விளையாட்டு வீரர்களுக்கு அதிகப்படியான ஆற்றல் இன்றியமையாதது. ஆற்றலை மேம்படுத்த உடற்பயிற்சி மட்டுமில்லாமல் ஊட்டச்சத்து நிறைந்த உணவுகளையும் எடுத்துக்கொள்ள வேண்டும். 

அவர்கள் கடைகளில் விற்கப்படும் பாக்கெட் உணவுகளை தவிர்த்து, ஊட்டச்சத்து மிக்க உணவுமுறையினை கடைபிடிப்பது மட்டுமில்லாமல் அதன் முக்கியத்துவத்தினையும் தெரிந்துகொள்வது அவசியம் என்கிறார் ஊட்டச்சத்து நிபுணர் ஷைனி சுரேந்திரன்.விளையாட்டு வீரர்களின் உணவுமுறையில் ஊட்டச்சத்தின் முக்கியத்துவம்...

விளையாட்டுகளில் ஈடுபடுகிறவர்களின் ஊட்டச்சத்து மிகவும் அவசியம். ஆனால் அதற்கு தனிப்பட்ட ஊட்டச்சத்து நிபுணர்களின் ஆலோசனைகள் பெற வேண்டுமா என்று நினைக்க தோன்றும். ஆனால் எந்தவொரு விளையாட்டுகளிலும் ஈடுபடுபவர்களுக்கு ஊட்டச்சத்து மிக முக்கியமான இடம் வகிக்கிறது. 

சிறுவர்கள், பதின்பருவத்தினர், நடுத்தர வயதினர் மற்றும் 60  வயதை கடந்தவர்கள் கூட பல்வேறு விளையாட்டுகளில் இன்று ஈடுபடுகிறார்கள். போட்டிக்காக மட்டுமில்லாமல் பகுதி நேரமாக பொழுதுபோக்கு விளையாட்டு வீரர்களும் இன்று விளையாட்டுகளில் ஈடுபடுகிறார்கள். சிலர் விளையாட்டு மூலமாக தங்களின் ஃபிட்னஸினை பேணிக்காக்கிறார்கள்.

எனவே, சரியான ஊட்டச்சத்துக்கள் நிறைந்த உணவுமுறையை பின்பற்றவில்லையெனில் உடல் ஆரோக்கியத்தில் சில பிரச்னைகள் ஏற்படலாம். குறிப்பாக சிறுவர்கள் துடிப்பான விளையாட்டுகளில் ஈடுபடும் போது போதுமான ஊட்டச்சத்து கிடைக்கவில்லையெனில் அவர்களின் வளர்ச்சி பாதிக்கப்படலாம். 

உதாரணத்திற்கு வீட்டில் விளையாடிக் கொண்டிருக்கும் சிறுவர்களை நீச்சல், பேட்மிண்டன் போன்ற விளையாட்டுகளில் சேர்த்துவிடுவோம். அவர்கள் அந்த விளையாட்டுகளை முடித்துவந்த பின்னர் சோர்வாக காணப்படுவார்கள். 

அதனால் உணவு உட்கொள்ளாமல் தூங்கிவிடுவார்கள். உணவினை தொடர்ந்து தவிர்த்து வந்தால் காலப்போக்கில் அவர்களின் வளர்ச்சி பாதிக்கப்படும். எனவே கலோரி எக்ஸ்பெண்டிச்சர் மிகவும் முக்கியம். உட்கொள்ளும் உணவு மற்றும் எரிக்கக்கூடிய கலோரிகள் இரண்டின் சமநிலை முக்கியம். மேலும் உடலை நீரேற்றத்துடன் (hydration) வைத்திருப்பது ரொம்பவே முக்கியம்.

குழந்தைகளுக்கும் சிறுவர்களுக்கும் தெர்மோரெகுலேட்டரி(thermo regulatory)  முழுமை அடையாமல் இருக்கும். அதாவது, அவர்களுக்கு தண்ணீர் குடிக்க வேண்டுமென்கிற தாகமோ அதற்கான தூண்டுதலோ இருக்காது. நாம்தான் அவர்களுக்கு போதுமான அளவு தண்ணீர் குடிக்கும் பழக்கத்தை கொண்டு வரவேண்டும். 

