15 வயதில் ஆங்கிலம் கற்றவர்... ஹார்வர்ட் பல்கலைக்கழக பட்டதாரியானார்!
இந்தியப் பழங்குடி இளம் பெண்ணின் சக்சஸ் ஸ்டோரி
இந்தியாவின் கிராமத்தில் வாழும் 39 சதவீத பெண்கள் மட்டுமே உயர் நிலைப் பள்ளிப்படிப்புக்குச் செல்கின்றனர் என்று ஆய்வுகள் சொல்கின்றன. இந்நிலையில் ஜார்க்கண்டில் உள்ள டாகு எனும் குக்கிராமத்தில் பிறந்து, வளர்ந்த சீமா குமாரி என்ற பெண், ஹார்வர்டு பல்கலைக்கழகத்தில் பட்டப்படிப்பைப் படித்தார் என்பது ஒட்டுமொத்த இந்தியப் பெண்களுக்கே இன்ஸ்பிரேஷன். பில்கேட்ஸ், ரத்தன் டாடா, கென்னடி, மார்க் ஜூக்கர்பர்க் உட்பட உலகின் பல பிரபலங்கள் படித்த நம்பர் ஒன் பல்கலைக்கழகம் அது.
யார் இந்த சீமா குமாரி?
டாகுவில் வாழும் மக்கள் அனைவரும் விவசாயத்தை நம்பியே இருக்கின்றனர். இக்கிராமத்தில் பிறக்கும் பெண் குழந்தைகளுக்குக் கல்வி என்பது எட்டாக்கனி. பள்ளிப்படிப்பை பாதியிலேயே நிறுத்திவிட்டு, திருமணம் செய்துகொடுத்துவிடுவார்கள். இப்படியான ஒரு குக்கிராமத்தைச் சேர்ந்தவர்தான் சீமா. இவரது பெற்றோருக்கு எழுதப் படிக்கத் தெரியாது. ஒரு நூல் தொழிற்சாலையில் தினசரி கூலி வேலை செய்து வந்தார் சீமாவின் தந்தை.
டாகு கிராமத்தில் பிறந்த மற்ற பெண் குழந்தைகளைப் போல சீமாவின் பள்ளிப்படிப்பும் பாதியில் நின்று போவதற்கான வாய்ப்புகள் நிறையவே இருந்தன. ‘யுவா’ என்ற தொண்டு நிறுவனம் சீமாவின் வாழ்க்கையையே தலைகீழாக மாற்றிவிட்டது. கால்பந்து விளையாட்டு வழியாக பெண்களின் வாழ்க்கையை மேம்படுத்தும் சேவையைச் செய்து வரும் தொண்டு நிறுவனம் இது. இந்த தொண்டு நிறுவனம் 2012ம் வருடம் டாகு கிராமத்துக்கு வந்து, பெண் குழந்தைகளின் மத்தியில் கால்பந்து விளையாட்டை அறிமுகப்படுத்தியது. விருப்பமுள்ள பெண் குழந்தைகள் கால்பந்து பயிற்சி பெறுவதற்கான ஒரு நிகழ்வையும் ஏற்பாடு செய்திருந்தனர்.
சீமாவும் கலந்துகொண்டார். இந்நிகழ்வில் கலந்துகொண்டதுதான் சீமாவின் வாழ்க்கையின் திருப்புமுனை. கால்பந்து பற்றிய பல விஷயங்களையும், அது பெண் சுதந்திரத்துக்கான வழி என்பதையும் கற்றுக்கொண்டார்.
உண்மையில் அந்தத் தொண்டு நிறுவனம் டாகுவுக்கு வரும் வரைக்கும் அங்குள்ளவர்களுக்கு கால்பந்து விளையாட்டு குறித்த எந்த அறிமுகமும் கிடையாது என்பது குறிப்பிடத்தக்கது.பள்ளி நேரம் மற்றும் வீட்டு வேலைகளுக்கு இடையில் கிடைக்கும் நேரத்தில் கால்பந்து விளையாட ஆரம்பித்தார். அது விளையாட்டைத் தாண்டி, பல்வேறு கட்டுப்பாடுகளிலிருந்து விடுதலை கிடைத்ததைப் போன்ற ஓர் உணர்வை சீமாவுக்குக் கொடுத்தது.
