“இன்னிக்கு நினைத்தாலும் ஆச்சர்யமா இருக்கு. அண்ணன் ஜீவன் சினிமாவில் ஸ்டில் போட்டோகிராபராக இருந்தார். அவர்கிட்ட ஒரு அசிஸ்டெண்டாக இருந்தேன். பெரிசா ஈடுபாடு அப்ப இருந்ததில்லை. அடுத்தடுத்து வேலை செய்யும்போது பிடிப்பு வந்த மாதிரியிருந்தது.

எனக்கு எப்பவும் இயக்குநர்கள் கூட இணைந்து வேலை பார்க்கத்தான் பிரியம். கதையை மீறவே கூடாது. நம்ம சௌகரியத்திற்காக கதையை மீறிப்போவது அறமல்ல. அங்கே ஏன் நாம் தெரியணும்! அப்படி ஓர் இயக்குநர்கிட்டேயும் சேர்ந்து வேலை செய்யும்போது அது அவங்க படமாகவே வருது.

எனக்கும் சுகுமார் படம்னு தனிச்சுத் தெரியணும்னு ஆசை கிடையாது. இயக்குநர் பார்வையை மீறாததுதான் நமக்கு அழகு. இன்னும் நிறைய வருஷம் கழிச்சு பார்க்கும்போது விதவிதமாக படங்கள் பண்ணியிருக்கோம்னு ஒரு மகிழ்ச்சி இருக்கணும்.