தீவிரமான விளையாட்டுகளில் ஈடுபடுகிறவர்கள் கடுமையான நீரிழப்பு காரணமாக விளையாடும் போதே மயங்கி விடுவார்கள். நீரிழப்பு பிரச்னையை சாதாரணமாக எடுத்துக்கொள்ளக்கூடாது.

அதே சமயம் அளவுக்கு அதிகமான தண்ணீர் பருகும் போது அதிகப்படியான நீரேற்றம் (Overhydration) ஏற்படும். ஒருவருக்கு தண்ணீரின் தேவை என்ன என்று தெரிந்து கொண்டு அதற்கேற்ப அதனை எடுத்துக் கொள்ள வேண்டும்.

ஒருவரின் வயது, எடை, உயரம், செயல்பாடுகள், வசிக்கும் இடம், ஒரு நாளில் வெளியேறும் வியர்வையின் அளவு என்பதை பொறுத்துதான் டயட் ப்ளான் கொடுக்க வேண்டும். சரியான ஊட்டச்சத்து முறையினை பின்பற்றவில்லை என்றால் ஆரோக்கியத்தில் பாதிப்புகள் ஏற்படும்.

மற்றுமொரு மிக முக்கியமானது வயிறு சம்பந்தப்பட்ட கோளாறுகள். விளையாட்டுகளில் ஈடுபடும்போது வயிறு உப்புசம், வயிற்றுப்போக்கு அடிக்கடி ஏற்பட்டால் விளையாட்டில் கவனம் சிதறும். 

அதை தவிர்க்க விளையாட்டுப் பயிற்சிகளுக்கு முன்பும், பயிற்சியின் போதும், அதற்கு பின்பும் ஒருவரின் உடல் நிலைக்கு ஏற்ப உணவுகளை உட்கொள்வதில் கவனமாக இருக்க வேண்டும். வெளியூர்களில் போட்டிகளில் ஈடுபடும் போது தவறான உணவினை உட்கொண்டால் வாந்தி, மயக்கம், வயிறுக் கோளாறு போன்ற பிரச்னைகளில் சிக்கிக்கொள்ள வாய்ப்புள்ளது. விளையாட்டு வீர்கள் கடைபிடிக்க வேண்டியவை...

அடுத்து பயிற்சிகளின் போது காயங்கள் ஏற்படுவது. இந்த காயங்கள் சில நாட்களில் கணமாகிவிடலாம். ஆனால் சில நேரங்களில் அறுவை சிகிச்சை செய்யும் நிலை ஏற்படும். அந்த சமயத்தில் என்னைப் போன்ற ஸ்போர்ட்ஸ் டயட்டீஷியன்கள், மருத்துவர், பிசியோதெரபிஸ்ட் போன்றவர்களிடம் ஆலோசனை பெறுவது நல்லது.

அவரின் உடல்நிலையை பரிசோதித்து எந்தெந்த ஊட்டச்சத்து உணவுகளை வழங்கலாம் என்று தனிப்பட்ட டயட் பிளான் ஒன்றை தயாரித்து தருவார்கள். இதன் மூலம் அவருக்கு ஏற்பட்ட பாதிப்பில் இருந்து மீட்டெடுத்து திரும்பவும் அவர் பழைய நிலைக்கு செல்ல உதவி செய்வோம். இது ஒரு கூட்டு முயற்சி.

அதனை பயிற்சியாளரிடம் கலந்து பேசி பயிற்சி முறைகளை அமைத்துக்கொள்ள வேண்டும். உதாரணத்திற்கு போட்டிக்கு தயாராக ஒரு வருடம் இருக்கிறதெனில் பயிற்சிகள் கடுமையாக இருக்கும். ஒவ்வொரு நாளும் கடைபிடிக்க வேண்டிய பயிற்சிகள் மற்றும் அதற்கான உணவு முறைகளை பின்பற்ற வேண்டும். 

