Simple & Safety Diet
மருந்தென வேண்டாவாம் யாக்கைக்கு...
காய்கறி மற்றும் பழங்களை அடிப்படையாகக் கொண்ட சைவ உணவுமுறையை பின்பற்றுவதற்கு ஒவ்வொருவருக்கும் ஒவ்வொருவிதமான காரணம் இருக்கலாம். சிலர் தங்கள் உணவுக்காக விலங்குகளைக் கொல்லக்கூடாது என நம்புவார்கள்.
 சிலர் உடல்நலக் காரணங்களுக்காகக் காய்கறி உணவுக்கு மாறுகின்றனர். சிலருக்கு தங்கள் மதம் சார்ந்த காரணங்களும் இருக்கலாம். ஆனால், மற்ற சர்ச்சைகளுக்குள்ளும், வாதங்களுக்குள்ளும் செல்லாமல் காய்கறி உணவுமுறையின் சிறப்பம்சங்களைப் பற்றி உணவியல் நிபுணர் புவனேஸ்வரி சங்கரிடம் பேசினோம்...
‘‘சைவ உணவுமுறையை Simple and Safety Diet என்று சொல்லலாம். எல்லா வயதினருக்கும், எல்லா தரப்பினருக்கும் ஏற்ற உணவுமுறை இது. சைவ உணவுமுறையில் பழங்களும் காய்களும் நிறைந்திருப்பதோடு, கொழுப்பும் சிதையாக் கொழுப்பும் குறைவாக இருப்பதால், அது இதயநலனுக்குக் கூடுதல் நன்மை அளிக்கிறது. இந்த காய்கறி உணவிலும் சில வகைகள் உண்டு.
தற்போது Vegan Diet-டை பின்பற்றுபவர்கள் பச்சைக் காய்கறிகள், பழங்கள், பருப்பு, முளைகட்டிய பயிர், கொட்டைகள் போன்றவற்றை சாப்பிடுகின்றனர். இந்த வகையினர் விலங்குப் புரதம், முட்டை, பால் போன்ற விலங்கு துணை உணவுகள் மற்றும் இறைச்சி உணவுகள் எதையும் சாப்பிட மாட்டார்கள்.
காய்கறி உணவோடு பால் பொருட்களை மட்டும் சேர்த்து கொள்ளும் வகையினரை Lacto Vegetarian என்று சொல்கிறோம். இந்த வகை உணவுமுறையைப் பின்பற்றுபவர்கள் தாவர வகை உணவுப் பொருட்கள் மற்றும் பால் பொருட்களை சாப்பிடுவார்கள். ஆனால் முட்டை மற்றும் இறைச்சி போன்றவற்றை சாப்பிட மாட்டார்கள்.
தாவர வகை உணவுப் பொருட்கள், பால் பொருட்கள், முட்டை போன்றவற்றை சாப்பிடும் வகையினரை Lacto Ovo Vegetarian என்ற பெயரில் அழைக்கிறோம். பால் மற்றும் முட்டை சார்ந்த பொருட்களை சேர்த்துக் கொள்ளும் இவர்கள் இறைச்சியை மட்டும் சாப்பிட மாட்டார்கள்’’ என்பவர் அதன் சிறப்பம்சங்களைத் தொடர்ந்து கூறுகிறார்.
‘‘காய்கறி உணவில் இயற்கையாகவே கொழுப்பும் கலோரியும் குறைவாகவே இருக்கிறது. எனவே, இந்த முறையைப் பின்பற்றுபவர்களால் உடல் ஆரோக்கியத்திற்கு ஏற்ற எடையை சரியாக பேண முடியும். தாவர உணவுகளில் நார்ச்சத்தும் கூட்டு கார்போஹைட்ரேட்டுகளும் இருப்பதால் அவை வளர்சிதை மாற்றத்தை ஊக்குவிக்கின்றன.
இந்த செயல்முறையால் அதிக கலோரிகள் எரிக்கப்படுவதால் உடலில் கொழுப்பு அதிகம் சேராமல் இருக்கும். முழு தானியம், கொட்டை, பழம், காய்கறி போன்றவற்றிலிருந்து நார்ச்சத்து, ஆன்டி ஆக்சிடெண்ட், உயிர்ச்சத்துக்கள் மற்றும் முக்கிய தாதுக்கள் கிடைக்
கின்றன. பருப்புகள், முளைகட்டிய பயிர்கள், ஓட்ஸ், சோயா, சோயாப்பால், பீன்ஸ், விதைகள், பால், பாலாடைக்கட்டி போன்றவற்றை உண்பதால் உடலுக்குத் தேவையான அனைத்து முக்கிய அமினோ அமிலங்களும் கிடைக்கிறது.
