கூகுள் ப்ளேஸ்டோரில் நவம்பர் 2018ல் டிக்டாக்கிற்குப் போட்டியாக ஒரு app களமிறங்கியது. அப்போது யாருமே அதை கண்டுகொள்ளவில்லை. இப்படியொரு ஆப் ப்ளேஸ்டோரில் இருப்பது கூட பலருக்குத் தெரியாது.

ஜூன் 10, 2020 வரை ஒரு லட்சம் தடவை மட்டுமே அந்த ஆப் டவுன்லோடு செய்யப்பட்டது. இதற்குப் பிறகு நடந்தவை எல்லாமே மேஜிக். ஆம்; இந்திய அரசு 59 சீன ஆப்களைத் தடை செய்தது. அதில் டிக்டாக்கும் அடக்கம். அவ்வளவுதான். டிக்டாக்கிறகுப் போட்டியாக இருந்த அந்த ஆப் அதற்கு மாற்றாகவே மாறிவிட்டது.

குறிப்பாக ஜூன் 30ம் தேதியன்று மட்டும் ஒவ்வொரு மணி நேரத்துக்கும் 3 லட்சம் முதல் 6 லட்சம் வரை இந்த app டவுன்லோடு செய்யப்பட்டு சாதனை படைத்துள்ளது. கூகுள் ப்ளே ஸ்டோரில் டாப் லிஸ்ட்டில் இடம்பிடித்த இந்தியன் app என்ற பெருமையையும் தன்வசமாக்கி விட்டது.

இந்தி, பெங்காலி, தமிழ், குஜராத்தி, கன்னடம், மராத்தி, தெலுங்கு, ஒடியா, ஆங்கிலம், மலையாளம், பஞ்சாபி ஆகிய மொழிகளில் கிடைக்கிறது. கூகுள் ப்ளே ஸ்டோர் மற்றும் ஆப்பிள் app ஸ்டோரில் டவுன் லோடு செய்ய முடியும்.சிங்காரியில் பதிவு செய்யப்படும் வீடியோக்கள் எத்தனை முறை பார்க்கப்படுகிறது என்று கணக்கிடப்பட்டு பாயிண்ட்ஸ் வழங்கப்படும்.

வீடியோவைப் பதிவிட்டவர் அந்த பாயிண்ட்ஸை பணமாக மாற்றிக்கொள்ளலாம். இது சிங்காரியின் சிறப்பு. லட்சக்கணக்கில் டவுன்லோடு எகிறிய நாட்களில் இதன் சர்வர் தாங்கவில்லை. சர்வரைக் காப்பாற்ற இதன் நிறுவனர்கள் தினமும் இரண்டு மணி நேரம் வரையே தூங்கியிருக்கின்றனர்.