மதுரை ஆண்டாள்புரத்தைச் சேர்ந்த கார்த்தி என்பவர் மதுரை உயர்நீதிமன்றத்தில் மனு ஒன்றைத் தாக்கல் செய்திருந்தார். ‘தென் தமிழகத்தின் பெரிய மருத்துவமனையான மதுரை ராஜாஜி அரசு மருத்துவமனையில், புற்றுநோயியல் பிரிவில் நுண் புற்றுநோய் செல்களைக் கண்டுபிடிப்பதற்கான பெட் சிடி ஸ்கேன் வசதி இல்லை.

இதனால் ஏழை நோயாளிகள் தனியார் மருத்துவமனைகளை அணுக வேண்டியுள்ளது. இதற்காக அங்கு  ரூ.15 ஆயிரம் முதல் 27 ஆயிரம் வரை வசூலிக்கப்படுகிறது. எனவே, ஏழை மக்களின் நலனைக் கருத்தில் கொண்டு மதுரை ராஜாஜி அரசு மருத்துவமனை புற்றுநோயியல் பிரிவில் பெட் சிடி ஸ்கேன் வசதியை ஏற்படுத்த உத்தரவிட வேண்டும் என குறிப்பிட்டிருந்தார்.

மேலும், சென்னை ராஜீவ்காந்தி அரசு பொது மருத்துவமனையில் வசூலிக்கப்படுவதை போல, மதுரை அரசு ராஜாஜி மருத்துவமனையிலும் பெட் சிடி ஸ்கேன் எடுக்க ரூ.10 ஆயிரம் கட்டணம் வசூலிக்கப்படலாம் எனவும் தெரிவித்தார்.

இதையடுத்து நீதிபதிகள், இதேபோன்ற வசதியை கோவை மற்றும் விழுப்புரம் அரசு மருத்துவக்கல்லூரி மருத்துவமனைகளில் ஏற்படுத்த இயலுமா என தமிழக சுகாதாரத்துறை செயலர் பதிலளிக்க உத்தரவிட்டனர். முக்கியமாக, இதற்கான கட்டணத்தை முதல்வர் காப்பீடு திட்டத்தின் கீழ் கொண்டுவர இயலுமா என்பது குறித்தும் பதிலளிக்க உத்தரவிட்டு வழக்கை ஏப்ரல் 24-ம் தேதிக்கு ஒத்திவைத்துள்ளனர்.