரங்களை நட்டு வச்சால், எப்போதும் அந்தக் கிணத்தில் தண்ணீர் வற்றாது’னு சொல்லியிருந்தார். அப்போதான் எனக்கு பனை மரத்தின் பயன்கள் புரிஞ்சது. பனை மரத்தைப் பத்தி நிறைய படிச்சேன்.  

இதற்குக் காரணம் அதன் சல்லி வேர்களின் அமைப்புதான். அப்புறம், பனை மரத்தில் எந்த ஹைபிரிட்டும் கிடையாது. இது தமிழர்களின் வாழ்வியலுடன் ஒன்றிய மரம். தமிழ் இலக்கியம் எல்லாம் நமக்குக் கிடைக்க பனைதான் காரணம். அதன் ஓலையில்தான் பெரும்பாலான விஷயங்கள் கிடைச்சது. 

அப்புறம் மக்கள் வசிக்கக்கூடிய இடத்துலதான் பனைமரமே இருக்கும். பொதுவா, பறவைகளின் எச்சத்தில் விதைகள் முளைச்சு மரமாகும்னு படிச்சிருப்போம். ஆனா, பனைமரத்தைப் பொறுத்தவரை அதன் விதையை மனிதர்கள் எடுத்துக்கொண்டு போய் இன்னொரு இடத்துல விதைச்சால் மட்டுமே முளைச்சு வளரும். 

சிலர் 500 விதைகள்கூட சேகரிச்சாங்க. நீடாமங்கலம் ஊராட்சி ஒன்றியத்துல தென்கரவயல்னு ஒரு பள்ளி இருக்கு. அங்க 150 பிள்ளைகள்தான் படிக்கிறாங்க. அந்த பள்ளி மட்டுமே 8,500 பனை விதைகள் சேகரிச்சுக் கொடுத்தாங்க. இப்படி மாணவர்கள் மூலம் மட்டுமே சுமார் 5 லட்சம் பனை விதைகள் கிடைச்சது. 

இந்தாண்டு எங்களின் ஒரு கோடி பனை விதைகள் நடும் பணியை டெல்டா மாவட்டத்துல தொழிற்துறை அமைச்சர் டி.ஆர்.பி.ராஜா தொடங்கி வச்சார். அப்புறம், நாங்க சேகரிச்ச பனை விதைகளைத் தஞ்சாவூர் தமிழ்ப் பல்கலைக்கழகம், திருச்சி பாரதிதாசன் பல்கலைக்கழகம், பிற கல்லூரிகளின் வளாகங்கள், அறநிலையத் துறைக்குச் சொந்தமான பகுதி, கடற்கரைப் பகுதிகள்னு பல இடங்கள்ல விதைச்சோம்.  

இப்போ, ஊட்டி பக்கம் மலைச்சரிவைத் தடுக்க பனைவிதைகளை விதைச்சு சோதனை செய்து பார்க்கலாம்னு நினைச்சோம். ஆனா, குளிர் பகுதியில் வளராது. அதுமட்டுமில்லாமல் இயல்பான தாவரங்கள் அழிஞ்சிடும்னு சொல்றாங்க.  ஆனா, காட்டு விலங்குகள் நம் குடியிருப்பு நோக்கி வராமல் தடுக்க இதனை தடுப்பு அரணாகப் பயன்படுத்தலாம்.

இப்போ, வரிசையாக பனை மரத்தை நட்டோம்னா யானையால் உள்ளே வரமுடியாது. அது மின்சார வேலியைக் கூட தாண்டி வந்திடும். இந்தப் பனை மர வேலியை உடைச்சிட்டு நுழைய முடியாது. அதுகுறித்து பேசிட்டு இருக்கோம்...’’ என்கிற மு.ராஜவேலு, எதிர்காலத்தில் பனை பொருளாதாரத்தை பெரிய அளவில் கொண்டுபோக வேண்டும் என்கிறார்.