பொழுதுபோக்கு அம்சமாகக் கருதும் திரைத்துறை பல ஆயிரக்கணக்கான குடும்பங்களுக்கு வாழ்வாதாரமாக இருந்துவருகிறது. இதில் நடிகர், நடிகைகள் தொடங்கி.. டச்சப் பாய், லைட்மேன் வரை பல்வேறு பிரிவில்   திரைக்கு முன்னும் பின்னும் பல கலைஞர்களின் உழைப்பில்தான் ஒரு திரைப்படம் உருவாகிறது. 

அந்தவகையில், ஒரு திரைப்படத்துக்கு உயிர் கொடுப்பவர்கள், டப்பிங் ஆர்ட்டிஸ்ட் என்று சொல்லப்படும் பின்னணிக் குரல் கலைஞர்களே.1980-க்கு முன்பு வரை, நடிகர், நடிகைகள் தாங்களே சொந்தக் குரலில் பேசித்தான் நடித்து வந்தார்கள்.

ஆனால், 1980க்குப் பிறகு இந்நிலை முற்றிலும் மாறிவிட்டது. மொழி தெரியாத பிற மாநிலங்களைச் சேர்ந்த கதாநாயகன்,கதாநாயகிகள் அறிமுகம் செய்யப்பட்டதும் இதற்கு முக்கியக் காரணம்.  

அந்தவகையில் 80-களின் கதாநாயகிகளான அம்பிகா, ராதா, ரேவதி, ரதி, ஷோபா, வீடு அர்ச்சனா, சில்க் ஸ்மிதா, குஷ்பு, கெளதமி போன்ற பல நடிகைகளுக்கு   பின்னணிக் குரல் கலைஞர்களான ஹேமமாலினி (இவர், நடிகர் எம்.எஸ். பாஸ்கரின் சகோதரி. 

சில்க் ஸ்மிதாவின் 95 சதவீத படங்கள் இவர் பேசியதே), அனுராதா, துர்கா போன்றோரும் குரல் கொடுத்தனர்.பின்னர், ஸ்ரீஜா ரவி, சவிதா போன்றோர் அறிமுகமாகினர். அரை நூற்றாண்டைத் தாண்டி இன்றும் இவர்கள் பேசி வருகின்றனர்.

அதுபோல மணிரத்னம் படங்களுக்கு ஒப்பந்தம் செய்யப்பட்ட பெண் கதாபாத்திரங்களுக்காக அவரது மனைவி சுபாஷினி டப்பிங் பேசியதுண்டு. நடிகை சரிதா நட்புக்காக சில கதாநாயகிகளுக்கு குரல் கொடுத்துள்ளார்.

கதாநாயகர்களில், நடிகர் மோகனுக்கு பெரும்பாலான திரைப்படங்களுக்கு எஸ்.என். சுரேந்தர் பின்னணிக் குரல் கொடுத்தார் (இவர் நடிகர் விஜய்க்கு தாய்மாமா ஆவார்). பின்னர், மோகன் தனது சொந்தக் குரலிலேயே பேசினார். அதன்பின்னர், காதலன், மின்சாரக் கனவு போன்ற பிரபுதேவாவின் ஆரம்பக்கட்ட படங்களில் அவருக்கு நடிகர் விக்ரம் பின்னணிக் குரல் கொடுத்திருப்பார். அதேபோன்று, 12பி  படத்தில் நடிகர் ஷியாமிற்கு டப்பிங் கொடுக்கப்பட்டது.

 திரைப்படங்கள், விளம்பரப் படங்கள், தொடர்கள் என்று பிசியாக இருப்பவர்.  டிஸ்கவரி சேனலில் ஒளிபரப்பாகும் Man vs Wild தொகுப்பின் குரல் இவரே. மற்றும் மகாபாரதம் தொடரில் சகுனியின் குரலும் இவரே.இன்னும் ஏராளமான டப்பிங் கலைஞர்கள் உள்ளனர். 

சண்டைக்காட்சிகளுக்கு மட்டுமே பிரத்யேகமாக பேசுபவர்கள் சுமார் ஐநூறுக்கும் மேற்பட்டவர்கள் உள்ளனர். அத்தனை பேரையும் இந்த ஒரு கட்டுரையில் கொண்டு வருவது எளிதல்ல. டப்பிங் கலைஞர்கள் ரவீணா ரவி மற்றும் பாரதிராஜா ஆகியோர் தங்களின் டப்பிங் அனுபவங்கள் குறித்து நம்முடன் பகிர்ந்து கொண்டவை:

மூன்று தலைமுறையாக எங்கள் குடும்பத்தினர் பின்னணிக் குரல் கொடுத்து வருகிறோம்.   பாட்டி நாராயணி, அம்மா ஸ்ரீஜா ரவி,   இப்போது நான்.  நான் முதன் முதலில் குரல் கொடுத்தது ஒண்ணே முக்கால் வயதில். 

அம்மா டப்பிங் ஆர்ட்டிஸ்ட் என்பதால் அவர் ஒரு விளம்பரப் படத்துக்கு குரல் கொடுக்கச் சென்றபோது, அங்கே நான் விளையாட்டாக மழலையில் பேசிய வார்த்தைகளை பதிவு செய்து அதை அந்த விளம்பரப் படத்தில் சேர்த்துவிட்டார்கள். இப்படித்தான் என்னுடைய பின்னணிக் குரல் அனுபவம் தொடங்கியது. இதுவரை சுமார் 200 படங்கள் வரை டப்பிங் பேசியுள்ளேன்.

 அப்பா இயக்குநர் கஸ்தூரி ராஜாவிடம் ஆர்ட் டைரக்டராக இருந்த எம்.சி சக்திவேல். அம்மா தயாரிப்பாளராக இருந்தவர்.  அதனால், திரைத்துறைக்குள் நுழைவது எனக்கு சிரமமாக இல்லை.  ஆனால், டப்பிங் துறைக்குள் வந்தது நான் எதிர்பாராத ஒன்று. எனக்கு ஆரம்பத்தில் நடிப்பில்தான் ஆர்வம் அதிகமாக இருந்தது.  

பிப்ரவரி 14, ராம் போன்ற படங்களில் நடித்துள்ளேன்.அதன்பின்னர், குடும்ப சூழ்நிலை காரணமாக, வெளிநாட்டில் வேலைக்குச் சென்றுவிட்டேன். பத்து ஆண்டுகள் பணிபுரிந்த பின், மீண்டும் திரைத்துறையின் மீது மோகம் தீவிரமாக, இந்தியா திரும்பினேன்.