கால்பந்து விளையாட்டில் சிறந்து விளங்கியதோடு மட்டுமல்லாமல், நகரத்தைச் சேர்ந்த ஆண்களுக்கும், பெண்களுக்கும் கால்பந்து பயிற்சி கொடுக்கும் அளவுக்குத் தனது திறமையை வளர்த்துக் கொண்டார். கால்பந்து பயிற்சி அளிப்பதன் மூலம் அவருக்கு வருமானம் கிடைத்தது. அந்த வருமானம் அவரது கல்விச் செலவைச் சமாளிக்க உதவியது.
இதற்கிடையில் கடந்த 2015ம் வருடம் ‘யுவா’ நிறுவனம் டாகு கிராமத்தில் ஒரு பள்ளியை நிறுவியது. சீமா மாதிரியான பெண் குழந்தைகளுக்குச் சிறந்த கல்வியைத் தர வேண்டும் என்பது ‘யுவா’வின் நோக்கம்.
அதனால் ஒவ்வொரு வகுப்பறையிலும் மாணவர்களைக் குறைத்து, நிறைய வகுப்பறைகளை உருவாக்கியது. ஒவ்வொரு வகுப்பறையிலும் அதிகபட்சம் 6 மாணவிகள் இருப்பார்கள். அவர்களுக்கு ஓர் ஆசிரியர் பாடம் நடத்துவார்.
இதற்கு முன்பு டாகுவில் இருந்த பள்ளியில் ஒரு வகுப்பறையில் 70 மாணவ - மாணவியர் வரை இருந்திருக்கின்றனர். ஆசிரியரும் ஒருவர்தான். அதனால் பள்ளிக்கூடம் வந்தாலும் நல்ல கற்றல் நிகழவே இல்லை. ஆனால், ‘யுவா’வின் புதிய பள்ளிக்கூடத்தில் மாணவிகள் திறம்படக் கற்றனர். அதே நேரம் கால்பந்து விளையாட்டிலும் கவனம் செலுத்தினார்கள்.
கல்வியைவிட , கால்பந்து விளையாட்டு சீமாவை வேறு ஒரு உயரத்துக்கு அழைத்துச் சென்றது. அவரது கிராமத்தை தாண்டிச் செல்வதற்கான முதல் வாய்ப்பைக் கால்பந்து விளையாட்டுத்தான் ஏற்படுத்திக் கொடுத்தது.முதலில் கிராமத்தைத் தாண்டி மாவட்ட அளவில் கால்பந்து ஆடச் சென்றவர், சில மாதங்களிலேயே தேசிய அளவிலான போட்டிகளில் கலந்து கொள்வதற்குத் தேர்வு செய்யப்பட்டு, வெளி மாநிலங்களுக்கும் சென்றார்.
அடுத்து சர்வதேச அளவிலும் கால்பந்து விளையாட்டில் கால்பதித்தார். இது தன்னால் எதையும் சாதிக்க முடியும் என்ற மன தைரியத்தை சீமாவுக்குக் கொடுத்தது.
சீமாவுக்கு 15 வயதாக இருந்தபோதுதான் ஆங்கிலம் கற்றுக்கொள்ள ஆரம்பித்தார். அடுத்த ஐந்து வருடங்களில் கேம்ப்ரிட்ஜ் பல்கலைக்கழகத்தில் நடந்த கோடைகால நிகழ்விலும், வாஷிங்டன் பல்கலைக்கழகத்தில் நடந்த ஒரு நிகழ்விலும் கலந்துகொண்டார்.
