ரெடிமேடாக பழங்களுடன் வெளிநாட்டு மரங்கள் விற்பனைக்குத் தயார்!
‘‘ஓர் உடையை ரெடிமேடாக எடுப்பதற்கும், துணி எடுத்து தைக்க கொடுப்பதற்கும் வித்தியாசம் இருப்பது மாதிரிதான் இதுவும். சின்னச் செடியில் தொடங்கி, அதை மரமாக வளர்த்து கொண்டுவர யாருக்கும் இங்கு பொறுமை இல்லை. ‘பழத்தோட எங்களுக்கு மரம் வேண்டும். இப்பவே அது எங்களுக்கு நிழல் தரணும்...’ என்பார்கள்.
பழங்களுடன் இருக்கும் மரங்களின் புகைப்படங்களை நாங்கள் எங்கள் சமூக வலைத்தளத்தில் போட்ட அடுத்த நொடியில் எந்தெந்த மரங்கள் தங்களுக்குத் தேவையென வாடிக்கையாளர்கள் உறுதி செய்துவிடுவார்கள்.பிரபல நடிகை சீதாவில் தொடங்கி, கருணாஸ், ராஜ்கிரண், அனிதா குப்புசாமி, திரைப்பட இயக்குநர்கள், சின்னத்திரை பிரபலங்கள், பிரபல அரசியல் புள்ளிகள், தொலைக்காட்சி உரிமையாளர்கள், ரியல் எஸ்டேட் தொழிலதிபர்கள் எனப் பலரும் எங்களின் ரெகுலர் வாடிக்கையாளர்கள்...’’ என்கின்றனர், கன்னியாகுமரி மாவட்டத்தில் ஜேகே நர்ஸரி நடத்திவரும் அன்பரசு-ஜெயகல்யாணி தம்பதியர்.
 “‘தம்பி, எனக்கு வயசு இப்ப எழுபது ஆகுது. இனி நான் ஒரு செடிய வச்சு... அத வளர்த்து... அதில் வரும் பழத்தை சாப்பிட்டுறுவேனா? சொல்லுங்க. காசு எனக்கு பிரச்னை இல்லை தம்பி. பழத்தோடு இருக்கும் மரமா அனுப்புங்க...’ எனக் கேட்கும் பிரபலங்களும் உண்டு...’’ எனப் புன்னகைத்தபடியே முதலில் பேச ஆரம்பித்தவர் அன்பரசு. ‘‘மலேசியன் ஆரஞ்சு, தாய்லாந்த் சிவப்பு பலா, பிரேசில் திராட்சை, அமெரிக்கன் ரெட் பால்மர் மேங்கோ, பங்களாதேஷ் க்ரீன் வாட்டர் ஆப்பிள், பிலிப்பைன்ஸ் பென்கன் லிங் மேங்கோ, கம்போடியன் ஆரஞ்சு, சீனா 3 லிச்சி பழம், ஜப்பானின் மியாசாகி மாம்பழம், தென் அமெரிக்காவின் 2 kg சப்போட்டா, பிரேசிலின் ஜபோட்டிகா பழம், நாசிக்பசந்த் மேங்கோ, வொயிட், ரெட் மல்பரி, ப்ளூபெர்ரி பழ மரங்கள், சக்கரை நோய் தீர்க்கும் மக்கோடா தேவா...
இதெல்லாம் என்னன்னு கேட்குறீங்களா? எல்லாமே வெளிநாட்டுப் பழ மரங்கள். ஆனால், நம்ம நாட்டில் காச்சு குலுங்குது...’’ என்றவாறு மேலே தொடர்ந்து பேச ஆரம்பித்தார் அன்பரசு.
‘‘எங்களிடம் 150 ரூபாயில் தொடங்கி, ஒரு லட்சம் ரூபாய் விலை கொண்ட, பிரேசில் நாட்டின் அமேசான் ரெயின் பாரஸ்ட்டில் விளைகிற ஜபோட்டிகா மரங்கள் விற்பனைக்கு உள்ளது.
ஜபோட்டிகாவை மர திராட்சை என்பார்கள். திராட்சைபழ அளவில்தான் பழம் இருக்கும். நன்றாக இனிக்கும். பழத்தை சாப்பிட்டுப் பார்த்தே மரத்தை நீங்கள் வாங்கலாம்.
ஜபோட்டிகாவில் என்னிடத்தில் 10 விதமான வெரைட்டிகள் உண்டு.
