‘பஸ் ஸ்டாண்டில் பிரசவம்’ செய்தியைப் படித்தபோதே பதறியது. நாம் மனிதநேயமுள்ள நாகரிக சமுதாயத்தில்தான் வாழ்கிறோமா என்ற அறச்சீற்றம் நெஞ்சை அடைத்தது.

மெக்சிகோ பளிங்குக் கடலில் டால்பின்களோடு நீந்தி விளையாடுவதில் எமி ஜாக்சனுக்கு கொள்ளைப் பிரியம்னு படிச்சேன். உண்மையில் டால்பின்கள்தான் அவரோடு நீச்சலடிக்க தவம் கிடக்கிறதாம். டால்பின் சங்கத்தில் இருந்து தகவல் வந்துச்சு!

‘தங்கம் விலை இன்னும் இறங்கட்டும்’ எனக் காத்திருப்பதைவிட, தேவைப்படுகிறவர்கள் அவ்வப்போது கொஞ்சம் கொஞ்சமாக வாங்குவது புத்திசாலித்தனம் என கட்டுரையில் கூறிய கருத்து அபாரம்!

தேன்குரல் மன்னன் பி.பி.ஸ்ரீநிவாஸ், இறப்பதற்கு முதல் நாள் எழுதிய கவிதை, குங்குமம் வாசகர்களுக்கு எக்ஸ்குளூசிவ். அவர் பாடிய ‘மனிதன் என்பவன் தெய்வமாகலாம்...’ என்ற வரி அவருக்கே பொருந்தும்!

கவிப்பேரரசு வைரமுத்து போல பலரும் விவசாயிகளைப் பற்றி சிந்திக்கத் துவங்கிவிட்டால், காவிரியிலிருந்து தண்ணீர் வராவிட்டாலும், அவர்கள் கண்களில் இருந்து கண்ணீர் வராமல் இருக்கும்!

என்னது... சூப்பர் ஸ்டாரா இருந்தாலும் கதைதான் முக்கியமா? இதைச் சொன்ன கார்த்திகா நாளைக்கே சூப்பர் ஸ்டார் பட வாய்ப்பு வந்தால் நிச்சயம் கதை கேட்காமல் கால்ஷீட் கொடுப்பார். இது ஒரு ரூபாய் இட்லி மேல சத்தியம்!

ஷீரடி சாயிபாபாவின் அற்புதங்களே எங்களை எங்கோ அழைத்துச் செல்கிறது. அதோடு மாற்றம் தரும் சாயி மந்திரத்தையும் வெளியிட்டு பக்திப் பரவசத்தில் மூழ்கடித்து விட்டீர்கள். நன்றி!

‘தற்போது தமிழ்த் திரையுலகின் சிறந்த நடிகர் யார்?’ என்ற கேள்விக்கு, ‘படத்திலா... பிரஸ்மீட்டிலா?’ என்று மனுஷ்ய புத்திரன் கேள்வியாகவே பதில் தந்திருந்தது நச்!

சென்னை சூப்பர் கிங்ஸ் வீரர், ‘சர்’ ரவீந்திர ஜடேஜா பற்றிய வஞ்சப் புகழ்ச்சி ஜோக்குகள் வயிற்றைப் பதம் பார்த்தன. இப்ப எல்லா துறையிலும் பவர் ஸ்டார்கள் பாப்புலேஷன் பெருகிடுச்சு சார்!

உணவு தயாரிக்கும் குக்கரில் கூட குண்டு தயாரித்து உயிரைக் குடிப்பார்களா? பாஸ்டன் குண்டுவெடிப்பின் விவரங்களைப் படித்து நெஞ்சே வெடிச்சிடுச்சு சாமி!