இந்தியாவின் தலைசிறந்த கல்வி நிறுவனம் சென்னை ஐஐடி. எப்போதும் புதுமைகளுக்கும், புதிய கண்டுபிடிப்புகளுக்கும், ஆராய்ச்சிகளுக்கும் மாணவர்களை ஊக்கப்படுத்திக்கொண்டே இருக்கும் தொழில்நுட்பக் கழகம். இதில் PALS என்ற பெயரில் செயல்பட்டு வரும் சென்னை ஐஐடி முன்னாள் மாணவர்கள் கூட்டமைப்பினர் தங்கள் பங்கிற்கும் பொறியியல் மாணவர்களை ஊக்கப்படுத்தும் நோக்கில் கடந்த பனிரெண்டு ஆண்டுகளாக பல்வேறு விஷயங்களை ஐஐடியுடன் இணைந்து மேற்கொண்டு வருகின்றனர். 

அதில் ஒன்றாக ஒவ்வொரு ஆண்டும் அவர்கள் முன்னெடுக்கும் ‘innoWAH’ நிகழ்வு சிறப்பாக நடந்து முடிந்தது. அதாவது பொறியியல் கல்லூரி மாணவர்கள் தங்கள் புதுமையான கண்டுபிடிப்புகளைக் காட்சிப்படுத்தும் போட்டி இது.

இதில், ‘இன்றைய காலக்கட்டத்தில் நிலைத்த தன்மைக்கான சவால்களுக்கு ஏற்ற ஸ்டார்ட்அப் தீர்வுகள்’ என்பது போட்டியின் கருப்பொருளாக இருந்தது. இந்தப் போட்டியில் தமிழ்நாடு, கேரளா, தெலுங்கானா, ஆந்திரப்பிரதேசம், கர்நாடகா உள்ளிட்ட மாநிலங்களிலிருந்து சுமார் 44 கல்லூரிகளைச் சேர்ந்த மாணவ - மாணவிகள் பங்கெடுத்தனர். 

இதில் அவர்கள் தங்கள் யோசனைகளை கருத்தாக்கம் செய்து, புதிய கண்டுபிடிப்பு முன்மாதிரிகளை வடிவமைத்திருந்தனர். இறுதியில் மொத்தம் ஆறு தலைப்புகளில் நடந்த போட்டிகளில் 11 கல்லூரிகள் பரிசுக்குத் தேர்ந்தெடுக்கப்பட்டன.

இந்நிகழ்வில் அசத்திய சில மாணவர்களுடன் உரையாடினோம். முதலில், சென்னையைச் சேர்ந்த ஸ்ரீவெங்கடேஸ்வரா பொறியியல் கல்லூரி மாணவர்கள் காலநிலை மாற்றத்தின் பாதிப்பைக் குறைக்க சாதாரண சைக்கிளை எலக்ட்ரிக் சைக்கிளாக மாற்றியிருந்தது அனைவரையும் வெகுவாகக் கவர்ந்தது.

 ‘‘இதுல பேட்டரியும், டயர் ரிங் காம்போவும் வந்திடும். இந்த செட்அப்பை சைக்கிளில் பொருத்தினால் போதும். அது எலக்ட்ரிக் சைக்கிளாக மாறிடும். இது வேண்டாம் என்றாலும் கழற்றி வச்சிடலாம். பெடல் போட்டுக்கிட்டு வந்திடலாம்னு நினைச்சாலும் செய்யமுடியும். அந்தளவுக்கு இதனை வடிவமைச்சிருக்கோம்.