பார்வையற்றவர்களுக்கான முதல் மகளிர் டி20 உலகக் கோப்பை...
வரலாற்று வெற்றியைப் பெற்ற இந்திய அணி!
பார்வையற்றவர்களுக்கான முதல் மகளிர் கிரிக்கெட் டி20 உலகக் கோப்பையை வென்று வரலாற்றுச் சாதனை படைத்துள்ளது இந்திய அணி. இந்த மாதத் தொடக்கத்தில்தான் இந்திய மகளிர் அணி ஒருநாள் உலகக் கோப்பையை வென்று சாதித்திருந்தது. தற்போது பார்வையற்ற இந்திய மகளிர் அணியினர் டி20ல் வென்று மேலும் மகுடம் சூட்டியுள்ளனர். கடந்த நவம்பர் 11ம் தேதி முதல் 23ம் தேதி வரை பார்வையற்ற மகளிர் டி20 உலகக் கோப்பை போட்டிகள் இந்தியாவிலும், ஸ்ரீலங்காவிலும் நடந்தன.  இதில் இந்தியா, நேபாளம், பாகிஸ்தான், இலங்கை, ஆஸ்திரேலியா மற்றும் அமெரிக்கா ஆகிய ஆறு நாடுகள் கலந்துகொண்டன. லீக் போட்டிகள் இந்தியாவிலும்; அரையிறுதிகளும், இறுதிப்போட்டியும் கொழும்பிலும் நடைபெற்றன. பொதுவாக பார்வையற்றோர் கிரிக்கெட்டில் விளையாட்டு வீரர்கள் பி1, பி2, பி3 என மூன்று வகையினராக பிரிக்கப்படுவார்கள். பி1 என்றால் முழுவதும் பார்வையற்றவர். இவர்கள் பந்தின் ஒலியை நம்பியே விளையாடுவார்கள். பி2 என்றால் குறைந்த பார்வைத் திறன் உடையவர். பி3 என்பது ஓரளவு பார்வையுடன் இருப்பவர்.
அப்படியாக 16 பேர் கொண்ட இந்திய அணி கேப்டன் தீபிகா டிசி தலைமையில் களமிறங்கியது. இதில் லீக் போட்டியில் இந்திய அணி மற்ற ஐந்து அணிகளையும் வென்று புள்ளிப் பட்டியலில் முதலிடம் பிடித்தது.
குறிப்பாக முதல் லீக் போட்டியில் ஸ்ரீலங்கா அணியை வெறும் 41 ரன்களுக்கு ஆல் அவுட்டாக்கியது. பின்னர் இந்த இலக்கை மூன்றே ஓவர்களில் எட்டியது.பின்னர் ஆஸ்திரேலியாவுக்கு எதிரான போட்டியில் இந்திய அணி 4 விக்கெட் இழப்பிற்கு 292 ரன்கள் குவித்தது.
இதில் கேப்டன் தீபிகா டிசி 91 ரன்களும், மற்றொரு வீராங்கனை பூலாசரேன் 54 ரன்களும் எடுத்தனர்.தொடர்ந்து ஆஸ்திரேலிய அணியை வெறும் 83 ரன்களில் சுருட்டி 209 ரன்கள் வித்தியாசத்தில் பெரும் வெற்றியை ஈட்டியது. பின்னர் நேபாளம் உடனான போட்டியில் 20 ஓவருக்கு 209 ரன்கள் குவித்தனர். தொடர்ந்து நேபாள அணியினர் 124 ரன்களே எடுத்தனர். இதனால் இந்திய அணி 85 ரன்கள் வித்தியாசத்தில் வென்றது.
