‘‘நாம் செய்யும் வேலைக்கு அங்கீகாரம் அல்லது ஆதரவு கிடைக்கிறதோ இல்லையோ தொடர்ந்து சமூகம் சார்ந்து வேலைகளையும் செய்ய வேண்டும் என்பதுதான் என்னுடைய நோக்கம்’’ என்று பல சவால்களை தாண்டி வந்து அனுபவங்களோடு பேசுகிறார் திருநங்கை ஸ்வேதா.

தனியாளாக நின்று இந்த சமூகத்திற்கு என்னவெல்லாம் செய்ய முடியும் என்பதற்கு முன்னுதாரணமாக இருந்து வேலை செய்து வருகிறார் ஸ்வேதா. ‘Born2Win’ என்ற பெயரில்  தன்னார்வத் தொண்டு நிறுவனம் ஒன்றை தொடங்கி அதன் மூலம் தன் சமூக மக்களுக்கு பல சேவைகளை செய்கிறார். குறிப்பாக அரசாங்கம் திருநங்கை சமூகத்திற்காக செய்ய தவறிய எல்லாவற்றையும் இந்த தன்னார்வ நிறுவனம் மூலம் செய்கிறார்.

‘‘எனக்கு சின்ன வயசுலேயே சமூகம் சார்ந்த வேலைகளில் ஈடுபட ரொம்ப பிடிக்கும். நான் படிச்சதெல்லாம் ஆண்கள் பள்ளியில். பள்ளி படிப்பு முடிந்ததும் என்னுடைய 17 வயசுல தன்னார்வத் தொண்டு நிறுவனத்தில் இணைந்தேன். அந்த நிறுவனம் எச்.ஐ.வி மற்றும் எய்ட்ஸ் சம்பந்தமா விழிப்புணர்வு நிகழ்வுகளை நடத்தி வந்தாங்க.

எச்.ஐ.வி நோயினால்தான் பல திருநங்கைகள் பாதிக்கப்படுறதா பலர் சொல்றாங்க. ஆனால் நான் நேரடியாக அது குறித்து வேலை செய்த போதுதான் எனக்கு திருநங்கை சமூகம் எப்படியெல்லாம் பாதிக்கப்பட்டு இருக்கிறாங்க என்று புரிந்து கொள்ள முடிந்தது. கிட்டத்தட்ட 10 வருடம் இந்த விழிப்புணர்வு நிகழ்ச்சியை ஒருங்கிணைத்தல் மற்றும் அத சார்ந்து பேசுவது என பல வகைகளில் வேலை செய்து வந்தேன்.

சமூகம் சார்ந்து வேலைகளை செய்ய ஒரு திருநங்கை சென்றால் இந்த சமூகம் எப்படியெல்லாம் அவர்களை நடத்தும் என்பதற்கு நானே ஒரு உதாரணம் என சொல்லலாம். பல பேர் என்னை பாகுபாட்டோடு பார்ப்பதும், சில நேரங்களில் பாலியல் தொந்தரவுகள் கொடுப்பது என பல விஷயங்களை கடந்து தான் வந்தேன்.

ஆனால் இதை எதையுமே நான் பொருட்படுத்தவில்லை. அந்த சமயங்களில் என்னை போன்ற பாதிக்கப்படுகிறவர்களுக்கு ஆதரவுக் கரம்  கொடுத்து உதவ வேண்டும் என்றுதான் எனக்கு தோன்றும். ஐ.ஏ.எஸ் ஆகணும்னு எனக்கு ஆசை. அதற்காக இரண்டு முறை தேர்வுகளையும் எழுதி இருக்கிறேன். தேர்ச்சி பெறவில்லை என்றாலும் துவளாமல் எம்.ஏ. சோசியாலஜி படிப்பினை தொலை தூர கல்வி மூலம் படித்தேன்.