பேஸ்கட்பால் பிளேயர், 2011 மிஸ் ஃபெமினா என்று ஏகப்பட்ட பெருமைகளுக்கு சொந்தக்காரர் டயானா எரப்பா. மணிரத்னத்தின் ‘செக்கச் சிவந்த வானம்’ படத்தில் சிம்புவுக்கு ஜோடியாக அதிரடி கவர்ச்சி காட்டி பரபரப்பு ஏற்படுத்தி இருப்பவர்.

“அது ஒரு இன்ப அதிர்ச்சி என்றுதான் சொல்லவேண்டும். ஒரு நாள் மும்பையில் ஷாப்பிங் பண்ணிக் கொண்டிருந்தபோது மணிரத்னம் சாரின் உதவியாளர் என்று சொல்லி ரிச்சர்ட் என்றவர் போன் பண்ணினார்.

என்னுடைய சமீபத்திய புகைப்படங்களை அனுப்பி வைக்கும்படி கேட்டுக் கொண்டார். நான் வழக்கம்போல யாரோ கலாய்க்கிறாங்க என்றுதான் நினைத்தேன். பிறகு ரிச்சர்டின் ஃபேஸ்புக் பக்கத்துக்கு சென்று அவரைப் பற்றிய பின்னணியைத் தேட ஆரம்பித்தபோது உண்மையிலேயே அது மெட்ராஸ் டாக்கீஸின் அழைப்பு என்று புரிந்து கொண்டேன்.

என்னுடைய புகைப்படங்களை அனுப்பி வைத்தேன். பிறகு ஒரு நாள் மணிரத்னம் சார் நடத்திய ஆடிஷனில் கலந்துகொண்டேன். மணி சாரை பார்த்ததும் நெர்வஸாக இருந்தேன். மணி சார்தான் நிலைமையை சகஜமாக்கி எப்படி நடிக்கவேண்டும் என்று சொல்லிக் கொடுத்தார்.

முதல் நாளே அந்த டீமில் இணைந்து வேலை செய்ய வேண்டும் என்று தோன்றியதால் ஒரு கேள்வியும் கேட்காமல் நடிப்பதற்கு சம்மதம் தெரிவித்தேன்.”

“கலாராணி அம்மா நடத்திய ஒர்க் ஷாப் எனக்கு உதவியது. அங்கு எமோஷனல் காட்சிகளில் எப்படி நடிக்க வேண்டும், கண் அசைவு எப்படி இருக்க வேண்டும், குரல் பயிற்சி உட்பட பலவித பயிற்சிகளை சொல்லிக் கொடுத்தார்.

பிறகு மும்பையிலும் ஃபிலிம் இன்ஸ்டிடியூட்டில் நடிப்பைப் பற்றி கொஞ்சம் கற்றுக் கொண்டேன். நான் மாடலிங் துறையில் இருந்ததால் படத்துல வரும் வெளிநாட்டிலிருந்து திரும்பும் இந்திய பெண் வேடத்தில் இயல்பாக பண்ண முடிந்தது. சக நடிகரான சிம்பு தமிழ் சினிமாவைப் பற்றி புரிந்துகொள்ள உதவியாக இருந்தார்.”

“மாடலிங், சினிமா இரண்டும் எனக்கு இரு கண்கள் மாதிரி. கண்டிப்பாக சினிமாவில் தொடர்ந்து நடிப்பேன். சினிமா என்பது அற்புதமான உலகம். நிஜத்தில் நாம் ஒரே ஒரு வாழ்க்கையைத்தான் வாழமுடியும்.

ஆனால் சினிமா அப்படியல்ல, நாம் நினைத்தால் மீண்டும் ஸ்கூல் வாழ்க்கை, கல்லூரி வாழ்க்கை என்று வெவ்வேறு வாழ்க்கையை வாழமுடியும். பாலிவுட், கோலிவுட் என்று பிரித்துப் பார்க்கமாட்டேன். எந்த மொழியில் வாய்ப்பு வந்தாலும் நான் நடிக்க தயராக இருக்கிறேன்.”