முகம் மறுமுகம்-பிரைடல் அண்ட் டிசைனர்

‘கிளிஞ்சல்கள்’, ‘பயணங்கள் முடிவதில்லை’, ‘டார்லிங் டார்லிங் டார்லிங்’, ‘தங்கமகன்’, ‘விதி’ என 1980களில் கவனம் ஈர்த்த கதாநாயகி பூர்ணிமா பாக்யராஜ். இன்று சின்னத்திரையிலும் ‘கண்மணி’யாக கலக்குபவர். பாக்யராஜின் மனைவி, சாந்தனுவின் அம்மா, கீர்த்தியின் மாமியார் என குடும்ப பொறுப்புகளிலும் இன்முகமாக புன்னகைக்கும் பூர்ணிமா, பிரமாதமான ஒரு ஃபேஷன் டிசைனர்!

கோலிவுட், டோலிவுட் பிரபலங்களின் திருமணங்கள், விஐபி வீட்டுப் பெண்கள், சின்னத்திரை நட்சத்திரங்கள் என பலரது பிரைடல் அண்ட் டிசைனர் ஆடைகள் பூர்ணிமாவின் கைவண்ணத்தில் அவரது ‘பூர்ணிமா ஸ்டோர்ஸி’ல்தான் ரெடியாகின்றன. நுங்கம்பாக்கத்தில் உள்ள பூர்ணிமாவின் வீட்டிற்குச் சென்றால், ஹாலில் பிரமாண்ட ஓவியம் வரவேற்கிறது.

‘‘‘பூர்ணிமா ஸ்டோர்ஸ்’னதும் ரொம்ப பெரிய யூனிட்டா இருக்கும்னு நினைக்காதீங்க. சின்ன அளவுலதான் பண்றேன். ஆர்டர் நிறைய வரும்போது, அவுட்சோர்ஸும் கொடுத்து பண்ணிப்பேன்...’’ எனச் சொல்லிக்கொண்டே, நான்காவது மாடியில் இருக்கும் தனது டெய்லரிங் யூனிட்டை அறிமுகப்படுத்தினார்.

‘‘என்னோட காஸ்ட்யூம்ஸ்ல எம்பிராய்டரிக்கு கொஞ்சம் முக்கியத்துவம் கொடுப்பேன். நான் நடிக்க வந்த புதுசுல, ‘எம்பிராய்
டரி எல்லாம் அடுத்த அஞ்சு வருஷத்துல காணாமல் போயிடும்’னு சொன்னாங்க. ஆனா, அடுத்த அஞ்சு வருஷத்துல அதை விரும்புறவங்க எண்ணிக்கை டபுள், ட்ரிபிள்னு பெருகிடுச்சு!

என்கிட்ட எம்பிராய்டரிக்கு மெஷின் கிடையாது. கைலதான் பண்றோம்...’’ என கோல்டு அண்ட் ஸ்டோன்ஸ் வேலைப்பாடுகளுடன் கூடிய ஒரு டிசைனர் பிளவுஸை சாம்பிள் காட்டியபடி பேச ஆரம்பிக்கிறார் பூர்ணிமா.

‘‘பூர்வீகம் மும்பை. சின்ன வயசில இருந்து ஃபைன் ஆர்ட்ஸ்ல ஆர்வம் அதிகம். கலர் மிக்ஸிங், அதை மேட்ச் பண்றது, ஃபேப்ரிக்ஸோட ஃபீல் எல்லாமே பிடிக்கும். அப்ப நான் காஸ்ட்யூம் டிசைனிங் கோர்ஸ் படிக்கலாம்னு நினைச்சேன். ஆனா, ஈஸியா கிடைக்கற குரூப்பா பி.காம்ல சேர்ந்திட்டேன்.
காலேஜ்ல கல்ச்சுரல்ஸ்ல நிறைய கலந்துக்குவேன். டான்ஸ்ல கலக்கினேன். அப்புறம், விளம்பரப் படங்கள்ல நடிக்க ஆரம்பிச்சேன். அப்படியே சினிமா ஆஃபர் வந்துச்சு.

