தமிழகத்தையே உலுக்கி இருக்கிறது சுபஸ்ரீ யின் மரணம். இதனையடுத்து திமுக உட்பட பல அரசியல் கட்சிகள் `இனி பேனர் வைக்க வேண்டாம்’ என தங்கள் கட்சியினருக்கு வேண்டுகோள் வைத்துள்ளனர். விஜய், சூர்யா உட்பட நடிகர்களும் பேனர் வேண்டாம் என தங்கள் ரசிகர்களிடம் வலியுறுத்தியுள்ளனர்.

உண்மையில் 2007ம் ஆண்டில் இருந்தே `சட்டவிரோத டிஜிட்டல் பேனர்’ குறித்த வழக்குகள் பதிவாகி வருகின்றன. 2014ம் ஆண்டு உயர் நீதிமன்ற மதுரைக் கிளையின் நீதிபதிகள், ‘தமிழகத்தில் விவாகரத்துக்கு மட்டும்தான் இன்னும் பேனர் வைக்கவில்லை’ என்று விமர்சிக்கும் அளவுக்கு இந்தப் பிரச்னை இருந்துள்ளது.

‘‘அது நடந்த சில நாட்கள்ல வியாசர்பாடில ஒரு பையன் விளம்பரப் பதாகை விழுந்து இறந்துட்டார். இந்தச் சம்பவம் என்னை உலுக்கிச்சு. உயிர்ப்பலி வாங்கும் பதாகைகளை ஒழிக்கணும்னு முடிவு செஞ்சேன். ஒரு முறை நந்தனத்துல ஆரம்பிச்சு அண்ணாசாலை வரை ஜெயலலிதாவுக்கு பேனர் வைச்சாங்க.

இதனால மக்கள் ரொம்பவும் அவதிப்பட்டாங்க. 64  போட்டோ ஆதாரங்களோட வீடியோவும் எடுத்து வழக்குத் தொடுத்தேன். ஞாயிற்றுக்கிழமையா இருந்தும் அவசர வழக்கா எடுத்து நீதியரசர் மணிக்குமார் வீட்ல வாதாடி விபத்து ஆதாரங்களைக் காட்டினேன்.  

பேனர் வைக்க நகராட்சியும் காவல்துறையும்தான் அனுமதி தர்றாங்க. சட்டப்படி அஞ்சு அல்லது ஆறு பதாகைகளைத்தான் வைக்கலாம். ஆனா, ஆயிரக்கணக்கான பேனர்களை வைக்கறாங்க. அதுவும் ஒரே தெருவுல நூற்றுக்கணக்கான பதாகைகளை நடறாங்க. இப்படி இருந்தா விபத்து ஏற்படத்தான் செய்யும்.

சட்டப்படி தமிழ்நாடு உள்ளாட்சி விளம்பரக் குற்றம், திறந்த வெளி சிதைப்பு தடுப்புச்சட்டம் ஆகிய இரு பிரிவுகளின் கீழ் வழக்குத் தொடரலாம். இதுக்கு ஒரு வருஷம் வரை சிறைத்தண்டனை கிடைக்கும். ஜாமீன்ல வரக் கூடிய வழக்கா இது இருக்கறதால இந்த சட்டங்களை யாரும் மதிக்கறதில்லை.