ரேவதி எனக்கு நல்ல நண்பர்! சுரேஷ்மேனன் சொல்கிறார்

நடிகர், ஒளிப்பதிவாளர், இயக்குநர் என்று பன்முகம் கொண்டவர் சுரேஷ் சந்திரமேனன். சமூக சேவையில் அதிக நாட்டமுள்ள இவர் சமீபத்தில் My Karma App என்ற க்விஸ் அப்ளிகேஷனை உருவாக்கியுள்ளார். அதனைப் பற்றிய பத்திரிகையாளர் சந்திப்பு சென்னையில் நடைபெற்றது. அறிமுக விழா முடிந்து வெளியே வந்த சுரேஷ் சந்திர மேனனிடம் பேசினோம்.

‘‘என்னை ஒரு ஒளிப்பதிவாளராக, இயக்குனராக, நடிகராக பார்த்திருப்பீர்கள். 40 வருடமாக இந்தத் துறையிலிருந்து வருகிறேன். ‘16 வயசு’ என்ற தெலுங்குப் படத்தில் உதவி ஒளிப்பதிவாளராக என் கேரியரை ஆரம்பித்தேன். ஸ்ரீதேவி நடித்த படம் அது. தொடர்ந்து ‘வாழ்வே மாயம்’, ‘தீ’, ‘மருமகள்’, ‘விடுதலை’, ‘பிரேம பாசம்’ என்று ஏராளமான படங்களில் வேலை பார்த்துள்ளேன்.‘புதிய முகம்’ படத்தை இயக்கி நடித்தேன். ஏ.ஆர்.ரஹ்மானின் இரண்டாவது படம் அது.

டிவி சீரியல்கள், பல்வேறு டாகுமென்டரிகள், ரேவதி இயக்கத்தில் ‘மித்ரு மை ஃப்ரெண்ட்’ என்ற ஆங்கிலப் படத்தைத் தயாரித்துள்ளேன். தயாரிப்பாளர் உள்பட மூன்று தேசிய விருதுகளை அந்தப் படம் பெற்றது. அப்போதைய ஜனாதிபதி அப்துல் கலாம் விருது வழங்கினார்.நீண்ட நாட்களாக நடிப்புக்கு ஓய்வு கொடுத்தேன். சமீபத்திய தமிழ் படங்கள் என் மெளனத்தைக் கலைத்தன. இளைஞர்கள் மிகப் பிரமாதமாக வர்றாங்க.

மலையாளத்தில் துல்கர் சல்மான் நடித்த ‘சோலோ’வில் செகண்ட் இன்னிங்ஸ் ஆரம்பமானது. தமிழில் சூர்யாவுடன் ‘தானா சேர்ந்த கூட்டம்’, விஜய் சேதுபதியுடன் ‘ஜூங்கா’ போன்ற படங்கள் பண்ணினேன். நடிப்பதைத் தாண்டி பல்வேறு சமூக சேவையில் எனக்கு ஆர்வம் அதிகம். ஆர்வத்துடன் நிறுத்திக் கொள்ளாமல் ஏராளமான வளர்ச்சித் திட்டங்களை செயல்படுத்தியுள்ளேன்.