மூத்த வீரர்கள் சொதப்பிய போட்டியிலும் கூட தோனி- சுரேஷ் ரைனாவின் புதிய கூட்டணி, இந்தியாவை வெற்றிக்கோட்டுக்கு அழைத்துச் சென்று தொடரை வெல்லக் காரணமானது.

வழக்க மான கிரிக்கெட் பேட்டிங் ஸ்டைலை விட்டு விலகி, முற்றிலுமாக தன்னுடைய தனித்துவமான பாணியை தோனி அறிமுகப்படுத்தியது அந்தப் போட்டியில்தான்.ஸ்ட்ரீட் கிரிக்கெட் பாணியிலான ஸ்ட்ரோக்குகளை அவர் பயன்படுத்த ரசிகர்களுக்கு புதுமையான அனுபவம் கிடைத்தது.

அகமதாபாத் நகரில் நடந்த அடுத்த போட்டியில் தோனியை ஒன் டவுன் ஆர்டரில் களமிறக்கினார் திராவிட்.ஆனால் -சந்தித்த முதல் பந்திலேயே விக்கெட்டை இழந்து டக்-அவுட் ஆனார் தோனி.இம்முறை ரசிகர்களுக்கு அவர் மீது கோபம் வரவில்லை.

ஏனெனில் ஏற்கனவே இரண்டு போட்டிகளை வென்று கொடுத்தவர் என்கிற மரியாதைதான் காரணம்.திராவிட்டும், காம்பீரும் தலா 103 ரன்கள் விளாசியும், தன்னுடைய அபாரமான மிடில் ஆர்டர் பேட்டிங் துணையுடன் அப்போட்டியை வென்றது இலங்கை.

இலங்கை அணியின் அப்போதைய பயிற்சியாளரான கிரிக்கெட் ஜாம்பவான் டாம் மூடி, “தோனி எங்கள் அணியை அழித்து விட்டார்...” என்று புலம்பினார்.346 ரன்கள் (ஆவரேஜ் 115.33) என்று தொடரைக் கலக்கிய தோனியே, ‘மேன் ஆஃப் த சீரிஸ்’ ஆக தேர்ந்தெடுக்கப்பட்டார்.

ஏற்கனவே சொன்ன மாதிரி, இத்தொடரில்தான் அவருக்கு விலைமதிக்க முடியாத சுரேஷ் ரைனாவின் நட்பும் கிடைத்தது.இருவரும் இணைபிரியா நண்பர்களாக மாறியது இயல்பானது. இருவருமே சிறுநகரங்களில் இருந்து கிரிக்கெட் ஆட வந்தவர்கள்.

தோனி பீகாரின் ராஞ்சி நகரிலிருந்தும், ரைனா உத்தரப் பிரதேசத்தின் முராத் நகரிலிருந்தும் கிளம்பி வந்து சர்வதேச கிரிக்கெட்டில் சாதித்தவர்கள்.வளரும் நிலையில் இருந்தபோது பெருநகரங்களில் இருந்து வந்த வீரர்களின் கேலி, கிண்டல், ஒடுக்குமுறைகளை ஒரே மாதிரியாக எதிர்கொண்டவர்கள்.ஆரம்பத்தில் ஆங்கிலம் பேசுவது இருவருக்குமே பெரிய பிரச்னையாக இருந்தது.

மிடில் ஆர்டரில் இவர்களது கூட்டணி அமைத்திருக்கும் சாதனைகள், இன்னும் பல ஆண்டுகளுக்கு எந்த ஒரு பார்ட்னர்ஷிப்பாலும் நினைத்துக்கூட பார்க்க முடியாத அளவுக்கு வலிமையானது.இருவரும் இணைந்தாலே எத்தகைய இலக்கையும் எட்டி விடுவார்கள் என்று எதிரணிகள் அஞ்சி நடுங்கின.

ஐபிஎல்லின் போதுதான் தோனியை ‘தல’ என்று தமிழக ரசிகர்கள் கொண்டாட ஆரம்பித்தார்கள். தோனி ‘தல’ ஆகிவிட்டதால், ஆட்டோமேட்டிக்காக ரைனாவும் ‘சின்ன தல’ ஆகிவிட்டார்.

எந்தளவுக்கு இவர்களது நட்பு நெருக்கமானது என்றால் -2015ம் ஆண்டு தோனி மேற்கிந்தியத் தீவுகளில் உலகக்கோப்பைப் போட்டிகளில் விளையாடிக் கொண்டிருந்தார். இங்கே குர்கான் நகரில் ஒரு மருத்துவமனையில் தோனியின் மனைவி சாக்‌ஷிக்கு மகள் பிறந்திருந்தாள்.திருமணமாகி ஐந்து ஆண்டுகள் தவமாய் தவமிருந்து பிறந்த மகள்.சாக்‌ஷி, தன் கணவருக்குக் கூட விஷயத்தைச் சொல்லவில்லை.