இந்திய சினிமா இப்போது மலையாள சினிமாவைத்தான் உற்றுப் பார்க்கிறது. ‘பிரம்மயுகம்’, ‘மஞ்சுமல் பாய்ஸ்’, ‘பிரேமலு’ என சமீபத்தில் வெளியான மலையாளப் படங்களின் பெரும் வெற்றி இந்தியத் திரையுலகை வியப்பில் ஆழ்த்தியுள்ளது.

அந்த வரிசையில் கடந்த வாரம் வெளியான ‘ஆடுஜீவிதம்’ பான் இந்திய சினிமாவாக வெளியாகி அனைவரின் கவனத்தையும் ஈர்த்துள்ளது. பிருத்விராஜ், அமலாபால், ஏ.ஆர்.ரஹ்மான், பிளஸ்சி என ஜாம்பவான்கள் இடம் பெற்ற அதில் ஒளிப்பதிவாளர் சுனிலுக்கும் முக்கிய பங்கு உண்டு.

ஒவ்வொரு கேமராமேனும் இந்த மாதிரி ஒரு படத்தில் வேலை செய்யணும்னு காத்திருப்பாங்க. எனக்கு அந்த வாய்ப்பு அமைஞ்சது. வாழ்க்கையில் ஒரு முறைதான் இந்த மாதிரி வாய்ப்பு கிடைக்கும்.படத்தோட இரண்டாவது பாதியில் பிருத்விராஜ், கோகுல் உட்பட மூணு பேர்தான் இருப்பாங்க. அதை சுவாரஸ்யமாகவும் சொல்லணும். 

அதே சமயம் பாலைவனத்தை அழகியலோடும் சொல்லக் கூடாது.பாலைவனம் எனும்போது அது கடினமான எண்ணத்தையும் தரணும். அத்துடன் ரசிகர்களின் ஆர்வத்தைத் தூண்டும் விதமாகவும் இருக்கணும். அதுதான் பெரிய சவாலா இருந்துச்சு. க்ளைமாக்ஸில் ஹீரோ நான்கைந்து நாட்கள் பாலைவனத்தில் நடந்தபிறகுதான் நகரத்துக்குச் செல்லும் வழியை வந்தடைவார்.

இதில் என்ன கஷ்டம் என்றால் ஆர்டிஸ்ட் மேக்கப், காஸ்டியூம் ஒரே மாதிரி இருக்க வேண்டிய கட்டாயம் இருந்தது. டிராவல் படம் என்பதால் ஆர்டிஸ்ட்டோட எனர்ஜி லெவல் காலையில் உற்சாகமாகவும், மதியம், மாலை என்று வரும்போது உற்சாகம் குறைந்தும் காணப்படும். 

ஆனாலும், ஆர்டிஸ்ட் அனைவரும் முழு ஒத்துழைப்பு கொடுத்தார்கள்.படத்தில் பிருத்விராஜுக்கும் ஆடுகளுக்கும் உணர்வுபூர்வமான கனெக்‌ஷன் இருக்கும். ஆடுகளிடம் ஆக்‌ஷன் சொல்லி வேலை வாங்க முடியாது. அப்படி ஆடுகளின் அசைவுகளை கவனித்து படமாக்குவதில் நிறைய சவால் இருந்துச்சு.

ரெயின் எஃபெக்ட் காட்சிக்காகவும், மணல் குன்றுகளை உடைக்கவும், பிரம்மாண்டமான கிரேன்களை கொண்டு வருவதற்காகவும் புல்டோசர் கொண்டு வந்து நாங்களே பாலைவனத்தில் வழியை ஏற்படுத்தினோம்.

சில சமயம் மணல் குன்றுகள் ஒரே மாதிரியாகவும் இருக்காது. காத்தடிச்சதும் குன்றுகள் களைந்துவிடும். மறுபடியும் கன்டினியூட்டிக்காக அதே மலைக் குன்றுகளை தேடிப் பிடித்து படமாக்கினோம். பாலைவனத்தில் என்ன வெளிச்சம் கிடைச்சதோ அதைவெச்சு படமாக்கினோம்.

படத்துல டயலாக் கம்மி. அது தெரியாதளவுக்கு ஆடியன்ஸை எங்கேஜ்டா வெச்சிருக்கணும். மூவரின் பயணத்தையும் சலிப்புத் தட்டாதளவுக்கு சொல்லணும். ஹீரோவுடைய உணர்வுகளையும், வேதனையையும் குளோஸ் அப், வைட் ஷாட் மூலமாகவும் சொல்ல வேண்டிய கட்டாயம் இருந்துச்சு.

பாலைவனப் பகுதியில் ஷூட் பண்ணும்போது அந்த இடங்களில் பழக்கப்பட்ட ஸ்டெடி கேம் ஆபரேட்டர்களை கூப்பிட்டு  வந்தோம்.பாந்தம் ஷாட் எடுப்பதற்காக பெரியளவிலான புரபெல்லர், ஹெலிகாப்டர் என பல வழிகளை ப்ளான் பண்ணினோம். அது எதுவும் கைகொடுக்கவில்லை.

ஏனெனில், முதல் ஷெட்யூலில் கேமரா, லென்ஸ் சேதமானது. அடுத்த ஷெட்யூலுக்கு ஸ்பேர் கேமராவுடன்தான் போனோம்.பிருத்விராஜ் மீது விழும் புழுதி எல்லாமே இயற்கை புயலில் எடுக்கப்பட்ட காட்சிகள். 

அப்படி ரியலா எடுத்த காட்சிகளில் லென்ஸ் சேதமாகிவிட்டது. ஹீரோ சாலையைப் பார்க்கும் காட்சியைத்தான் அதிகமா ரிஸ்க் எடுத்து எடுத்தோம். பாம்பு காட்சிகளையும் லைவ்வா எடுத்தோம். பாலைவனத்தில் பாம்பு, நரி, தேள் போன்ற ஜீவராசிகளின் அச்சுறுத்தலும் இருந்துச்சு. இறைவன் அருளால் எந்தவித ஆபத்துமில்லாமல் படப்பிடிப்பை முடிச்சோம்.