போட்டி விளையாட்டிற்கு முன்பு அவர்களின் ஸ்டாமினாவை அதிகரித்துக் கொள்வது அவசியம். உடலில் உள்ள கொழுப்பினை குறைத்து தசைகளின் எடையை கூட்ட வேண்டும் எனில் அதற்கேற்ப டயட்டும் மாறும்.

விளையாட்டு வீரர்களுக்கான ஊட்டச்சத்து எனும்போது சப்ளிமென்ட் உணவுகள் மட்டுமில்லாமல் இயற்கையான உணவுகளையே சரியான முறைகளில் எடுப்பது அவசியம். மேலும் எல்லோருக்கும் சப்ளிமென்ட்ஸ் கொடுக்க வேண்டும் என்ற அவசியமிருக்காது. 

விளையாட்டு பயிற்சிகளில் ஆரம்ப நிலையில் உள்ளவரா, இடைநிலையில் அல்லது அட்வான்ஸ் விளையாட்டு வீரரா என்பதை கவனித்து அந்த நபரின் தேவையை அறிந்து சப்ளிமென்ட் அவசியமா என்பதை தீர்மானிக்க முடியும்.

* முதல் தவறு இனிப்பு எடுத்துக்கொள்வதை முற்றிலும் தவிர்ப்பது. ஒரு நாளைக்கு 4 முதல் 6 மணி நேரம் பயிற்சி முடித்து சோர்வாக உணரும்போது இனிப்பு உணவுகளை சாப்பிட்டால் உடனடியாக எனர்ஜி கிடைக்கும். 

பழச்சாறு, மில்க் ஷேக், க்ளுக்கோஸ் போன்றவற்றை சோர்வடையும் சமயங்களில் எடுத்துக்கொள்ளலாம். ஒரே நாளில் எனர்ஜி குறைந்து மறுநாள் உடற்பயிற்சி செய்யமுடியாத நிலைக்கு போகக்கூடாது. உலர்ந்த பழங்கள் மற்றும் பழங்களை எடுப்பது சிறந்தது.

* வெள்ளரி, தக்காளி, கேரட் என பச்சைக் காய்கறிகளை உடல் எடையை குறைக்க நினைப்பவர்கள் சாப்பிடலாம். ஆனால், விளையாட்டு துறையில் இருப்பவர்களுக்கு, கார்போஹைட்ரேட்ஸ் முதல் அனைத்து ஊட்டச்சத்துக்களும் தேவைப்படும். 

காய்கறிகளை கூட்டாகவும், உருளை, சேனைக்கிழங்கு, பீட்ரூட் போன்ற காய்கறிகள் அதிகம் சாப்பிடலாம். இதனால் அதிகம் பசி இல்லாமல் விளையாட்டுகளில் ஈடுபட முடியும். விட்டமின்ஸ், மினரல்ஸ், ஆன்டி-ஆக்சிடென்ட்ஸ் இவையெல்லாம் கிடைக்கும்.

* இரவு நேரங்களில் உணவை தவிர்ப்பது தவறு. அதிக நேரம் பயிற்சிகளில் ஈடுபடுபவர்கள் இரவு உணவினை தவிர்த்தால் வளர்ச்சி பாதிக்கப்படும். குறிப்பாக சிறுவர்கள். ஊட்டச்சத்து குறைவினால் காயங்கள் ஏற்பட வாய்ப்புள்ளது. 

8 வேளை உணவு அடங்கிய டயட் ப்ளான் மூலம் உடலுக்கு தேவையான அனைத்து ஊட்டச்சத்துகளையும் சரி செய்யலாம். புரதம் நிறைந்த உணவுகளை இரவு நேரங்களில் சாப்பிட்டால், மறுநாள் புத்துணர்வாக இருப்பார்கள், பயிற்சிகளில் கவனம் செலுத்த முடியும்.