பகவான்-41

மீண்டும் கோட்டையைப் பிடித்தார்!

ஓஷோவை போர்ச்சுக்கல்லின் லிஸ்பன் நகரில் அமெரிக்க அதிகாரிகள் எதிர்பார்த்திருந்த நிலையில், அவர் ஸ்பெயினின் மாட்ரிட்டில் தரையிறங்கினார்.

உடனே அமெரிக்கர்கள் வெறியோடு மாட்ரிட் நோக்கி பயணிக்க, சத்தமேயின்றி மாட்ரிட்டில் இருந்து லிஸ்பனுக்கு வந்தார் பகவான்.அமெரிக்காவுக்கு இவ்வாறாக அல்வா கொடுத்துவிட்டு, லிஸ்பனில் ஒரு ஹோட்டல் அறையில் ரகசியமாகத் தங்குவதற்கு ஏற்பாடுகள் செய்யப்பட்டிருந்தன.

போர்ச்சுக்கல்லில் இருந்த பக்தர்கள் பகவானை கோலாகலமாகக் கொண்டாடினார்கள். தினமும் ஹோட்டலுக்கு திரண்டு வந்து அவரை தரிசித்துவிட்டுச் சென்றார்கள்.இதனால் அதுநாள் வரை டூரிஸ்ட்டுகளே இல்லாமல் ஈயடித்துக் கொண்டிருந்த அந்த ஹோட்டலில் திடீரென்று சலசலப்பு ஏற்பட்டது.பகவானின் சீடர்கள் சிலர் அவரிடம் சொன்னார்கள்.

“பகவானே! தாங்கள் இங்குதான் தங்கியிருக்கிறீர்கள் என்பதைத் தெரிந்துகொண்டால் மீண்டும் அமெரிக்கா பிரச்னை செய்யும்…”“பிரச்னை செய்வது அவர்களது வேலை. ஒவ்வொரு முறையும் அவர்களது மூக்கை உடைப்பது நம்முடைய கடமை...” என்று ஜாலியாக ஜோக்கடித்தார் பகவான்.

“அதனால்தானே லிஸ்பனுக்கு வருவதாக தகவல் சொல்லி, நாம் மாட்ரிட்டில் இறங்கி அமெரிக்கர்களை அலையவிட்டோம். இப்போது நீங்கள் இங்கே தங்கியிருப்பதை அமெரிக்கர்கள் அறியாவண்ணம் மேலும் சில முன்னெச்சரிக்கைகளை மேற்கொள்கிறோம்...”“என்னமாதிரி முன்னெச்சரிக்கைகள்?”“நீங்களே கவனித்திருக்கலாம். சமீபமாக நாங்கள் யாரும் ஆரஞ்ச் நிற உடை அணிவதில்லை. தாடி வைப்பதில்லை. சுற்றுலாப் பயணிகளைப் போன்ற தோற்றத்தில் உலவுகிறோம்...”“கவனித்தேன்!”“நீங்களும் அதுமாதிரி…”

“அதாவது என் நீண்ட அங்கியைத் துறக்க வேண்டும். தாடியை மழிக்க வேண்டும். முடியை ஒட்ட நறுக்க வேண்டும்...”
“ஆமாம் பகவானே. நம் பக்தர்களைத் தவிர வேறு எவரும் உங்களை அடையாளம் காண முடியாது...”“அதாவது என்னை மறைந்து மாறுவேடத்தில் வாழச் சொல்கிறீர்கள்...”“சில காலத்துக்குத்தான். அதற்குள்…”“அமெரிக்க அதிகாரிகள் முட்டாள்கள்தான். ஆனால், நீங்கள் நினைக்குமளவுக்கு அடிமுட்டாள்கள் அல்ல…” பகவானின் குரலில் உஷ்ணம் ஏறியது. அவரே தொடர்ந்தார்.

“கேவலம் அமெரிக்க அதிகாரிகளுக்கு பயந்து இந்த ஓஷோ முடியைத் துறந்தார், உடையை மாற்றினார் என்று எதிர்காலம் என்னை கேலி பேசவேண்டுமா?”நிர்த்தாட்சண்யமாக தன்னுடைய தோற்றத்தை மாற்றிக்கொள்ள பகவான் மறுத்துவிட்டார்.அதே ஹோட்டலில் மேலும் சில நாட்கள் தங்கியிருந்தால் மாட்டிக் கொள்வோம் என்கிற உண்மை நிலவரம், பகவானை அங்கே பாதுகாத்து வைத்திருந்த பக்தர்களுக்கு புரிந்தது.

உடனடியாக அங்கிருந்து வெளியேறுவதாக ஒரு நாடகம் நடத்தினார்கள். எவருக்கும் தெரியாமல் ரகசியமாக அதே ஹோட்டலில் இருந்த வசதிகள் குறைவான சுமாரான அறையை எடுத்து ஓஷோவை வேறு பெயரில் தங்க வைத்தார்கள். இதனால் ஓஷோவைத் தேடிவந்த பக்தர்கள் பலரும் ஏமாந்துபோய் திரும்பினார்கள். ஏமாந்து திரும்பிய அந்தக் கூட்டத்தில் சில அமெரிக்க உளவாளிகளும் அடக்கம்.