சினிமாவில் சாதிக்க வேண்டும் என்பதுதான் நாயகன் விஷ்ணுவிஷாலின் ஆசை. அதிலும் சைக்கோ த்ரில்லர் எடுக்க வேண்டுமென ஆண்டுக்கணக்கில் ஆய்வு செய்து வருகிறார். இயக்குநர் வாய்ப்பு தட்டிப் போய்க்கொண்டே இருக்கிறது. வருமானமே இல்லாத குடும்பச்சூழல். போலீஸ்காரரான அப்பாவும் காலமாகிவிட்டார்.

கட்டாயத்தின் பேரில் மாமா முனீஸ்காந்தின் ஆலோசனைப்படி எஸ்.ஐ. தேர்வு எழுதி, போலீஸாகிறார்.அடுத்தடுத்து சென்னை மாநகரில் பள்ளி மாணவிகள் கடத்தப்பட்டு, கொடூரமாக கொலை செய்யப்படுகிறார்கள். கொலைகாரன் ஒரு சைக்கோ என்பதை தடயங்கள் வாயிலாக நிரூபிக்கிறார் விஷ்ணு.

சைக்கோ த்ரில்லர் படங்களில் எப்போதுமே ஹீரோவுக்கு இணையாக வில்லன் கதாபாத்திரமும் பவர்ஃபுல்லாக அமைந்தால்தான் வெற்றியை எட்ட முடியும். படத்தில் ‘ராட்சசன்’-னைக் கண்ணில் காட்டாமலேயே அவனுடைய பவரை எஸ்டாப்ளிஷ் செய்ததில் பெரும் வெற்றியை எட்டியிருக்கிறார் இயக்குநர்.

அதிலும் வில்லனின் அந்த பியானோ இசைத்துணுக்கு முதுகெலும்பை சில்லிடச் செய்கிறது. ஜிப்ரானின் பின்னணி இசையே வில்லனின் பெரும் பலம். பி.வி.சங்கரின் ஒளிப்பதிவும் ராட்சசத்தனமான உழைப்பு.தமிழ் சினிமாவில் நெடுங்காலத்துக்கு நினைவுகூரப்படும் திகில் படமாக வந்திருக்கிறது ‘ராட்சசன்’.