‘‘துப்பாக்கி எவன் கையிலே இருந்தாலும் வில்லன் நான்தான்டா...’’வித்யூத் ஜம்வால் டிரெய்லரில் பேசும் இந்த ஒற்றை வசனம் பல கேள்விகளையும் 13 வருட நினைவுகளையும்  உண்டாக்கியிருக்கிறது. ஏ.ஆர். முருகதாஸ் இயக்கத்தில் ‘மதராஸி’ பல எதிர்பார்ப்புகளை உருவாக்கியுள்ளது.

35 வருடங்கள் அனுபவம், 600க்கும் மேலான படங்கள், ஒன்பது தேசிய விருதுகள், 17 மொழிகளில் எடிட்டிங் செய்த ஒரே எடிட்டர் என லிம்கா சாதனைப் புத்தகத்தில் பெயர்... இப்படி பல புகழுக்கு சொந்தக்காரர், இப்போது ‘மதராஸி’ படத்தின் மூன்றாம் கண்! எடிட்டர் கர் பிரசாத், படம் குறித்து பல சுவாரஸ்ய தகவல்கள் பகிர்கிறார். 

பொதுவா நாங்க ஒரு டிரெய்லர் அல்லது டீசர் எடிட் செய்யும்போது எந்தவித பேக்ரவுண்ட் மியூசிக் அல்லது இசையோ இருக்காது. வேறு ஏதாவது படத்தின் மியூசிக்கை அடிப்படையாக வைத்துதான் எடிட் செய்வோம். 

அந்த எடிட்டட் வெர்ஷன் இசையமைப்பாளர்கள் கிட்ட போகும்போது இன்னும் சில ஸ்பெஷல் எபெக்ட்ஸ், பாடல் காட்சிகள் இதெல்லாம் கூட சேர்ந்து வரும். ஆனா, இன்னைக்கு அனிருத் வந்த பிறகு அவர் டீசர் அல்லது டிரெய்லரில் என்ன செய்கிறார் என்கிற எதிர்பார்ப்பு இளைஞர்கள் கிட்ட இருக்கு. 

முன்பு பாடல் காட்சிகள் அல்லது வரிகளை மட்டும்தான் ப்ரொமோஷன் வீடியோக்களில் வைப்போம். இன்னைக்கு பேக்ரவுண்ட் முதற்கொண்டு பிளே லிஸ்ட் ரகமாக, ரிங் டோன் சிறப்பாக மாறியிருக்கு. 

இந்த கேரக்டர் அறிமுகத்துக்கு அப்புறம் அனிருத் என்ன செய்யறார் என்கிற எதிர்பார்ப்பு வந்திருக்கு. ஏன் நானே அவர் மியூசிக் செய்த படங்களை பார்க்கும்போது இந்த வில்லனுக்கு என்ன பிஜிஎம், இந்த கெஸ்ட்ரோலுக்கு அனிருத் என்ன செய்யறார்... இப்படி எல்லாம் எதிர்பார்த்து காத்திருப்பேன்.

படம் வந்த பிறகு அதைப்பற்றி விமர்சனம் செய்தால் கூட பரவாயில்லை. சமீப காலமாக வெறும் டிரெய்லர் மற்றும் டீசரைப் பார்த்தே படத்திற்கு எதிர்மறை விமர்சனங்கள் கொடுக்கும் மனநிலை வந்திருக்கு. 

இது என்ன விதமான மனநிலை என தெரியலை. ஒரு படம் பார்த்துட்டு பிடிச்சிருக்கு, பிடிக்கலை... இதை இப்படி செய்திருக்கலாம்... இதை எல்லாம் சொல்வதற்கும் பேசுவதற்கும் எல்லாருக்குமே உரிமை உண்டு. அதே சமயம் தொழில் வேறு, ஒருத்தருடைய பர்சனல் வாழ்க்கை வேறு. அதையும் சேர்த்து கலந்து விமர்சனத்தில் அவர்கள் பெயரைக் கெடுப்பது எனக்கு சரியா படலை. 

எல்லாவற்றிலும் நெகட்டிவ் விஷயங்களை மட்டும்தான் இப்போ அதிகமா பார்க்க ஆரம்பிச்சிட்டோம்னு நினைக்கிறேன். அதேபோல் ‘படத்திற்கு வந்து பணத்தை வீணாக்காதீங்க, படம் பார்க்காதீங்க, ஓடிடிக்கு வரும் பார்த்துக்கோங்க’... இதையெல்லாம் ஏன் இவங்க சொல்றாங்க..? ஒரு கட்டத்தில் சினிமா உருவாக்கம் நின்னுடுச்சுன்னா இவங்களுடைய வாழ்க்கையும் சேர்ந்துதானே பாதிக்கப்படும்? எந்த கலைஞனும் ஒரு படம் வெற்றி பெறணும் அப்படின்னு நினைச்சுதான் எடுப்பாங்க. 

தோல்விக்காக யாரும் கோடிகளில் பணத்தை கொட்ட மாட்டாங்க. எதிர்மறை விமர்சனங்கள் அல்லது நெகட்டிவ் விஷயங்கள்தான் டிஜிட்டலில் விற்பனை ஆகுது. அதுதான் பிரச்னை.

இவர்களை உருவாக்கியதும் சினிமாதான். சினிமா ப்ரொமோஷன்களை இன்ஃப்ளூயன்சர்கள் கையிலயும், இன்டர்நெட் கைலயும் கொடுத்ததன் விளைவு பணம் கொடுத்தால் ஒரு மாதிரி விமர்சனம், கொடுக்கவில்லை என்றால் ஒரு விதமான விமர்சனம் என மாறிடுச்சு. 

இதை எப்படி சரி செய்யப் போறாங்கன்னு தெரியலை. அதிலும் மத்த மொழிகளை விட தமிழில் இந்த நெகட்டிவ் விமர்சன ட்ரெண்ட் அதிகமா இருக்கு. இதற்கு ஏதாவது ஒரு கட்டுப்பாடு விதிச்சாதான் சினிமா ஆரோக்கியமா இருக்கும்.

‘இந்தியன் 3’ முடிஞ்சது. ஆனால், எப்போ ரிலீஸ் என்பதை தயாரிப்பு தரப்புதான் சொல்லணும். ‘தேவரா 2’ விரைவில் படப்பிடிப்பு ஆரம்பிக்கப் போகுது. தற்சமயம் ஜூனியர் என்டிஆர் ஒருசில பான் இந்தியா திரைப்படங்களில் பிஸியா இருக்கார். 

அதையெல்லாம் முடிச்ச பிறகு இந்தப் படம் ஆரம்பிக்கும். தமிழில் ஒரு ஆர்ட் ஃபிலிம் இப்ப எடிட் செய்துக்கிட்டு இருக்கேன். செம்மலர் அன்னம் மெயின் கதாபாத்திரம். அந்தப் படம் ஒருசில விருதுகளை கொண்டு வரும் என நம்பறேன்.