பாகிஸ்தான் அணியுடனான போட்டியில் அந்த அணி எட்டு விக்கெட் இழப்பிற்கு 135 ரன்கள் எடுத்தது. இதனை 10 ஓவரில் இரண்டு விக்கெட் இழப்பிற்கு எடுத்து, வெற்றியை ருசித்தது இந்திய அணி. இதனையடுத்தே கொழும்பில் நடந்த அரையிறுதியில் ஆஸ்திரேலிய அணியைச் சந்தித்தது. இதில் ஆஸ்திரேலிய அணி 20 ஓவரில் ஒன்பது விக்கெட் இழப்பிற்கு 109 ரன்களே எடுத்தது. இதனை இந்திய அணி12 ஓவரில் ஒரு விக்கெட்டை மட்டுமே கொடுத்து எட்டியது.
பின்னர் இறுதிப்போட்டியில் நேபாளத்தைச் சந்தித்தது. இதில் முதலில் பேட்டிங் செய்த நேபாள அணியினர் 20 ஓவரில் 5 விக்கெட் இழப்பிற்கு 114 ரன்கள் எடுத்தனர். இந்திய அணி 12 ஓவரில் மூன்று விக்கெட் இழப்பிற்கு இந்த இலக்கை எளிதாக எட்டி கோப்பையைக் கைப்பற்றியது. இதில் பி1 பிரிவில் வரும் ஆந்திராவைச் சேர்ந்த கருணா குமாரி 27 பந்துகளில் 42 ரன்களும், பி3 பிரிவில் வரும் ஒடிசாவைச் சேர்ந்த பூலாசரேன் 27 பந்துகளில் 44 ரன்களும் எடுத்து வெற்றிக்கு வித்திட்டனர். சிறந்த வீராங்கனையாக பூலாசரேன் தேர்ந்தெடுக்கப்பட்டார்.
பார்வையற்றவர்களுக்கான இந்த டி20 உலகக் கோப்பையில் இந்திய மகளிர் அணியினரின் பீல்டிங், பவுலிங், பேட்டிங் என மூன்றிலும் ஒட்டுமொத்த செயல்பாடும் அத்தனை சிறப்பாக இருந்தது.இந்திய அணியில் விளையாடிய பெரும்பாலான வீராங்கனைகள் எளிய கிராமப்புறப் பின்னணியைக் கொண்டவர்கள் என்பதும் குறிப்பிடத்தக்கது.இந்திய அணியின் கேப்டன் தீபிகா டிசி கர்நாடகாவைச் சேர்ந்தவர். குழந்தையாக இருந்தபோது ஒரு விபத்தில் தன்னுடைய பார்வையை இழந்தவர்.
எளிய விவசாயக் குடும்பத்தைச் சேர்ந்த இவர், சிறப்புப் பள்ளிகள் வழியே கிரிக்கெட்டைக் கண்டடைந்துள்ளார். கிரிக்கெட்தான் அவருக்கு நம்பிக்கையை அளித்ததாகக் குறிப்பிடுகிறார்.
இதேபோல் இறுதிப்போட்டியில் சிறப்பாக விளையாடி மேன் ஆப் தி மேட்ச் விருது பெற்ற பூலாசரேன் ஒடிசாவில் பழங்குடி சமூகத்தைச் சேர்ந்தவர். இவருக்குத் துணையாக நின்று வெற்றிக்கு வித்திட்ட கருணாகுமாரியும் ஆந்திராவின் மலைக்கிராமத்தைச் சேர்ந்தவர்தான்.
இப்படி ஒவ்வொரு வீராங்கனையின் பின்னாலும் போராடி வந்த கதைகள் உள்ளன. தற்போது இந்த வரலாற்று வெற்றி அவர்களைப் பிரகாசமடையச் செய்துள்ளது. அவர்களுக்கு நிறைய நம்பிக்கையை அளித்துள்ளது. அத்துடன் உலக அரங்கில் மகளிர் பார்வையற்றோர் கிரிக்கெட்டிற்கு ஒரு எதிர்காலத்தையும் உருவாக்கியுள்ளது.
பேராச்சி கண்ணன்
|