பிரகாச வாழ்விற்கு வழிகாட்டும் பேச்சாளர்!

பெண்கள் படித்து பல துறைகளில் வேலை பார்த்து வருகிறார்கள். அவர்களுக்கு என தனிப்பட்ட அடையாளத்தினை ஏற்படுத்திக் கொள்கிறார்கள். இருப்பினும் ஒரு குறிப்பிட்ட சதவிகித பெண்கள் இன்றும் முன்னேறுவதற்கான வாய்ப்பினை தேடிக் கொண்டிருக்கிறார்கள். அப்படிப்பட்ட பெண்களுக்கு, முன்னேற்ற வழியினை கடந்த 20 வருடமாக தனது S2S பர்சனாலிட்டி டெவலப்மென்ட் என்ற பயிற்சி மையத்தின் மூலம் ஏற்படுத்தி வருகிறார், கோவையை சேர்ந்த பிரியா செந்தில்.

இவர் பெண்கள் முன்னேற்றம் குறித்த விழிப்புணர்வினை ஏற்படுத்த பலவித பயிற்சிகள் மற்றும் நம்பிக்கை எண்ணத்தினை அவர்கள் மனதில் பதிவு செய்து வருகிறார். இவரின் அனுபவமிக்க பயிற்சிகளால் பலரின் வாழ்வில் மாற்றம் ஏற்பட்டு அவர்கள் சிறந்த பலனை அடைந்து வருகிறார்கள். தன்னுடைய பயிற்சி மையத்தினை தொடர்ந்து ‘RP ஃபவுண்டேஷன்’ என்ற தொண்டு நிறுவனத்தை நிறுவி அதன் மூலம் பல சமூக சேவைகளையும் செய்து வரும் இவர் தன்னுடைய அனுபவங்களை பகிர்ந்து கொண்டார்.

‘‘நான் பள்ளியில் படிக்கும்போது என்னுடைய ஆங்கில வகுப்பு ஆசிரியர்தான் பெரிய இன்ஸ்பிரேஷன். அவர் எங்களிடம் ஒரு நாள் ‘எதிர்காலத்தில் எதுவாக ஆக வேண்டும் என்று விரும்புகிறீர்கள்’ என்ற கேள்வியினை முன்வைத்தார். மாணவிகள் பலரும் டாக்டர், என்ஜினியர் என்றுதான் பதிலளித்தார்கள். நான் மட்டும்தான் பேச்சாளராக வேண்டும் என்று என் விருப்பத்தை சொன்னேன். அதில் மிகவும் உறுதியாகவும் இருந்தேன்.

அதன் பிறகு அதே ஆசிரியர், உணவு இடைவேளையின்போது என்னை அழைத்து ‘நீ சொன்ன பதில் என்னை வியக்க வைத்தது. நீ மட்டும்தான் யாரும் சொல்லாத பதிலை கூறினாய். நீ நிச்சயம் எதிர்காலத்தில் பெரிய பேச்சாளராக வருவாய். சிறந்த பேச்சாளராக ஆகவேண்டும் என்றால், அதற்கு சரளமாக பேச மட்டும் தெரிந்தால் போதாது, நிறைய நூல்களை படிக்க வேண்டும். அப்போதுதான் உன் அறிவுத்திறனை மேம்படுத்திக் கொள்ள முடியும்.

எந்த ஒரு தலைப்பு சொல்லி பேசச் சொன்னாலும் அது குறித்து அப்போது தான் பேச முடியும். பேசும் திறன் என்பது தமிழ்மொழி நூல்களை மட்டுமே படித்தால் மட்டும் வராது. ஆங்கில மொழி நூல்களையும் படிக்க வேண்டும். உனக்கு பிற மொழி தெரிந்தால் அந்த நூல்களையும் படிக்கலாம். அல்லது மற்ற மொழி நூல்கள் ஆங்கிலம் அல்லது தமிழில் மொழியாக்கம் செய்யப்பட்டு வரும் என்று எனக்கு ஆலோசனை கூறினார்.

அவர் சொன்ன அந்த வார்த்தைகள் என்னுடைய ஆழ் மனதில் அப்படியே பதிந்து போனது. என் பெற்றோரும் எனக்கு ஊக்கம் அளித்தார்கள். அவர்கள் மட்டுமில்லாமல் என் கணவரும் எனக்கு ஆதரவாக இருந்ததால் தான் என்னால் இப்போது ஒரு பேச்சாளராகவும் அதன் மூலம் மற்ற பெண்களுக்கு மட்டுமில்லாமல் குழந்தைகள், ஆண்கள் என அனைவருக்கும் பல்வேறு பயிற்சிகளை அளித்து வருகிறேன்’’ என்றவர் இந்த துறையினை தேர்வு செய்ய முக்கிய காரணம் அவருடைய தாத்தா என்கிறார்.