இப்படி சர்வதேச அளவில் சீமா கலந்துகொண்ட நிகழ்வுகள் எல்லாம் ஏதாவது ஒரு வெளிநாட்டுப் பல்கலைக்கழகத்தில் படிக்க வேண்டும் என்ற கனவை அவருக்குள் விதைத்தது.
குறிப்பாக ஹார்வர்டு பல்கலைக்கழகத்தில் படிக்க வேண்டும் என்று சீமா நினைக்கவில்லை. இந்நிலையில் ஹார்வர்டு பல்கலைக்கழகத்தின் முன்னாள் மாணவியான மேகி, ‘யுவா’ பள்ளியில் ஆங்கில ஆசிரியையாகச் சேர்ந்தார்.
சீமாவின் திறமையைப் பார்த்து , ஹார்வர்டு பல்கலைக்கழகத்தில் சீமா சேர்வதற்கான விண்ணப்பம் முதல் நிதி உதவி வரை அனைத்து ஏற்பாடுகளையும் மேகி உட்பட சீமாவின் ஆசிரியர்கள் செய்து தந்தனர்.
ஆனால், சீமா சில தடைகளை எதிர்கொள்ள வேண்டியிருந்தது. அவரால் ஹார்வர்டு பல்கலைக்கழகத்தில் சேர்வதற்காக நுழைவுத் தேர்வுக் கட்டணத்தைக்கூட செலுத்தும் நிலையில் அவரது பொருளாதாரம் இல்லை. மட்டுமல்ல, தேர்வு நடக்கும் இடத்துக்குச் செல்வதற்கான பயணச் செலவைக் கூட சமாளிக்க முடியாத நிலை.
இதற்கிடையில் கொரோனா லாக்டவுன் வேறு வந்துவிட்டது. இச்சூழலில் வழக்கமாக நடக்கும் நுழைவுத் தேர்வை ஹார்வர்டு ரத்து செய்தது ஒரு நல்ல செய்தியாக அமைந்தது.
அடுத்த சில நாட்களில் ஹார்வர்டு பல்கலைக்கழகத்திலிருந்து மின்னஞ்சல் சீமாவுக்கு வந்தது. அப்போது டாகு கிராமத்திலிருந்த தனது வீட்டில் இருந்தார் சீமா. முழு ஸ்காலர்ஷிப்புடன் ஹார்வர்டு பல்கலைக்கழகத்தில் படிப்பதற்காக சீமா தேர்வு செய்யப்பட்டிருக்கிறார் என்று மின்னஞ்சல் தெரிவிக்க, மகிழ்ச்சியின் உச்சத்துக்குப் போனார் சீமா.
“உண்மையில்இதை என்னால் நம்ப முடியவில்லை. என் பெற்றோர்களுக்கு ஹார்வர்டு என்றாலே என்னவென்று தெரியாது. எனக்கு அட்மிஷன் கிடைத்துவிட்டது என்று இ மெயில் வந்த இரவில் நான் தூங்கவே இல்லை...” என்கிற சீமா, 2021ல் ஹார்வர்டு பல்கலைக்கழகத்தில் பொருளாதாரம் சார்ந்த பட்டப்படிப்பில் சேர்ந்து, சமீபத்தில் ஹார்வர்டு பட்டதாரியாகிவிட்டார். ஹார்வர்டில் படிக்கும்போது பல்வேறு மாணவர்கள் அமைப்பில் சேர்ந்து இயங்கினார்.
குறிப்பாக தெற்கு ஆசியன் சங்கம் மற்றும் ஹார்வர்டு தர்மா போன்ற அமைப்புகள் பல்வேறு நாடுகளைச் சேர்ந்த மாணவர்களுடன் பழகுவதற்கான ஒரு வாய்ப்பை ஏற்படுத்திக் கொடுத்தது.பொருளாதாரத்தில் சுதந்திரமடைந்து, தனது கிராமத்தைச் சேர்ந்த பெண்கள் தங்களின் கனவை நோக்கிச் செல்வதற்கான பாதையை அமைப்பதுதான் சீமாவின் எதிர்காலத் திட்டம்.
த.சக்திவேல்
|