கொரில்லா

பணத்திற்காக பேங்கில் கொள்ளையடிக்கும்  நான்கு நண்பர்கள் பற்றிய கதை.போலி டாக்டர், பிக்பாக்கெட்  என திருட்டு வேலைகளில் வாழ்க்கையை மேற்கொண்டு இருக்கிறார் ஜீவா. அவரது நெருங்கிய நண்பர்களான சதிஷ், விவேக் பிரசன்னா, மதன் ஆகிய மூவரும் வேலையையும், பணத்தையும் தேடுகிறார்கள்.

பெரும் பணத்தேவை ஒரு கட்டத்தில் சூழ்ந்து விட ஒரு பேங்கை கொள்ளை அடிக்கப் பார்த்து, தேவையை நிறைவேற்றிக்கொள்ளத் துடிக்கிறார்கள். எல்லாம் முடியும் வேளையில் அவர்களால் எந்தப் பிரச்சினையும் இன்றி தப்பிக்க முடிந்ததா? கொள்ளையடித்த பணம் என்னவானது? போன்ற கேள்விகளுக்கு அடுத்தடுத்து பதில் அளிப்பதே கிளைமேக்ஸ்.

நகைச்சுவையை பின்புலமாக வைத்து இயக்குநர் டான் சான்டி களமிறங்கி இருக்கிறார். ஜீவா, சதிஷ், விவேக் பிரசன்னா காமெடி கூட்டணியில் ஜோக்கும், த்ரில்லும் சேர்ந்து கொஞ்சம் மனதிற்கு ஒட்டுதலாக காமெடி கிடைக்கிறது.  சகல ஏமாற்று வேலைகளும் செய்பவராக நன்றாகப் பொருந்துகிறார் ஜீவா.

ஆரம்பத் தொடக்கம் அட்டகாசமான காமெடிக்கு வழி வகுத்துக் கொடுத்து பிரமிப்பை உண்டாக்குகிறது. ஆனால். அந்த வேகத்தை கொண்டு செலுத்தாமல் பிறகு திணறுகிறார்கள். எந்த லாஜிக், ஒழுங்கு பற்றியெல்லாம் வருத்தப்பட்டுக் கொள்ளாமல் சீனுக்கு சீன் சிரிக்க வைத்தால் போதும் என்று இறங்கி அடித்தவர்கள், பின் பகுதியில் விவசாயிகள் பிரச்சினையை எடுத்துக்கொண்டு. ஃபினிஷிங் டச் கொடுப்பது ஆச்சர்யம்.