உலகின் சிறந்த நகரங்கள்!
சமீபத்தில் உலகின் தலைசிறந்த 100 நகரங்களின் பட்டியலை வெளியிட்டிருக்கிறது, ‘ரிசோனன்ஸ்’ எனும் நிறுவனம். ரியல் எஸ்டேட், சுற்றுலா, பொருளாதார முன்னேற்றம் ஆகிய துறைகளில் இயங்கி வரும் இந்த நிறுவனம், 2026ல் எந்தெந்த நகரங்கள் சிறந்த நகரங்களாக இருக்கும் என்ற ஆய்வைச் செய்திருக்கிறது. உலகின் தலைசிறந்த நகரங்களின் பட்டியலில் தொடர்ந்து 11வது முறையாக முதலிடத்தைப் பிடித்திருக்கிறது, லண்டன். வாழ்க்கைத் தரம், மக்களின் விருப்பம், செழிப்பான தன்மை ஆகியவற்றின் அடிப்படையில் இந்தப் பட்டியலைத் தேர்வு செய்திருக்கின்றனர்.
செழிப்பான தன்மையில் முதலிடத்தையும், வாழ்க்கைத் தரத்தில் மூன்றாம் இடத்தையும், மக்கள் விருப்பத்தில் இரண்டாம் இடத்தையும் லண்டன் பிடித்திருக்கிறது. ஒட்டுமொத்த தரவரிசை அடிப்படையில் முதலிடம். தலைசிறந்த இரண்டாவது நகரம் என்ற சிறப்பைத் தன்வசமாக்கியிருக்கிறது நியூயார்க். கடந்த வருடத்துடன் ஒப்பிடும்போது ஒட்டுமொத்த தரவரிசை அடிப்படையில் ஓர் இடம் முன்னேறியிருக்கிறது நியூயார்க்.
கடந்த வருட தலைசிறந்த நகரங்களின் பட்டியலில் இரண்டாம் இடத்தில் இருந்தது, பாரீஸ். இப்போது மூன்றாம் இடத்துக்குத் தள்ளப்பட்டிருக்கிறது. நான்காம் தலைசிறந்த நகரமாகத் தேர்வாகியிருக்கிறது, டோக்கியோ. வாழ்க்கைத் தரத்திலும், மக்களின் விருப்பத்திலும் நான்காம் இடத்தையும், செழிப்பில் மூன்றாம் இடத்தையும் பிடித்து, ஒட்டுமொத்த தரவரிசை அடிப்படையில் நான்காம் இடத்தைப் பிடித்திருக்கிறது, டோக்கியோ.
மாட்ரிட், சிங்கப்பூர், ரோம், துபாய், பெர்லின், பார்சிலோனா ஆகிய நகரங்கள் அடுத்தடுத்த இடங்களைப் பிடித்துள்ளன. மட்டுமல்ல, உலகின் தலைசிறந்த 100 நகரங்களின் பட்டியலில் 4 இந்திய நகரங்களும் இடம்பிடித்துள்ளன. அதாவது, 29ம் இடத்தில் பெங்களூருவும், 40வது இடத்தில் மும்பையும், 54ம் இடத்தில் தில்லியும், 82ம் இடத்தில் ஹைதராபாத்தும் உள்ளன.
சில்லென்ற கோவையன்
|