சாக்லேட் தின்றால் சான்றிதழ்!

முன்பெல்லாம் அமெரிக்காவுக்கு யார் சென்று வந்தாலும் தவறாமல் ஒரு குறிப்பிட்ட பிராண்ட் சாக்லேட் கொடுப்பார்கள். ஹெர்ஷே’ஸ்! இப்போது அந்த சாக்லேட் சர்வசாதாரணமாக உள்ளூரிலேயே ஏகமாய்க் கிடைக்கிறது.நாமும் பிரித்து வாயில் போட்டுக்கொண்டு அடுத்த வேலையை கவனிக்கப் போய் விடுகிறோம். ஆனால், அதை எந்த அளவு மெனக்கெட்டுத் தயாரிக்கிறார்கள் என்று யோசித்தெல்லாம் பார்த்ததில்லை.

அமெரிக்காவின் பென்சில்வேனியாவில் இவர்களுக்கென்று ஒரு குட்டி உலகமே இருக்கிறது! தெருவிளக்குகள்கூட ‘கிஸ்ஸஸ்’ சாக்லேட் வடிவத்தில்தான் அமைந்துள்ளன. பட்டிக்காட்டான் மிட்டாய் ஃபேக்டரியைப் பார்த்த மாதிரி  ஹெர்ஷே’ஸ் சாக்லேட் ஃபேக்டரியைச் சுற்றிப் பார்க்க அனுமதிக்கிறார்கள்.

பிரம்மாண்டமான ஒரு தீம் பார்க். கட்டணம் செலுத்தினால் நாம் பதிவு செய்த நாளின் முதல் நாள் மத்தியானத்திலிருந்தே அனுமதிக்கப்படுவோம். உண்மையில் அந்த ஒன்றரை நாளும் போதவே போதாது! ரோலர் கோஸ்டர்களும் ஜயன்ட் வீல்களும் கொசுக்கள் என்னும்படியான அவற்றின் தாத்தாக்கள் இங்குள்ளன. குட்டீஸ் முதல் 90 வயசுத் தாத்தாக்கள் வரை கவலையின்றி ஏறிப்போகிறார்கள். ஹோவென்று குதூகலம். தீம் பார்க் என்பதெல்லாம் ஒன்றுமேயில்லை என்றாகிவிட்டது சாக்லேட் ஃபேக்டரியைப் பார்த்தபோது.

இவர்களின் சாக்லேட் தயாரிப்பு கிறுகிறுக்க வைக்கிறது. கைபடாமல் தயாரிக்கப்படும் இதன் ஒவ்வொரு கட்டமும் நேர்த்தி + விரைவு + பிரம்மாண்டம் + தரம் என்றால் என்ன என்பதை உணர்த்துகிறது. “நீங்களே சாக்லேட் தயாரிக்கலாம்!” என்று ஒரு சிறப்புத் திட்டம்.
அடிப்படைப் பொருட்கள் முதல் கட்டத்திலும்... ஃப்ளேவர் அடுத்த கட்டத்திலும்... மேலே அமைக்கும் டிசைன் மற்றும் டெகரேஷன் அதற்கடுத்த கட்டத்திலும்... என்று ஆறு நிலைகள் உள்ளன.

ஒவ்வொன்றிலும் உள்ள ஏராளமான ஆப்ஷன்களில் நாம் விரும்பியதைத் தேர்ந்தெடுக்கலாம். நம் இஷ்டத்துக்கு வடிவமைக்கலாம். இப்படித் தயாரித்த சாக்லேட்களை நமக்கே பரிசாக அளிக்கிறார்கள்! கிட்டத்தட்ட ஓரடி நீள பேக் மு……ழுக்க சாக்லேட் நமக்குக் கிடைக்கிறது! குழந்தைகள் குதூகலமாக இதில் பங்கேற்கிறார்கள்.

இப்போது சில காரணங்களுக்காக இந்தத் திட்டத்தைத் தற்காலிகமாக நிறுத்தியிருக்கிறார்கள்.   ஹெர்ஷே’ஸ் மியூசியம் என்ற ஒன்று உள்ளது. உழைப்பின் உயர்வையும் விடா முயற்சி தரும் வெற்றியையும் தெரிந்து கொள்ள இதன் உள்ளே போனால் போதும், இந்த பிரம்மாண்ட சாக்லேட் தயாரிப்பு கம்பெனியின் நிறுவனர் மில்டன் ஹெர்ஷேயின் வாழ்க்கைச் சரிதத்தை இம்மி இம்மியாகப் புகைப்படங்களாகவும் திரைப்படங்களாகவும் காட்டுகிறது.

1857ல் பென்சில்வேனியாவில் ஏழை விவசாயக் குடும்பத்தில் ஹெர்ஷே பிறந்தார். படிப்பு ஏறாததால் அதை மூட்டை கட்டினார். எந்த வேலையிலும் நிலைக்க முடியவில்லை. ஒரு மிட்டாய்க்கடையில் கொஞ்சகாலம் வேலை செய்தார். பிறகு தன் அத்தையிடம் 150 டாலர்கள் கடன் வாங்கி ஃபிலடெல்ஃபியாவில் ஒரு ‘கேரமல்’ கடை வைத்தார்.  ஏற்றுமதி செய்யுமளவு உயர்ந்தார்.