பொதுவாக சைவ உணவில் அசைவ உணவைவிட நிறைவுற்ற கொழுப்புகள், கொலஸ்ட்ரால், விலங்குப் புரதம் போன்றவை குறைவாகவும் நார்ச்சத்து கூடுதலாகவும் இருக்கிறது. சைவமுறை உணவை சாப்பிடுபவர்களுக்கு உடல்பருமன், நீரிழிவு, மிகை ரத்த அழுத்தம், மிகை கொலஸ்ட்ரால், மாரடைப்பு போன்ற இதய நோய்கள் மற்றும் சில வகை புற்றுநோய்கள் ஏற்படும் ஆபத்து குறைவாக உள்ளது. இந்த உணவுமுறையால் ஒருவருடைய உடல் எடை குறைந்தபோதும், அவர் ஆற்றலோடு இருக்க அவை உதவுகிறது.
இறைச்சியைத் தவிர்ப்பது கொழுப்பு உள்ளெடுப்பதைக் குறைப்பதற்கான சிறந்த வழியாக உள்ளது. அசைவ உணவோடு ஒப்பிடும்போது சைவ உணவில் கொலஸ்ட்ரால் அளவு மிகவும் குறைவாக உள்ளது. கொலஸ்ட்ரால் குறைந்த காய்கறி உணவு நோய்த்தடுப்பு மண்டலத்தை மேம்படுத்தவும் உதவுகிறது. சைவ உணவுகள் வளர்சிதை மாற்றத்தை ஊக்குவித்து உடல் எடை குறைய உதவுகிறது.
ஊட்டச்சத்துமிக்க சைவ உணவுமுறை குறித்த விழிப்புணர்வு இருந்தால் உங்கள் உணவை அதற்கேற்றபடி திட்டமிட முடியும். அப்படி ஒரு திட்டமிட்ட காய்கறி உணவுமுறை மூலமாக குழந்தைகள், பெண்கள், முதியோர் ஆகிய அனைத்து வயதினரின் ஊட்டச்சத்து தேவைகளையும் நிறைவு செய்ய முடியும். இந்த உணவுமுறையானது நமது சுவை உணர்வுகளைத் திருப்திப்படுத்தும் அளவுக்கு பல்வேறு சுவைகளையும் வகை
களையும் உள்ளடக்கியதாக இருக்கிறது.
தற்போதைய நவீன வாழ்வியல்முறை மாற்றங்களும், நமது பாரம்பரிய உணவு கலாச்சாரத்தில் ஏற்பட்டுள்ள மாற்றங்களும் நமக்கு பல்வேறு உடல்நலப் பிரச்னைகள் ஏற்படுவதற்கு காரணமாக இருக்கிறது. துரித உணவு வகைகளைத் தவிர்ப்பதன் மூலம் இதுபோன்ற பிரச்னைகளைத் தடுக்கலாம். மேலும் காய்கறி உணவுமுறையால் ஏற்படும் நன்மைகளை அறிந்து, திட்டமிட்ட சமநிலையான காய்கறி உணவு முறையைப் பின்பற்றி உடலினை ஆரோக்கியமாக வைத்துக்கொள்ள முடியும்!’’
சைவ உணவின் மூலம் உடலுக்குத் தேவையான சத்துக்கள் நிறைந்த சமநிலை உணவைப் பெறுவதற்கு பின்வரும் ஆலோசனையைப் பின்பற்றலாம். உயிர்ச்சத்து டி : பால் மற்றும் சூரிய ஒளியிலிருந்து கிடைக்கிறது.சுண்ணாம்புச்சத்து: பால் பொருட்கள் மற்றும் கீரைகளிலிருந்து கிடைக்கிறது. புரதம் : பருப்பு, பால் பொருட்கள், முட்டை, சோயா, உலர் பீன்ஸ், கொட்டைகள் போன்றவற்றிலிருந்து கிடைக்கிறது.
இரும்பு : முட்டை, உலர் பீன்ஸ், உலர் பழங்கள், முழுதானியம் மற்றும் கீரைகளில் உள்ளது. துத்தநாகம் : முளைகட்டிய கோதுமை, கொட்டைகள், தானியங்கள், உலர் பீன்ஸ் மற்றும் பூசணி விதைகளில் உள்ளது. உயிர்ச்சத்து பி 12 : தாவர உணவில் பி12 உயிர்ச்சத்துக்கான ஆதாரம் எதுவும் இல்லை.
ஆனால், அதைத் தவிர அனைத்து முக்கிய உயிர்ச்சத்துக்களும், ஊட்டச்சத்துக்களும் அவற்றில் உள்ளது. நீங்கள் காய்கறியுடன் பால் அல்லது பாலும் முட்டையும் எடுத்துக் கொள்பவராக இருந்தால் உங்களுக்கு முட்டை, பால், தயிர், குறைந்த கொழுப்புள்ள பாலாடை போன்ற பிற பால்பொருட்கள், சோயா மற்றும் தானியங்கள் போன்ற பி12 சத்து சேர்க்கப்பட்ட உணவுப் பொருட்களை சாப்பிடுவதன் மூலம் இச்சத்து கிடைக்கிறது.
- க.கதிரவன்
|