சமீபகாலமாக இந்த அறியப்படாத கருத்தரிப்பு உலகெங்கும் அதிகரித்து வருகிறது. 

அவசர வாழ்க்கை, முறையற்ற உணவு பழக்கங்கள், தூக்கமின்மை இவற்றால் பெண்களுக்கு மாதவிடாய் சுழற்சி ஒழுங்காக இருப்பதில்லை.எனவே மாதவிலக்கு தள்ளிப் போகும்போது அதை பெண்கள் சீரியசாக எடுத்துக் கொள்வதில்லை. எனவே, தான் கர்ப்பமாக இருக்கிறோம் என்பதையே பல பெண்கள் ஐந்து அல்லது ஆறாம் மாதம்தான் அறிகிறார்கள். 

சில நாட்களுக்கு முன் வயிற்று வலி காரணமாக மருத்துவரை சந்தித்த ஒரு பெண், அடுத்த ஒரு மணிநேரத்தில் சுகப் பிரசவத்தில் ஒரு குழந்தையைப் பெற்றது இணையம் எங்கும் வைரலானது. 

30 வயதைக் கடந்த பிறகு ஒரு சில பெண்கள் இப்படியான அறிகுறிகள் தென்பட்டால் அதற்கு முக்கியத்துவம் தருவதில்லை. வயது காரணமாக ஏற்படும் உடல் பிரச்னைகள் என அலட்சியப்படுத்தி விடுகிறார்கள்.

கருத்தரிப்பை விடுங்கள்... டியூமர் கட்டிகள், நீர்கட்டிகள் போன்றவற்றைக் கூட கவனிக்காமல் எடை அதிகரிப்பால் வயிற்றில் தொப்பை விழுகிறது என நினைக்கும் பெண்கள் இருப்பதை என்னவென்று சொல்வது..?’’ என்று கேட்கும் டாக்டர் வினுதா அருணாச்சலம், ‘கவனிக்கப்படாத கருத்தரிப்பால்’ என்னென்ன பிரச்னைகள் உருவாகும் என்பதை விவரித்தார்.

இன்னொரு வகையிலும் இதைப் பார்க்கலாம். அப்போதுதான் ஒரு பெண் மூன்று நான்கு வயது வரை குழந்தையை வளர்த்து பள்ளிக்கு அனுப்பத் தொடங்கியிருப்பார். மீண்டும் அதே சூழல், குழந்தை பராமரிப்பு, அவர்கள் பின்னால் ஓட்டம்... என நினைக்கும்போதே அவர்களுக்கு சோர்வாகிவிடும். 

இதில் நல்ல வேலையில் இருக்கும் பெண்களுக்கு கூடுதலாக கரியர் மீதான அச்சமும் மன அழுத்தத்தை அதிகரித்து விடும். இதில் 40 வயதுக்கு மேல் திட்டமிடப்படாத அல்லது கவனிக்காமல் விட்ட கர்ப்பம் எனில் அவர்களால் காலம் தாண்டி கருக்கலைப்பு செய்யவும் முடியாது. 

ஏற்கனவே வீட்டில் 15 வயதைக் கடந்த மகளோ / மகனோ இருக்கும்போது இரு குழந்தைக்கும் இடையே நிலவப் போகும் வயது வேறுபாடு வீட்டில் இருப்பவர்களை அழுத்தமான மனநிலைக்கு ஆளாக்கும்...’’ என்றவர் இதற்கான தீர்வையும் Cryptic Pregnancy பிரச்னைகள் வராமல் இருக்க என்ன செய்யலாம் என்பதையும் விளக்கினார்.

‘‘ஆரோக்கியம் மீதான அக்கறைக் குறைவுதான் இதற்கு முதல் காரணம். இதற்குதான் ஒரு குறிப்பிட்ட கால இடைவெளியில் முழு உடல் பரிசோதனை அவசியம் என மருத்துவ உலகம் தொடர்ந்து அறிவுறுத்தி வருகிறது. உங்கள் உடல் சொல்வதை கேளுங்கள். உடலில் உண்டாகும் சிறு மாற்றத்தைக் கூட கவனியுங்கள். 

ஆனால், அதை யாருமே செய்வதில்லை; கடைப்பிடிப்பதில்லை. உடலில் ஏதாவது பிரச்னை வந்தால் மட்டுமே மருத்துவ பரிசோதனை அல்லது மருத்துவர் ஆலோசனை என ஆரம்பிக்கிறார்கள். 

அதேபோல் சீரற்ற மாதவிடாய், ஹார்மோன் பிரச்னைகள் எனில் அதை துவக்கத்திலேயே சரி செய்தால் இப்படியான கவனிக்கப்படாத கருத்தரிப்பு பிரச்னைகள் வராது. 

அதேபோல் ஆண்களும் போதுமான பாதுகாப்புடன் தாம்பத்தியம் வைத்துக் கொள்வதும் அவசியம். இதில் தேவையற்ற கர்ப்பம் மட்டுமல்ல, பாலியல் சார்ந்த நோய் தொற்றுகளும் கூட வராமல் தடுக்கலாம். ஒரு சில பெண்களுக்கு குழந்தை பொருத்துதல் (Baby Implantation) - அதாவது கருப்பைக்குள் கருவை பொருத்தும் நிகழ்வு நடக்கும் தருவாயில் மாதவிடாய் போலவே இரத்தப்போக்கு ஏற்படும்.

கருப்பை சவ்வு முழுமையாக கருவை மூடும் வரையிலும் கூட சில பெண்களுக்கு இந்த ரத்தப்போக்கு நிகழும். சிலர் இது மாதவிடாய் என நினைத்து அலட்சியம் செய்வதுண்டு. அதனால்தான் மாதவிடாய் அட்டவணை சரியாகப் பின்பற்றப்பட வேண்டும் என மருத்துவர்கள் அழுத்தம் திருத்தமாக சொல்கிறார்கள். 

கவனிக்கப்படாத கர்ப்பத்தை 5 மாதங்கள் கடந்து நிச்சயம் அங்கீகரிக்கப்பட்ட மருத்துவர்கள் மற்றும் மருத்துவமனைகள் கலைக்க முன்வர மாட்டார்கள். அதையும் மீறி கருக்கலைப்பு செய்யும் பட்சத்தில் தாயின் உயிருக்கே மிகப்பெரிய ஆபத்தாக முடியும் அல்லது அடுத்து குழந்தைப் பேறு நடக்காமலேயே போகலாம். 

இதனால்தான் கருத்தரிப்பு என்பது சரியாகத் திட்டமிட்டு, பெரியவர்கள் கண்காணிப்பில், குறிப்பாக மருத்துவ ஆலோசனைகளின் படி நடக்க வேண்டும் என வலியுறுத்துகிறோம். இல்லையேல் இது குழந்தை வளர்ப்பை வாழ்நாள் முழுக்க சுமையாக மாற்றிவிடும்.