நண்பர்கள் கட்டண சேவை’ உண்மையிலேயே சினிமா கற்றுக் கொடுத்த சிறந்த தொழில்தான். ‘வசூலை விட, விருதுகளை விட, இதுவே பெரிது’ என்று சசிகுமார் சொல்லியிருப்பது உன்னதம்!

திருவனந்தபுரம் பத்மநாப சுவாமி ஆலய நகைகளின் மதிப்பீடே வருடக் கணக்கில் நடந்தால் அவற்றின் மதிப்பு எந்த அளவு இருக்கும்? இந்த நகைகளை வைத்து இந்திய மக்களுக்கே உதவலாம் போல இருக்கே!

பள்ளிக்கூடங்கள் பலி வாங்கும் இடங்களாக மாறியதற்கு பலர், பல காரணங்களைச் சொல்லி நியாயப்படுத்தினாலும் நமது கல்வித் திட்டமும் பாடச் சுமையும்தான் முக்கிய காரணம் என்பதை பழநிபாரதி சுட்டிக் காட்டியிருப்பது நெத்தியடி!
 

- வரலட்சுமி முத்துசாமி, சென்னை37.

‘வினோத ரஸ மஞ்சரி’யில் சொக்க வைக்கிற அழகோடு ஜொலித்த அந்தப் பொண்ணைப் பார்த்துக் கிறங்கிப் போயிட்டேன். அது ஓர் ஆண் என்று படித்ததும் வடிவேலு போல, ‘ஷாக் ஆயிட்டேன்’!

- டி.ராஜாதிராஜன், புதுச்சேரி. 

வௌவால்களுக்குக் காவலாக வனாந்தரத்தில் வாழ்க்கை நடத்தும் பெரியவர் ஆறுமுகம் வியக்க வைக்கிறார். வௌவால்களின் மொழி பேசி அவற்றோடு உறவாடும் அவர், ‘குடும்பத்துக்கும் எனக்கும் ஒத்துப் போகல’ என்கிறபோது, மனித வர்க்கமே குற்றம் சுமந்து நிற்கிறது!
 

- கோ.கல்யாணசுந்தரம்,கோவை. 

‘இளமையில் கல்’ என்பார்கள். ஆனால், அந்த இளமைக் காலத்தில் கல்வியை இழந்து கல் சுமந்த தாமோதரன், தற்போது கல்வித் துறையிலேயே உச்சத்தை அடைந்திருப்பது அசத்தலான சாதனை.
 

-  இரா.வீரராகவன், காரமடை. 

பெண்களின் அழகைத் தூண்டில் புழுவாகப் பயன்படுத்தி மீன் பிடிப்பதைத்தான் இன்றைய விளம்பரங்கள் செய்கின்றன. இதைப் புரிந்துகொண்டு நிர்மலா தலைமையில் பெண்களே எதிர்ப்புக் குரல் கொடுப்பது பாராட்டுக்குரியது.
 

‘மெட்டி ஒலி’ புகழ் திருமுருகனின் ‘விஜயா டீச்சர்’ தொடரில் வரும் புகைப்படங்களைப் பார்க்கும்போது, அப்படியே சீரியல் பார்த்த எஃபெக்ட் கிடைக்கிறது. எழுத்து நடை சீரியல் லைட்டாக ஜொலி ஜொலிக்கிறது.
 

- வ.பத்மா, ஸ்ரீரங்கம்.

உலகம் வேண்டாம் என்று ஒதுக்குவதெல்லாம் இந்தியாவுக்கும், இந்திய மாநிலங்கள் ஒதுக்குவதெல்லாம் தமிழ்நாட்டுக்கும் வருவது வாடிக்கையாகிவிட்டது. அதில் புது வரவான நியூட்ரினோ ஆய்வுக் கூடம் பற்றி விஞ்ஞானி பத்மநாபன் சொல்லியிருப்பதைப் படிக்கும்போதே உடல் நடுங்கியது.
 

-  எஸ்.சூர்யகலா, கன்னியாகுமரி.