ஆனந்தம் வசனகர்த்தா பிருந்தாசாரதி

டைட்டில்ஸ் டாக் 90

ஆனந்தம் என்பது வெறும் சொல்லல்ல. அது ஒரு மனநிலை. அந்நிலையை அடைந்தபிறகு அதற்குக் கீழான நிலைகளை மனது நினைத்துக் கூடப் பார்க்காது. ஆம்... எல்லாச் சொற்களுக்கும் எதிர்ச் சொற்கள் உண்டு. இன்பம் / துன்பம், மேடு / பள்ளம், வெளிச்சம் / இருட்டு இது போன்று... ஆனால் ஆனந்தம் என்பதற்கு எதிர்ச்சொல் ஏதுமில்லை. அந்நிலை மகிழ்ச்சியல்ல. மகிழ்ச்சி என்றால் மறுபக்கம் துன்பமுண்டு...

இது உலகின் நல்லது கெட்டது எல்லாவற்றையும் ஆராய்ந்து, கெட்டது எது எது என்பதை ஒவ்வொன்றாக அறிந்து அதிலிருந்து மனதை விலக்கி விலக்கி நல்லதின் பால் நிலை கொண்ட அறிவு அது. அதனால் அங்கு ஏற்றமும் இல்லை... இறக்கமும் இல்லை... புற உலகின் ஏற்ற இறக்கங்கள் எதுவும் அந்நிலை அடைந்தோரின் அகத்தைப் பாதிப்பதில்லை.

இப்படி ஒரு தலைப்பை இயக்குநர் என் நண்பர் என்.லிங்குசாமியின் முதல் திரைப்படத்திற்குப் பெயராக வைத்தோம். ஆம்... இருவரும் சேர்ந்து வைத்த தலைப்புதான் அது. அந்நாட்களில் எங்கள் இருவரையும் தனித்தனியே பார்ப்பது அரிது. கும்பகோணத்திலேயே கவிதை எங்களை இணைத்திருந்தது. அது சென்னையிலும் தொடர்ந்தது.

உதவி இயக்குநர்களாக வாய்ப்புத் தேடி சென்னை வந்த சில நாட்களிலேயே இருவரும் ஒன்றாகத் தங்குவதென முடிவெடுத்து ஒரே அறை பிடித்து தங்கினோம். வேறு சில நண்பர்களும் பின் அவ்வறையில் வந்து சேர்ந்தனர்.நான் நடிகரும் இயக்குநருமான நாசர் அவர்களிடம் ‘அவதாரம்’ படத்திலும், அவர் இயக்குநர் ஏ.வெங்கடேஷ் அவர்களிடம் ‘மகாபிரபு’ படத்திலும் உதவி இயக்குநர்களாகச் சேர்ந்தோம்.