சாப்பாட்டுக்கு பணம் கொடுத்தா சினிமா டிக்கெட் இலவசம்!
மொழிக்கு ஐந்து படங்கள் வீதம் குறைந்தபட்சம் ஒரு வாரத்திற்கு சுமார் 20க்கும் மேற்பட்ட திரைப்படங்கள் வெளியாகின்றன. ஆனால், நல்ல கதை, கமர்சியல், நடிகர்கள் அடிப்படையில்தான் படத்தின் வெற்றி மற்றும் மக்களின் வருகை அமைகிறது. எனில் மற்ற படங்களை எப்படி ஓடவைப்பது, மக்களை எப்படி திரையரங்கம் நோக்கி வரவழைப்பது?
 இந்தக் கேள்விகள் எல்லா தயாரிப்பாளர்களிடமும், எல்லா விநியோகஸ்தர்களிடமும் இருக்கின்றன. அதற்குத்தான் இந்தியாவின் சில மெட்ரோ நகரங்கள் ஒரு புது ஆலோசனையுடன் சினிமா பார்க்கும் ஆர்வத்தை அதிகரித்து வருகின்றன. மும்பை, தில்லி, பெங்களூரு, ஹைதராபாத், கோவா, சண்டிகர் மற்றும் டேராடூன் உள்ளிட்ட பகுதிகளில் உள்ள மல்டிபிளக்ஸ் திரையரங்குகளில் ‘உயர்தர உணவுடன் சினிமா அனுபவம்’ - அதாவது ஒருவர் ரூ.3000 கொடுத்து டிக்கெட் வாங்கினால் அதனுடன் ஃபைவ் ஸ்டார் ஹோட்டல் உணவு சேர்த்து பரிமாறப்படும்.
பொதுவாக மக்கள் உணவு மற்றும் உடை ஆகிய இரண்டுக்கும் தயங்காமல் செலவு செய்வார்கள். அதனால்தான் எங்கே உணவு எக்ஸிபிஷன் என்றாலும் அல்லது உணவு திருவிழாக்கள் என்றாலும் அங்கே கூட்டம் அலைமோதுகிறது. எவ்வளவு சாப்பிட்டாலும் புதிது புதிதாக ஏதாவது சாப்பிட வேண்டும் என்கிற எண்ணம் மக்கள் மனதில் இருந்து கொண்டே இருக்கும்.
அதனால்தான் தேசிய மற்றும் மாநில அரசுகள் அமைக்கும் பூங்காக்கள், வாக்கிங் பார்க், பொழுதுபோக்கு விளையாட்டுத் திடல்கள், புத்தக வாசிப்பு மாலை நேரங்கள் இப்படி எதை ஆரம்பித்தாலும் அதனுடன் ஒரு சிற்றுண்டி அல்லது உணவு கடைகளை அடிப்படையாகக் கொண்ட பொது இடங்களாக அமைக்கின்றனர்.
காரணம், குடும்பமாக வெளியே வரும் மக்கள் முதலில் யோசிப்பது சாப்பாட்டிற்கு என்ன செய்வது என்பதைத்தான். இதைப் பல வருடங்களாகவே சினிமா திரையரங்கங்கள் கடைப்பிடிக்கவில்லை.
மாறாக , ரூ.350 க்கு காபி, ரூ.290 க்கு பாப்கார்ன் என நடுத்தர வர்க்கத்தை திரையரங்கம் நோக்கி வரவிடாமல் செய்து கொண்டிருந்தார்கள். இப்போதும் இந்த உணவுடன் கூடிய சினிமா அனுபவம் அதிக விலை என்றாலும், எவ்வளவு செலவானாலும் உணவுக்கு நம் மக்கள் யோசிக்க மாட்டார்கள் என்ற உளவியலை பயன்படுத்துகின்றனர்.