நான் நடிச்ச படங்கள்ல என்னோட காஸ்ட்யூம்ஸை நானே பண்ணிக்கறேன்னு சொல்லிடுவேன். அப்ப இன்டர்நெட், ஃபாரீன் மூவீஸ் எல்லாம் கிடையாது. அவ்ளோ ஏன்? இங்கே இந்தியாவுக்குள்ள இருக்கற லேட்டஸ்ட் டிரெண்டைக் கூட ஈஸியா தெரிஞ்சுக்க முடியாது.
எங்காவது ஏதாவது ஒரு ஃபேஷன் மேகஸின்ல வந்த டிசைன்ஸ் பார்த்து, ‘அதான் லேட்டஸ்ட் டிரெண்ட் போல’னு நினைச்சுக்க வேண்டியிருக்கும். அதுல என் ஐடியாஸ் கலந்து டிசைன் பண்ணிக்குவேன்.

நான் நினைக்கற டிசைனை அப்ப அணிய முடியும். யாரும் அது சரியில்லை, இது பிடிக்கலைனு சொல்ல மாட்டாங்க. எல்லாருமே என்கரேஜ் பண்ணுவாங்க. ஆனா, இப்ப அப்படியில்ல. ஸ்கூல் பசங்கள்ல இருந்து எல்லார்கிட்டேயும் டிரெஸ்ஸிங் சென்ஸ், ஃபேஷன் நாலேஜ் இருக்கு. ஸோ, பொருத்தமில்லாத காஸ்ட்யூமை நம்ம இஷ்டத்துக்கு அணிஞ்சுக்க முடியாது.

ஆரம்ப காலத்திலிருந்து இப்பவரை என்னோட காஸ்ட்யூம்ஸை நானே கவனிச்சுக்கறேன். அப்புறம் எனக்கு மேரேஜ் ஆச்சு. கல்யாணத்துக்குப்பிறகு சாருக்கு (பாக்யராஜ்) காஸ்ட்யூம்ஸ் பண்ண ஆரம்பிச்சேன். அவரது படங்களுக்கும் காஸ்ட்யூம் பண்ணுவேன். ‘ராசுக்குட்டி’ படத்துல ஹீரோயின் ஒரு லட்சம் ரூபாய் காஸ்ட்லி சேலை ஒண்ணு அணிவாங்க. அப்போ ரொம்ப ஃபேமஸ். அந்த சேலை ரெடி பண்றதே எனக்கு ஒரு பெரிய சவாலா இருந்துச்சு.

அப்பவெல்லாம் ரொம்ப அதிகபட்ச செலவே இருபதாயிரத்தை தாண்டாது. ஆனா, அந்த சேலைக்கு ஒரு லட்சம் செலவழிச்சு லுக்ல கொண்டு வரவே ரொம்ப மெனக்கெட்டோம். ‘ராசுக்குட்டி’ ரிலீஸான தியேட்டர்கள்ல அதை டிஸ்பிளேயாகவும் வச்சோம். அப்படி வித்தியாசமான ஒர்க் பண்றது எப்பவும் பிடிச்ச விஷயம்...’’ என பூரிக்கும் பூர்ணிமா, முழுநேர டிசைனராகவும், ஒரு ஏற்றுமதியாளராகவும் இருந்திருக்கிறார்.

‘‘ஆமா. அது என்னோட ஃப்ரெண்டோட ஷாப். ஸ்பென்சர் பிளாசா ஆரம்பிச்ச டைம்ல உள்ள கடை அது. அவங்களோட சேர்ந்து காஸ்ட்யூம்ஸ் டிசைனிங்ஸை கவனிச்சிருக்கேன். சில மாசங்கள்ல அந்த ஃப்ரெண்டுக்கு கல்யாணம் ஆகிடுச்சு. அவங்க என்னை, ‘இந்தக் கடையை நீங்களே கவனிச்சுக்குங்க’னு கேட்டுக்கிட்டாங்க.

அதை வீட்ல சார்கிட்ட சொன்னேன். சார் சம்மதிக்கலை. கடைக்குப் போய் அங்கே நானே உட்கார்ந்து ஒர்க் பண்றதை அவர் விரும்பல. அதனால எனக்கு கொஞ்சம் ஃப்ரீ டைம் கிடைச்சது. இடை இடையே சார் புரொடக்‌ஷன் போகும் போது, என்னை பார்த்துக்கச் சொல்லுவார். அங்கேயும் டிசைனிங்தான். அப்புறம், கொஞ்ச நாள்ல ஃப்ரீ டைம் கிடைச்சது. என்னோட டிசைனிங் ஒர்க் எல்லாத்தையும் சேர்த்து வச்சு, ஒரு ஃபேஷன் ஷோ வச்சேன். அது செம ரீச்.