Brain Storage

சாகாவரம் பெற்ற ஓர் உயிரினம், jellyfish வகையைச் சேர்ந்த Turritopsis dohrnii. அது, உடல் வளர்ந்து, பின், தான் நினைக்கும் பொழுது  இளம் பிராய வடிவத்திற்கு மீண்டும் சென்று, திரும்ப வளரும்; மீண்டும் இளம் பிராயத்துக்குச் செல்லும் திறன் கொண்டது. தன்னை வேறொரு கடல் விலங்கு தின்று முழுங்காத வரை, இவ்வாறு  உயிருடன் வாழ்ந்துகொண்டே இருக்கும். மீன ராசிக்காரர்களே, கேட்டீர்களா? பிரச்னைகளில் இருந்து மீண்டு மீண்டு வாழும் திறன் பெற்றவர்கள் ஆயிற்றே நீங்கள்.

புலிக்கு பயப்படாதவன் பூனைக்கு பயந்தது போல, ஒரு வினோத வரலாற்று சம்பவம் உண்டு. ஃபிரெஞ்சு மன்னனும் மாவீரனுமான நெப்போலியன் (1807ல்) இரண்டு போர் நிறுத்த ஒப்பந்தங்களை உறுதி செய்த பின், கொண்டாடும் விதமாக பூனை வேட்டைக்குச் சென்றான். அவனது தளபதி சுமார் 3000  பூனைகளை ஏற்பாடு செய்திருந்தான். வீடுகளில் வளர்க்கப்பட்ட, மிகவும் பசியுடன் இருந்த அந்தப் பூனைகள் மொத்தமும் நெப்போலியன் மற்றும் அவனது தளபதிகள் மேல் பாய்ந்து பிராண்ட, புறமுதுகிட்டு ஓடிப்போய் தனது கேரவனில் பதுங்கினான் நெப்போலியன்!

நமது உடலில் இரத்த நாளங்கள் இல்லாத ஒரே பகுதி, கண்களின் மேல் இருக்கும் விழிப்படலமான cornea மட்டுமே. அது தனக்கு தேவையான ஆக்ஸிஜனை நேரடியாக காற்றிலிருந்து பெற்றுக்
கொள்கிறது. 

செவ்வாய் கிரகத்தை துருப்பிடித்த கிரகம் என்றுதான் சொல்ல வேண்டும்; அதன் மேல்புறம் முழுவதும் இரும்பின் மேல் படியும் துரு (iron oxide) வேதிப் பொருள் கவிந்திருப்பதால்தான் செவ்வாய், சிவப்பு கிரகம் என்றும் அழைக்கப்படுகிறது.

பெரும் புகழ் பெற்ற Beatles இசைக் குழுவில் நான்கு அங்கத்தினர்கள் இருந்தனர். பாப்/ ராக் இசையில் கொடிகட்டிப் பறந்தனர். இதில் வினோதமான விஷயம் அந்த நால்வருமே முறையாக இசை பயின்றவர்கள் இல்லை என்பது மட்டுமல்லாமல் கடைசி வரையில் இசை ஸ்வரங்களை  (musical notations) எழுதிப் படிக்கும் ஞானமும் இல்லாமலே, காதுகளில் கேட்ட இசை நுணுக்கங்களை வைத்தே தமது இசைப் பயணத்தில் பெரும் சிகரங்களை எட்டினர் என்பதுதான்.