அத்துடன் ஒரு சில இடங்களில்தான் இந்த உணவுடன் கூடிய டிக்கெட் விலை ரூபாய் 3000. பல இடங்களில் குறிப்பாக சென்னை உள்ளிட்ட பகுதிகளில் உள்ள சில மல்டிபிளக்ஸ் திரையரங்குகளில் ரூபாய் 200க்கு டிக்கெட் வாங்கினால் வார நாட்களில் அதனுடன் ஒரு பீட்சா கொடுக்கப்படுகின்றது.அதைப்போல் வார நாட்களில் காலை 11 மணி முதல் மாலை 4 மணி வரை படம் பார்ப்பவர்களுக்கு திரும்ப நிரப்பிக் கொள்ளும் பாப்கார்ன் வழங்கப்படுகின்றது.
அதாவது ரூபாய் 600 க்கு பாப்கார்ன் வாங்கினால் எத்தனை முறை வேண்டுமானாலும் பாப்கார்ன் தீர்ந்தவுடன் நிரப்பிக் கொள்ளலாம். ஒரு ஐந்து நண்பர்கள் அல்லது ஒரு குடும்பமாக செல்லும்பொழுது இந்த பாப்கார்ன் கான்செப்ட் மிகவும் பயனுள்ள ஸ்நாக்ஸ் கான்செப்டாக இருக்கும்.பெங்களூரு இசிட்டி மால் மல்டிபிளக்ஸ் திரையரங்குகளில் டிக்கெட்டுக்கு பணம் கிடையாது. உணவுக்கு மட்டும் பணம் கொடுத்தால் போதும் என ஒரு குறிப்பிட்ட தொகையில் மதிய உணவு அல்லது இரவு உணவுக்கு நிர்ணயித்து சினிமா டிக்கெட்டுகளை இலவசமாகக் கொடுக்கின்றனர்.
இதற்கு விலையாக ரூ.600 முதல் ரூ.1000 வரை பெறப்படுகிறது. இதில் முதன்மை தீம் உணவுதான். நாம் பார்க்க வேண்டிய சினிமா நேரத்தில் என்ன உணவு வேண்டும் என்பதை கொடுக்கப்பட்ட உணவுப் பட்டியல் அடிப்படையில் தேர்வு செய்தால், அந்த சினிமாவுக்கான டிக்கெட் இலவசமாக வந்துவிடும். ஆர்டர் செய்த உணவும் படம் பார்த்துக் கொண்டிருக்கும் பொழுது நமது இருக்கைக்கே வந்துவிடும்.
‘‘இன்று படம் நன்றாக இருந்தால் கூட பார்வையாளர்களை திரையரங்கம் நோக்கி வரவழைப்பது கடினமான சூழல். குறிப்பாக ஓடிடி வருகை திரையரங்கம் செல்லும் பழக்கத்தை வெகுவாகவே குறைத்து விட்டது. மிகப்பெரிய பிளாக்பஸ்டர் திரைப்படம் அல்லது மிகவும் நல்ல படம் என்றால்தான் மக்கள் திரையரங்கம் செல்ல வேண்டும் என்று நினைக்கிறார்கள்.
ஆக, அவர்களுக்கு சினிமாவைத் தாண்டி வேறு ஏதோ ஒரு சந்தோஷம் தேவைப்படுகிறது. இதை உணவால் பூர்த்தி செய்ய முடியும். உணவு வழங்க ஆரம்பித்த பின் தியேட்டருக்கு கூட்டம் வருவதே இதற்கு சாட்சி...’’ என்கிறார்கள் மல்டி ப்ளக்ஸ் திரையரங்க அதிகாரிகள்.
தற்சமயம் பீட்சா, பர்கர், வேக வைத்த மோமோஸ், சாண்ட்விச், காபி போன்றவை இந்தப் பட்டியலில் கொடுக்கப்படுகின்றன. கூடியவிரைவில் உணவகங்களுடன் இணைந்து மேட்னி ஷோ எனில் மதிய உணவு, மாலை நேர ஷோ எனில் இரவு உணவு என மாற்றி அமைக்கும் திட்டமும் இருக்கிறதாம்.
