அமெரிக்காவின் உள்நாட்டுப்போரில் கேப்டனாக இருந்து ஓய்வு பெற்றவர் கிட். அவர் போர்க்களத்தில் இருந்தபோது, மனைவி காலரா நோயினால் இறந்துவிட்டார். இப்போது தனக்கென்று யாருமே இல்லாமல் தனியாக வாழ்ந்துவருகிறார். ஊர் ஊராகச் சென்று நாளிதழில் வரும் சுவாரஸ்யச் செய்திகளை ஒரு கதையைப் போல படித்துக்காட்டுவது அவரது தொழில்.

இதற்காக பார்வையாளர்களிடம் ஒரு தொகையை வசூலித்து பிழைப்பை ஓட்டிக்கொண்டிருக்கிறார். தொழில் நிமித்தமாக ஓர் ஊருக்குச் செல்லும்போது, வழியில் தனியாகத் தவித்துக்கொண்டிருந்த ஜோஹன்னா என்ற சிறுமியைச் சந்திக்கிறார். பெற்றோரை இழந்தவள். பழங்குடியினரால் கடத்திக்கொண்டுபோய் வளர்க்கப்பட்டதால் அவளுக்கு ஆங்கிலம் தெரியாது.