‘‘ரெயின் பாரஸ்ட் என்பது கிட்டத்தட்ட நமது நாட்டில் இருக்கின்ற தட்பவெப்ப நிலை மாதிரிதான். ஜபோட்டிகா மரம் நன்றாகக் காய்க்க சூரிய வெளிச்சம் அதிகம் வேண்டும்.
வெளிநாடுகளில் இருந்து வருகிற ஒயின், பிராந்தி, விஸ்கி அனைத்தும், ஜபோட்டிகா பழங்களில் இருந்தே தயாராகிறது என்பதால் இந்த மரத்தின் விலை அதிகம்...’’ என்கிறார் இவர்.
‘‘அதேபோல் பிரேசில் நாட்டின் ரெயின் பாரஸ்ட் பிளம்ஸ் என்கிற மரமும் ஒரு லட்ச ரூபாய். இதன் உயரம் 15 அடி இருக்கும். இதன் பழம் நாவல் பழம் அளவில் இருக்கும். ஒரு லட்சம்வரை விலை உள்ள இந்தப் பழ மரங்களை வாடிக்கையாளர்கள் கண்ணை மூடிக்கொண்டு வாங்குகிறார்கள்...’’ என்ற அன்பரசு, மேற்குறிப்பிட்ட இரண்டுமே அமேசான் காடுகளில் இருந்து கிடைக்கிற மரங்கள் என்கிறார் உறுதியாக.
‘‘அதேபோல் ஆப்பிரிக்கா நாட்டில் இருந்து வருகிற ஒரு லட்சம் ரூபாய் மதிப்புள்ள மிராக்கிள் ஃபுரூட்ஸ் மரங்களும் என் தோட்டத்தில் உள்ளது. இந்தப் பழத்தை சாப்பிட்ட பிறகு, புளிப்பாகவோ, கசப்பாகவே நீங்கள் எதை சாப்பிட்டாலும் அதன் சுவை இனிப்பாகவே இருக்கும்.மாமரத்தில் கிட்டத்தட்ட 300 வெரைட்டிகள் இருக்கு.
அதில் 150 வகையான வெளிநாட்டு ரக மரங்கள் என்னிடம் உண்டு. குறிப்பாய் R2E2, தாய்லாந்த் ரெட் பொமிலோ, தாய்லாந்தின் ஜம்போ ரெட் மாங்கோ, மியாசாகி, நாம் டாக் கோல்ட், நாம்டாக் பர்பிள், தாய் வொயிட் மாங்கோ, பிலிப்பைன்ஸ் பென்கன் லிங் என பழத்தோடு வரும் இந்த மரங்கள் 25 ஆயிரம் ரூபாய்வரை விலை போகும்.
பழத்துடன் வரும் ஜப்பான் நாட்டின் மியாசாகி மரங்கள் 75 ஆயிரம் ரூபாய்வரை விலைபோகிறது. இந்தப் பழத்தை ஜப்பானில் அழகிய நகைப்பெட்டிகளில் வைத்து, தங்கத்தை விற்பதுபோல் விற்கிறார்கள்...’’ என்றவர், தாய் கிங் மாங்கோ, புர்னோ கிங் மாங்கோ போன்றவை ஒரு பழம் மட்டுமே 4 கிலோ அளவுகளில் வரும் என்கிறார்.
‘‘R2E2 ஆஸ்திரேலியா மாங்கோ, மிகப் பெரிய ஆப்பிள் மாதிரி இருக்கும். வாழைப்பழம் மாதிரியே இருக்கின்ற தாய் நாட்டின் பனானா மாங்கோ, பாகிஸ்தானி கிரேப் மாங்கோ தவிர்த்து, பங்களாதேஷ் கோர்மெட்டி மாங்கோ, இமான்பசந்த், பங்கனபள்ளி மரங்களும் பெரிய மரங்களாக பழங்களுடன் கிடைக்கும்.
அதேபோல் தாய்லாந்த் ஜம்போ நவால், ஒரு பழம் மட்டுமே 300 கிராம் இருக்கும். பிரேசில் வெரைட்டியான செரியா பிரியோ. பெரி நாவல், வொயிட் நாவல், நாட்டு நாவல்னு 7 வெரைட்டி நாவல்கள் எங்களிடம் இருக்கிறது. சின்னதாக இருக்கும் அமெரிக்கன் ரெட் பால்மர் மரம் அமெரிக்காவில் இருந்து வருகிறது.
