கிறிஸ்துவ மத அமைப்புக்காக கச்சேரி செய்ய ஒப்புக் கொண்டு எதிர்ப்பு வந்ததும் ஏன் ரத்து செய்தீர்கள்?

உளளம் திறக்கிறார் ஓ.எஸ்.அருண்

சங்கீதம் கற்றோம், சம்பாதித்தோம், புகழ் பெற்றோம், வசதிகளை பெருக்கிக் கொண்டோம் என்று சராசரி வித்வானாக வாழ்வை சுருக்கிக் கொள்ளாமல் அதற்கு மேல் இந்த சமூகத்திற்கு ஏதாவது செய்ய வேண்டும் என மனதார நினைப்பவர் பாடகர் ஓ.எஸ்.அருண். கர்நாடக இசையை கடைக் கோடி மனிதனுக்கும் கொண்டு போக எண்ணுபவர்.

அண்மையில் ஜெர்மனியிலுள்ள ஓர் பல்கலைக்கழகம் இவருக்கு கௌரவ டாக்டர் பட்டம் அளித்துள்ளது. அருணின் கச்சேரிகளுக்கு, குறிப்பாக பஜன்ஸுக்கு தமிழகம் தாண்டியும் பெரிய கூட்டமுண்டு!எதற்காக இந்த டாக்டர் பட்டம்?

‘யுனிவர்சிட்டி ஆஃப் பீஸ்’ என்ற ஜெர்மனியின் ‘அமைதி பல்கலைக்கழகத்தை’ச் சேர்ந்தவர்களிடம் என் இசையைப்பற்றியும், எனது அறக்கட்டளை மூலம் நடக்கும் நல்ல காரியங்கள் பற்றியும் சில நண்பர்கள் தெரிவித்துள்ளனர். அவற்றையெல்லாம் உறுதி செய்து கொண்டு என்னை அழைத்து கௌரவித்தார்கள்!

சில வாரங்களுக்கு முன் புதுச்சேரியில் இந்த விழா நடந்தது. எனக்கு கர்நாடக சங்கீதத்திற்காக இந்த மரியாதை என்றால் நாட்டுப்புறப் பாடல்களைப் பாடிவரும் சின்னப் பொண்ணையும் அழைத்து கௌரவித்தனர். ஆர்ப்பாட்டமில்லாமல் நாம் செய்யும் விஷயங்களை யாரோ சிலர் கவனித்து மரியாதை செய்யறபோது மனது பூரிக்கிறது. மேலும் ஆர்வம் வருகிறது.

கர்நாடக சங்கீதக் கச்சேரிகளின் மூலம் மளமளவென்று மேலே வந்தவர் நீங்கள். ஏன் இப்போது பஜன்ஸ் கச்சேரிகளில் அதிக கவனம் செலுத்துகிறீர்கள்?