தூக்குதுரை என்கிற அஜித் குமார்அரிசி ஆலை அதிபர். ஊர் முழுக்க சொந்த பந்தங்கள். அவர்களுக்கெல்லாம் அவர்தான் ‘தல’. நின்றால் கூட்டம், நடந்தால் பேரணி என்று ஊரில் அசால்ட்டு செய்து கொண்டிருக்கிறார்.

ஊருக்கு மருத்துவ முகாம் அமைக்க வருகிறார் நயன்தாரா. ஆரம்பத்தில் தடாலடி தூக்குதுரையோடு அவருக்கு மோதல். இருப்பினும் ‘தல’யின் மாஸ் காரணமாக காதலில் விழுகிறார். கரம் பிடிக்கிறார்கள். காதல் கல்யாணத்துக்கு சாட்சியாக அழகான பெண் குழந்தை.

“குழந்தைகள் உங்கள் வழியாக உலகத்துக்கு வந்தார்கள், அவ்வளவுதான்” என்று குழந்தைகளின் மீதான நம்முடைய உரிமைகளுக்கு ஒரு வரையறை செய்திருப்பார் கவிஞர் கலீல் ஜிப்ரான். இந்தப் படம் மூலமாக அஜித் - சிவா கூட்டணியும் அதையேதான் சொல்கிறார்கள்.

குழந்தைகள் அவர்களது வாழ்க்கையை அவர்களே தீர்மானித்து வாழவேண்டும். பெற்றோரின் ஆசை, இலட்சியத்தையெல்லாம் அவர்கள் மீது திணிக்கக்கூடாது என்கிற காலத்துக்கு அவசியமான அருமையான கருத்தைச் சொல்லியிருக்கிறார்கள்.