சென்னை-ஆந்திரா எல்லைப்பகுதியான கும்மிடிப்பூண்டியில் இருந்து சற்று வலது புறம் பயணித்தால் பல எழில்மிகு கிராமங்களைத் தரிசிக்கலாம். உழவுக்காகத் தயார் செய்யப்படும் வயல்களில் வாத்துகள் மேய்கின்றன. சாலையோரங்களில் பூத்து நிற்கும் செடிகளில் அணில்கள் தாவிச் செல்கின்றன. 

இன்னும் ஏராளமான காட்சிகள் மனதுக்கு இதம் கூட்டுகின்றன. இந்தச் சூழலில் தொடரும் பயணத்தில் தேவம்பட்டு கிராமத்தை அடையலாம். சரியாக பொன்னேரிக்கு சற்று கூப்பிடு தொலைவில் இருக்கிறது இந்தக் கிராமம். தமிழகக் கிராமங்களில் இந்தக் கிராமம் மட்டும் தனித்துத் தெரிகிறது. ஊர் நடுவே சிறிதும், பெரிதுமாக வீடுகள் நிறைந்திருக்கின்றன.

நாம் சென்ற காலைப்பொழுதிலும் இந்த வேலைகளில் மும்முரமாக இருந்தனர். பணிகளுக்கு இடையே தேவம்பட்டு கிராமம் வண்ண மீன் கிராமமான கதையைப் பகிர்ந்துகொண்டார், இந்த ஊரின் முன்ளாள் தலைவரான ரவி.``மற்ற ஊர்களை மாதிரி தேவம்பட்டும் நெல், மணிலான்னு வளமாக விவசாயம் பார்த்த ஊருதான். போகப்போக இந்த ஊரோட முகம் மாற ஆரம்பிச்சிது. தண்ணி சவுறடிக்க ஆரம்பிச்சதால விவசாயம் பண்ண கஷ்டமா இருந்துச்சி.

என்னடா நம்ம நிலமை இப்படி ஆயிடுச்சேன்னு நினைச்சோம். ஆனா அந்த சவுறுத்தன்மைதான் எங்க ஊரு இப்ப தனியா தெரிய காரணமா இருக்குது. சவுறு நிலம்ங்குறதால அலங்கார மீன்கள் நல்லா வளருது. இதனால நாங்க இதையே வாழ்வாதாரமா மாத்திக்கிட்டோம்’’ என வண்ண மீன்கள் இங்கு வந்த பூர்வகதையைச் சொன்னார் ரவி.

சொந்த நிலம் 8 ஏக்கர், குத்தகை நிலம் 7 ஏக்கர் என 15 ஏக்கரில் பரந்து விரிந்திருக்கிறது ரவியின் மீன் வளர்ப்புக்குளம். ஒவ்வொரு குளத்திலும் கோல்டன் ஃபிஷ், மாப், டின் பைல், மாலி என விதம் விதமான மீன்கள் நீந்துகின்றன.

நீருக்கடியில் நீந்தும் மீன்கள் நம் மனதுக்கு மிக நெருக்கமாகிவிடுகின்றன. அவரது குளம் மட்டுமில்லை. ஊரில் உள்ள மற்ற குளங்களிலும் தளும்பி வழிகிறது வண்ண மீன்களின் கொள்ளை அழகு. அனைத்துக் குளங்களையும் சுற்றிப் பார்க்க ஒருநாள் போதாது. சில குளங்களைக் காண்பித்தவாறு தொடர்கிறார் ரவி.

``என்னைப் பார்த்துட்டு ஊருல நிறைய பேரு அலங்கார மீன் வளர்க்க ஆரம்பிச்சாங்க. விவசாயம் பண்ண முடியாத நிலங்களையெல்லாம் மீன் வளர்ப்புக்குளமா மாத்திட்டாங்க. இப்ப வண்ண மீன்கள்தான் எங்க ஊரோட அடையாளமாவே மாறியிருக்கு. 60 குடும்பங்கள் இந்த மீன் வளர்ப்புக் குளங்களை அமைச்சிருக்கு. 

400 குடும்பங்கள் இந்தத் தொழிலை நம்பி இருக்கு. மீன் பிடிக்குறது, மீன் குட்டை பராமரிக்கிறதுன்னு பல வேலைகளுக்கு தொழிலாளர்கள் வராங்க. அவுங்க எல்லாத்துக்கும் இந்த வண்ண மீன்கள்தான் சோறு போடுது. இதனால தேவம்பட்டு வண்ண மீன் வளர்ப்பு கூட்டுறவு சங்கம்னு ஒரு சங்கமே ஆரம்பிச்சிருக்கோம்’’ என்ற தகவலோடு முடித்துக்கொண்டார் ரவி.

அலங்கார மீன் வளர்க்க குளம் நல்லபடியா அமைக்கணும். அதுக்காக 4 அடி ஆழத்துக்கு குளம் வெட்டுவோம். அதுல ஒரு அடி ஆழத்துல தண்ணி விடுவோம். தண்ணி விட்டதுக்கு அப்புறம் 4 நாள் கழிச்சி யூரியா, காம்ப்ளக்ஸ், டிஏபி, வேப்பம்புண்ணாக்கு கலந்து போடுவோம். இந்தக் கலவைய போடுறதால தண்ணியோட நிறம் மாறி, குளிர்ச்சியாகும். 

அதுல சின்னச் சின்ன பூச்சிங்க உற்பத்தியாகும். இந்தப் பூச்சிங்க மீன்களுக்கு நல்ல இரையா இருக்கும். யூரியா கலவை போட்டதுக்கு அப்புறம் 3 நாள் கழிச்சி 3 அடி உயரத்துக்கு தண்ணி விடுவோம். அப்புறமா 4 நாள் கழிச்சி மீன் குஞ்சுகளை வாங்கிட்டு வந்து விடுவோம். மீன் குஞ்சுகளுக்கு காலை 6-7 மணிக்கு தீவனம் கொடுப்போம்.

கோதுமை, சோளம், கம்பு, கேழ் வரகு, அரிசியை அரைச்சி, அது கூட 10 கிலோவுக்கு ஒரு கிலோங்குற அளவுக்கு கருவாட்டுத்தூளைக் கலந்து வேக வைப்போம். இதுதான் மீன்களுக்கான தீவனம். குளத்துல அங்கங்க தண்ணிக்குள்ள ஒரு தட்டு வச்சி, அதுல தீவனத்தை வைப்போம். அதைக் கொஞ்சம் கூட மிச்சம் வைக்காம மீன்கள் சாப்பிட்டு விடும். 

தட்டுல தீவனம் மீதமா இருந்தா அதுங்களுக்கு ஜீரணம் ஆகலன்னு அர்த்தம். அதுபோன்ற நாட்கள்ல மறுநாளுக்கு தீவனம் வைக்க மாட்டோம். இப்படி செஞ்சா மீன்களுக்கு ஜீரணப் பிரச்னை சரியாயிடும். மறுநாள் வழக்கம்போல சாப்பிட ஆரம்பிச்சிடும்ங்க.