சமீபத்தில் நம் ‘சுட்டி ஸ்டார்’ ரித்விக் நடித்த O2 திரைப்படத்தை அனைவரும் பார்த்திருப்போம். அதற்கு முன்னரும் கொரோனா பெருந்தொற்றுக் காலத்தில் ஆக்சிஜன் அவசியத்தை நன்றாகவே அறிந்திருப்போம்.

நாம் உயிர் வாழ முதல் முக்கியமான ஒன்று பிராண வாயு. இது பெரியவர்களுக்கு மட்டுமில்லை, வயிற்றில் வளரும் சிசுவுக்கும் மிக அவசியமானது. பிரசவ நேரத்திற்கு முன்பும் சரி, பிரசவத்தின் போதும் சரி, குழந்தைக்கு ஆக்சிஜன் இல்லையெனில் பெரும் ஆபத்துகள் விளையும். அவ்வாறு விளையக்கூடிய ஆபத்துகள் என்னென்ன? அதில் இயன்முறை மருத்துவரின் பங்கு என்ன? என்பது பற்றிய அனைத்தையும் இங்கே பார்க்கலாம்.

ஒருவேளை மேல் சொன்ன சூழலில் ஏதேனும் ஒரு காரணத்தால், குழந்தைக்குப் பிராண வாயு குறைய நேர்ந்தால், குழந்தையின் இதயத் துடிப்பு குறையும். இதனால் குழந்தையின் மூளைக்கு போகும் ரத்தம் குறையத் தொடங்கி, மூளை செல்கள் ரத்த ஓட்டம் இல்லாமல் இறந்துபோகும். எந்த பகுதியில் மூளை செல்கள் பாதிப்பு அடைகிறதோ, அந்தப் பகுதிக்கான செயல்கள் குழந்தைக்கு பாதிக்கப்படும்.

உதாரணமாக, மூளையின் பேசும் பகுதி திசுக்கள் பாதிக்கப்பட்டால், குழந்தையால் பேச முடியாது. இதனால் வளர்ச்சி படிநிலைகளில் தாமதம், பக்க வாதம், மூளை வாதம் (Cerebral Palsy), கண், காது, பேச்சுத் திறன்களில் சிக்கல், அறிவுத் திறன் குறைவது, ஆட்டிசம் பாதிப்பு, சிந்திக்கும் திறன் குறைவது போன்ற பல பாதிப்புகள் ஏற்படலாம். அதிகபட்சமாக, குழந்தை இறந்தும் பிறக்கலாம்.