உணவுடன் கலந்த பொழுதுபோக்குதான் இந்தியா போன்ற நாடுகளில் வெற்றி அடையும் என்பதற்காகவே டிஜிட்டலில் விளையாடப்படும் விளையாட்டுகளில் கூட உணவும் இணைந்து செயல்படும் புது முயற்சியை கையாண்டிருக்கிறார்கள் உலகப் புகழ் PUBG (Players Unknown Battleground) - இந்தியாவில் BGMI ( Battlegrounds Mobile India).
மிகையில்லை. பிஜிஎம்ஐ உரிமையாளர்களான கிராப்டன் இந்தியா, இந்தியாவின் முன்னணி உணவுக் குழுமமான டாகோ பெல்லுடன் இணைந்து உணவுடன் கேம் என்கிற கான்செப்டை கொண்டு வந்துள்ளனர். கேமில் விளையாடும் பொழுதே டாக்கோ பெல் உணவு சார்ந்த கூப்பன்கள் கிடைக்கும். அதனைக் கொண்டு அருகாமையில் இருக்கும் டாக்கோ பெல் உணவகங்களில் 50% தள்ளுபடியில் உணவு வாங்கிக்கொள்ளலாம்.
அதேபோல் டாக்கோ பெல் உணவு வாங்குவோர் ஒருவேளை பியூபிஜி விளையாட்டு ஆர்வலர் எனில் அவருக்கு கேம் கூப்பன்கள், டிஜிட்டல் பணம் கொடுக்கப்படும். இதற்காகவே சிறப்பு உணவு தீம் அடிப்படையில் கேமை மாற்றியமைத்திருக்கிறது கிராப்டன் குழு. பொதுவாக கண்களுக்கு வேலை கொடுக்கும்பொழுது உணவைக் கொடுத்தால் எவ்வளவு சாப்பிடுகிறோம் என்பதே தெரியாமல் சாப்பிடுவோம். அதனால்தான் நம் வீட்டில் பெரியவர்கள் டிவி பார்த்துக் கொண்டு சாப்பிடாதே என்கிறார்கள்.
ஆனால், இப்போதைய தொழில் ரகசியமே அதுதான். ஒருவர் படம் பார்த்துக் கொண்டிருக்கும் பொழுது அல்லது தன்னை மறந்து விளையாடிக் கொண்டிருக்கும் பொழுது அவர்கள் கையில் உணவைக் கொடுத்தால் அதற்கு ஆகும் செலவைப் பற்றிக் கவலையே கொள்ளாமல் சாப்பிடுவார்கள் என்பது பிசினஸ் சீக்ரெட்.அதனால்தான் இன்று பெரும் ஜவுளிக்கடைகள் கூட, தங்களின் மேல் தளத்தில் ஃபுட் கோர்ட், வாயிலில் காபி, ஸ்நாக்ஸ் கடைகளை வைத்திருக்கிறார்கள்.
கொரோனாவிற்குப் பிறகு மக்கள் விதவிதமாக சாப்பிடத்தான் அதிகம் விருப்பம் காட்டுகின்றனர். எனவேதான் எல்லாவகையான பொது இடங்களிலும் உணவு பிரதானமாக மாறியிருக்கிறது.
இதை அன்றே கணித்தவர்கள் நகைக்கடை முதலாளிகள்தான். வந்தமர்ந்தவுடன் தண்ணீர் பாட்டில், தொடர்ந்து ஜூஸ், அதைத்தாண்டி அதிக நகை வாங்குவோருக்கு ஸ்நாக்ஸ், சுண்டல், இனிப்பு... என அவர்கள் வழங்க ஆரம்பித்ததன் நீட்சியே இன்றைய இந்த கலாசாரம்.
ஆனால், ஆரோக்கியமான உணவுகள்தான் வழங்கப்படுகிறதா?
இதற்கான பதிலையே தங்கள் பிசினஸுக்கான டிரம்ப் கார்டாக பயன்படுத்துகின்றனர்.‘மூவி வித் ஹைஜீனிக் ஃபுட்ஸ்’!
ஷாலினி நியூட்டன்
|