‘‘இன்றைய நவீன காலகட்டத்தின் வேகத்துக்கேற்ப நோய்களை தீர்க்கும் வழிகளும் துரிதமாக இருக்க வேண்டும் என்ற எண்ணம் மக்கள் மத்தியில் உள்ளது. அதனால்தான் ஆங்கில மருத்துவத்தை நாடுகிறோம்.

அவசர சிகிச்சைக்கு ஆங்கில மருத்துவம் சிறந்ததுதான். அதில் மாற்று கருத்தில்லை. ஆனால், Non-communicable diseases என்று சொல்லக்கூடிய நீரிழிவு நோய், ரத்த அழுத்தம், தைராய்டு நோய்கள், கருப்பை கோளாறுகள், வயிற்று நோய்கள், கல்லீரல் சார்ந்த நோய்களுக்கு தொடர் சிகிச்சை எடுத்துக்கொள்ளும்போது நம் உடலில் பக்க விளைவுகள் ஏற்படுகிறது.

ஆங்கில மருத்துவம் மருந்துகள் முழுக்க முழுக்க குறிப்பிட்ட வேதிப்பொருட்களால் தயாரிக்கப்படுகிறது. நோய்கள் விரைந்து குணமானாலும் அதன் பக்க விளைவுகளை தவிர்க்க முடிவதில்லை.

மேலும், கடந்த காலமாக இதில் ஏற்படும் பக்க விளைவுகளை மக்கள் மத்தியில் ஒரு அச்சத்தை ஏற்படுத்துவதாக உள்ளது.  காரணம் நம் உடலின் வேதிப்பொருட்கள் அதிக அளவு சேர்வதால் அது நஞ்சுநிலையாக மாறி பக்க விளைவுகளையும் பல்வேறு புதிய நோய்களையும் தோற்றுவிக்கிறது.

பொதுவாக ஆங்கில மருத்துவத்தில் எதற்கெடுத்தாலும் அறுவை சிகிச்சை பரிந்துரைக்கப்படுவது பொதுவான அச்சத்தை மக்கள் மத்தியில் ஏற்படுத்துகிறது. தவிர்க்க முடியாத பட்சத்தில்தான் அறுவை சிகிச்சை செய்கிறோம் என ஆங்கில மருத்துவம் விளக்கம் தந்தாலும் இது குறித்து விழிப்புணர்வையாவது அவர்கள் ஏற்படுத்த வேண்டும்.

நோய் ஆரம்ப நிலையில் உள்ளது எனில் சாதாரண உணவுப் பழக்கவழக்கத்தின் மூலம் அதை சரி செய்ய அவர்களை பழக்க வேண்டும். முடியாத பட்சத்தில்தான் அவர்களுக்கு மருந்து மாத்திரைகள் தந்து அவர்களுக்கு சிகிச்சை அளிக்க வேண்டும்.

இந்தியாவில் மாநிலங்களில் உள்ள மாவட்ட அரசு பொது மருத்துவமனைகளில் அலோபதி, சித்தா, ஆயுர்வேதா, யுனானி, இயற்கை மருத்துவம் போன்ற மாற்று மருத்துவத் துறைகளுக்கு முக்கியத்துவம் கொடுத்து அந்த மருத்துவத்திலும் மக்களை சிகிச்சை பெறச்செய்ய வேண்டும்.

தவிர்க்க முடியாத சூழ்நிலையிலும் உயிருக்கு ஆபத்தான நிலையிலும் ஆங்கில மருத்துவ சிகிச்சை அளிக்கலாம். ஆனால் சாதாரண நோய்கள், நோய் ஆரம்ப நிலையில் உள்ள நோய்களுக்கு மாற்று மருத்துவத்தை பரிந்துரைக்கலாம்.