டாக் ஆஃப் த டவுன் நடிகை ஸ்ரீரெட்டிதான். பட வாய்ப்பு வழங்குவதாக உறுதியளித்து பல இயக்குநர்களும், நடிகர்களும் தன்னை பாலியல் ரீதியாக சுரண்டியதாக  அவர் அறிவித்திருக்கிறார்.இத்துடன் ‘தினப் பலன்’ சொல்வது போல் நாள்தோறும் ஒரு பிரபலமானவரின் பெயரை உதிர்த்து, ‘இவர்கள்தான் என்னைப் ‘பயன்’படுத்தியவர்கள்...’ என தன் சமூக வலைத்தளப் பக்கங்களில் பட்டியலிட்டு வருகிறார்.இப்போது தமிழகத்தை மையம் கொண்டிருக்கும் இந்த ஸ்ரீரெட்டி புயல், சில மாதங்களுக்கு முன்பு வரை தெலுங்குத் திரையுலகைச் சுழற்றி அடித்த சுனாமிதான்.

துணை நடிகை, இரண்டாம் நிலை நடிகை என்றெல்லாம் சுட்டப்படும் ஸ்ரீரெட்டி, தனது Sri Reddy, Sri leaks வலைப்பக்கத்தில் தன்னை பாலியல் ரீதியாக சுரண்டியவர்கள் என பல முன்னணி தெலுங்கு தயாரிப்பாளர்களையும், அவர்களது மகன்களையும், பிரபல இயக்குநர்கள் மற்றும் நடிகர்களையும் பெயர் சொல்லியும், குறிப்பால் உணர்த்தியும் குற்றம்சாட்டினார்.இவற்றுக்கு எல்லாம் சிகரம் ஐதராபாத்திலுள்ள திரைப்பட வர்த்தக சபை முன் இவர் அரை நிர்வாணப் போராட்டம் நடத்தியதுதான்.ஒருவழியாக தெலுங்கு சினிமாவில் பெரும் அதிர்வலையை ஏற்படுத்தி விட்டு இப்போது தமிழ்த் திரையுலகம் பக்கம் தன் கவனத்தைத் திருப்பியிருக்கிறார்.