உலகளவில் அதிகமான எலுமிச்சையை உற்பத்தி செய்யும் நாடே, இந்தியாதான். 2022ம் வருடம் உலகம் முழுவதும் 22 மில்லியன் டன் எலுமிச்சை உற்பத்தி செய்யப்பட்டது. இதில் 3.8 மில்லியன் டன் எலுமிச்சையை உற்பத்தி செய்திருக்கிறது இந்தியா. ஒரு காலத்தில் அலங்காரச் செடியாகவும், மருத்துவப் பயன்பாட்டுக்காகவும் எலுமிச்சை வளர்க்கப்பட்டது. 

இப்படியான எலுமிச்சை மக்களின் அன்றாடப் பயன்பாட்டுக்கு வந்தது தனிக்கதை. இந்நிலையில் இந்தியாவின் முக்கியமான எலுமிச்சை விவசாயியாக மிளிர்கிறார், ஆனந்த் மிஸ்ரா. எலுமிச்சை விவசாயம் பற்றி அறியாத ஒரு மாவட்டத்தில் எலுமிச்சை விவசாயம் செய்து, அந்த மாவட்டத்துக்கே ரோல்மாடலாகத் திகழ்கிறார் இந்த விவசாயி.

உத்தரப்பிரதேசத்தில் உள்ள ரேபரேலி எனும் மாவட்டத்தில் அமைந்துள்ள கச்னவான் என்கிற கிராமத்தில் பிறந்தவர் ஆனந்த் மிஸ்ரா. பிபிஏ வரைக்கும் படித்த ஆனந்த, நொய்டா, பஞ்சாப், பீகாரில் உள்ள சர்வதேச நிறுவனங்களில் 13 வருடங்கள் வேலை செய்திருக்கிறார். பல நகரங்களில் வேலை செய்தாலும், சொந்த ஊரைப் பற்றிய ஏக்கம் அவரை வாட்டியது.

“இந்தப் பயணத்தில் நிறைய விஷயங்களைக் கற்றுக்கொண்டேன். நான் பார்த்த விவசாயிகள் எல்லோரும் குறுகிய காலத்தில் வருமானம் தரும் பயிர்களை மட்டுமே விவசாயம் செய்து வந்தனர். அந்த வருமானத்தை நம்பித்தான் அவர்களின் குடும்பமும் இருந்தது. அதனால் நீண்ட காலம் கழித்து வருமானம் தரும் எலுமிச்சை விவசாயத்தில் அவர்கள் ஈடுபடவில்லை. ஆனால், எலுமிச்சைக்கு நல்ல தேவை இருந்ததைக் கவனித்தேன்.

ஆந்திரப்பிரதேசம், குஜராத், மகாராஷ்டிரா, கர்நாடகா, மத்தியப்பிரதேசம் போன்ற மாநிலங்களில் அதிகமாக எலுமிச்சை விவசாயம் நடப்பதைப் பார்த்தேன். எங்கள் மாவட்டத்தில் ஒரு எலுமிச்சை விவசாயியைக்கூட நான் பார்க்கவில்லை. நஷ்டம் ஏற்பட்டாலும் பரவாயில்லை என்று துணிச்சலுடன் எலுமிச்சை விவசாயத்தில் இறங்கினேன்...’’ என்கிற ஆனந்த், முதலில் 900 எலுமிச்சை செடிகளை நடவு செய்தார்.

மழைக்காலத்துக்கு முன்பு ஒவ்வொரு எலுமிச்சை மரத்துக்கும் 15 கிலோ உரமிட்டார். இயற்கை முறையிலான பூச்சிக்கொல்லி மருந்துகளை மட்டுமே பயன்படுத்தினார். செடி மரமாகி எலுமிச்சையைக் கொடுக்க நான்கு வருடங்கள் ஆனது. கடந்த வருடம் சுமார் 10 ஆயிரம் கிலோவுக்கு அதிகமான எலுமிச்சையை அறுவடை செய்திருக்கிறார் ஆனந்த். 

உள்ளூர் சந்தையில் ஒரு கிலோ எலுமிச்சை 40 முதல் 70 ரூபாய் வரை விலை போயிருக்கிறது. இன்று இரண்டு ஏக்கர் நிலத்தில் எலுமிச்சை விவசாயம் செய்கிறார். எலுமிச்சை மரங்களுக்கு நடுவில் 50 சாத்துக்குடி மரங்களையும் வைத்திருக்கிறார்.