இந்தப் பழம் நன்றாக இனிக்கும். அதேபோல் பிரேசில் நாட்டின் லிப்போட்டின் மரம், தாய்லாந்த் பிங்க் கொய்யா, ஜப்பான் கொய்யா, பாகிஸ்தானி ஆரஞ்சு, நேபாள் ஆரஞ்சு, தென்னையில் மலேசியன் க்ரீன் கோக்கனட், மலேசியன் ஆரஞ்சு கோக்கனட், ஐஸ்க்ரீம் மாதிரி க்ரீமியாக இருக்கும் தாய்லாந்த் ஐஸ்க்ரீம் கோக்கனட் மரங்களும் எங்களிடம் கிடைக்கும்.
நமது நாட்டு முள் சீத்தா பழம் தவிர்த்து, ஆப்பிரிக்கன் முள் சீத்தா, அமெரிக்கன் முள் சீத்தா போன்றவையும் கேன்சருக்கு நல்லது. அதேபோல் இறக்குமதியாகும் நோனி மரமும் கேன்சருக்கு மருந்தாக இருக்கிறது. மக்கோடா தேவா பழம் டயபட்டீஸ் நோயாளிகளுக்கு அருமருந்து.வாடிக்கையாளர்கள் பலரும் விரும்பிக் கேட்பது வியட்நாம் பலா மரம். ஒன்றரை ஆண்டில் காய்க்கும் ஜே 33 சிங்கப்பூர் பலா ஒன்றும் எங்களிடம் உண்டு.
அதேபோல் தாய் பேரிக்காய் மரங்களும், செர்ரி, பெர்ரி, மல்பரி பழ வெரைட்டிகளும் தாய்லாந்த் நாட்டில் இருந்து வருகிறது. தாய் ஆப்பிள் பச்சை கலரில் இருக்கும். மலேசியாவில் இருந்து வருகிற கெப்பல் என்கிற ஃபெர்ஃப்யூம் ஃப்ரூட்ஸை உண்டால், உடலில் இருந்து வெளியேறும் வியர்வை நாற்றம் சுத்தமாகத் தெரியாது.பழங்களோடு மரங்களை விரும்பி வாங்குபவர்களும் இருக்கிறார்கள். 9 ஏக்கர், 10 ஏக்கர்னு பெரிய பெரிய பண்ணை வைத்திருப்பவர்கள், சின்னச் சின்ன செடிகளை வாங்கி வைத்து, பெரிதாக வளர்க்க நினைப்பார்கள்.
வாடிக்கையாளர் விருப்பம் எதுவாயினும் அவற்றை நிறைவேற்றித் தருகிறோம். கூடவே, வெளிநாட்டு மரங்கள் அவர்கள் தோட்டத்தில் வளர்வதற்கான மண்ணையும், சூழலையும் உருவாக்கி, வெயில் தேவைப்படாத மரங்களை, வெயில் படாத இடத்திலும்; சூரிய ஒளி தேவைப்படும் மரங்களுக்கு, வெயில்படும் இடங்களிலும் வைக்க அறிவுறுத்துவோம்.
பெரும்பாலும் தாய்லாந்த், ஜப்பான், ஆஸ்திரேலியா, அமெரிக்கா போன்ற நாடுகளில் இருந்து இறக்குமதி ஆகின்ற மரங்கள் நமது தட்பவெப்ப நிலைக்கு பொருந்தக்கூடியவைதான்.ஏற்கனவே 5 வருடங்கள் 10 வருடங்கள் காய்த்துக் குலுங்கிய மரங்களை மீண்டும் வேறொரு மண்ணில் கொண்டுவந்து வைக்கும்போது, வேர்கள் சேதமாகாமல் இருக்க வேண்டும்.
எனவே மரங்களை டோர் ஸ்டெப் டெலிவரி செய்வதோடு நாங்களே அவற்றைப் பிளான்டேஷன் செய்தும் கொடுக்கிறோம்.மரங்களை டோர் டெலிவரி செய்வதற்காக கர்நாடகா, தெலுங்கானா, ஹைதராபாத், கேரளா வரை எங்கள் டிரக், தோட்ட வேலைகளில் தேர்ந்த நபர்களுடன் பயணிக்கின்றது. மிக உயரமான மரங்களை ஆர்டர் செய்பவர்களுக்கு, அவற்றை பெரிய லாரிகளில் வைத்து அனுப்பி வைக்கிறோம்...’’ என புன்னகைக்கிறார்கள் அன்பரசுவும் ஜெயகல்யாணியும்.
செய்தி: மகேஸ்வரி நாகராஜன்
படங்கள்:மணிகண்டன்
|