சென்சாரோடு மோதிய படம்!

இயக்குநர் மோகன்ராஜாவின் உதவியாளர் என்பதாலேயே அவருடைய சிஷ்யர் ராகேஷ் இயக்கியுள்ள ‘மறைந்திருந்து பார்க்கும் மர்மமென்ன’ படத்துக்கு எதிர்பார்ப்பு இண்டஸ்ட்ரியில் ஏகத்துக்கும் கூடியுள்ளது. விரைவில் வெளியாகவுள்ள இந்தப் படத்தைப் பற்றி அதில் பணியாற்றிய கலைஞர்கள் தங்கள் அனுபவங்களை நம்முடன் பகிர்ந்து கொண்டார்கள்.

இந்தப் படத்தில் ‘திலகர்’ துருவா ஹீரோவாக நடிக்க, ஹீரோயின்களாக ஐஸ்வர்யா தத்தாவும், அஞ்சனா பிரேமும் நடித்திருக்கின்றனர். இவர்களுடன் ராதாரவி,​ ​சரண்யா பொன்வண்ணன், மனோபாலா, மைம் கோபி, அருள்தாஸ், ராம்ஸ், ஜே.டி சக்கரவர்த்தி என பெரிய நட்சத்திரப் பட்டாளமே நடித்துள்ளது.

தயாரிப்பாளர் மதியழகன் சொல்லும்போது, ‘‘இது எங்களது தயாரிப்பில் உருவாகியுள்ள எட்டாவது படம். சமூக விழிப்புணர்வுடன் எடுக்கப்பட்டுள்ள இந்தப் படத்திற்கு சென்சார் சர்டி​ஃ​பிகேட் வாங்குவதற்குள் போதும் போதுமென்று ஆகிவிட்டது. ‘இருட்டு அறையில் முரட்டுக்குத்து’க்கு ‘ஏ’ சான்றிதழ் தருகிறார்கள். ஆனால் இந்தப் படத்திற்கு சான்றிதழே தர மறுத்துவிட்டார்கள்.

ஒரு நீண்ட போராட்டத்துக்குப்பின்தான் சான்றிதழே பெறமுடிந்தது. இதுவரை எட்டு படங்கள் எடுத்துள்ளோம். இந்தப் படம் எங்களுக்கான முத்திரையாக அமையும். இதுபோன்ற சமூக விழிப்புணர்வை ஏற்படுத்தும் படங்களுக்கு ரசிகர்கள் ஆதரவு தருவார்கள் என்று நம்புகிறோம். அப்போதுதான் இதுபோன்ற படங்களைத் தொடர்ந்து தரமுடியும்’’ என்றார்.

‘‘இந்தப் படத்தின் தலைப்பையே ​​இயக்கு​நர் பொதுமக்களை​ப்​ பார்த்துக் கேட்பது போலத்தான் இயக்குநர் வைத்துள்ளார். காரணம், ரோட்டில் வழிப்பறி போல எந்த சம்பவம் நடந்தாலும் நமக்கு ஏதாவது ஆகிவிடுமோ என​ப்​ பயந்து, மறைந்திருந்துதான் பார்க்கிறோம். அதை​​ தடுக்க முயற்சிப்பதில்லை. விழிப்புணர்வு நோக்கத்துடன் எடுக்கப்பட்ட படம் இது’’ என்றார் ​நடிகர் ​பாரதி மோகன்.

முக்கிய கேரக்டரில் நடித்துள்ள மாஸ் ரவி பேசும்போது, ‘‘டைரக்டர் ராகேஷ் என்னை​க்​ கூப்பிட்டு, இந்தப் படத்துல ஒரு நல்ல கேரக்டர் இருக்குன்னு சொல்லி ‘சப்பை’ங்கிற கேரக்டர்ல நடிக்க வெச்சிருக்கார். செயின் அறுக்கிற ஆளாதான் நடிச்சிருக்கேன். இதுக்காக ஏராளமான பஸ் நிலையம், ரயில் நிலையங்களில் பிக்பாக்கெட்காரர்களை நோட்டம் விட்டு நோட்ஸ் எடுத்து நடித்தேன்’’ என்றார்.

நடிகர் மனோபாலா பேசும்போது, ‘‘ராகேஷோட இந்த இரண்டாவது படத்துலயும் நான் நடிச்சிருக்கேன். பொதுவாக நான் நடிக்கும் படங்களில் என்னுடைய வேலைகளை முடித்துக் கொடுத்துவிட்டு அடுத்த படங்களில் மூழ்கிவிடுவேன். ஆனால் இந்தப் படம் எனக்கு கொஞ்சம் ஸ்பெஷல். அதான் இந்தப் படத்தின் புரோமோஷன் வேலைகளில் தவறாமல் கலந்து கொள்கிறேன்’’ என்றார்.

மைம் கோபி பேசும்போது, ‘‘இந்தப் படத்துல செயின் அறுக்கிற கூட்டத்துக்கு தலைவனா நடிச்சிருக்கேன். இந்தப்படம் வெளியான பின்னாடி அநேகமாக செயின் அறுக்க என்னைத்தான் கூப்பிடுவாங்கன்னு நினைக்கிறேன். நான் தான் ஸ்கெட்ச் போட்டுத் தரணும்’’ என்றார்.

படத்தின் நாயகன் துருவா பேசும்போது, ‘‘சென்சாரில் சான்றிதழ் கொடுக்க மறுத்து, அது பத்திரிகை மூலமாக செய்தியாக வெளியானப்பதான் இப்படி ஒரு படம் இருக்குன்னே வெளியே தெரிஞ்சது. டைரக்டர் ராகேஷ் மத்த எல்லா யூனியன்லேயும் கார்டு வாங்குற அளவுக்கு எல்லா வேலையையும் இறங்கி செஞ்சாரு. எனக்கு ஜோடியா வர்ற ஐஸ்வர்யாதத்தாவும் அஞ்சனாவும் மிகச் சிறப்பான நடிப்பை வழங்கியுள்ளார்கள்” என்றார்.

முத்தாய்ப்பாக ​இயக்குநர் ராகேஷ் பேசும்போது, ‘‘எத்தனையோ போராட்டச் செய்திகள் புதுசு புதுசா தினசரி பேப்பர்ல வந்தாலும் நாள் தவறாம இடம் பிடிச்சுட்டு வர்றது செயின் பறிப்பு சம்பவங்கள்தான். அதுதான் இந்தப் படத்தை எடுக்க என்னைத் தூண்டுச்சு.  நள்ளிரவு 12 மணிக்கு ஒரு பெண் நகை அணிந்துகொண்டு தனியாக நடந்துபோனா அதுதான் உண்மையான சுதந்திரம்னு மகாத்மா காந்தி சொன்னார்.